Kap 81:6-14

⁶Nak amɨn kɨnda tekni dɨma nandɨsat uŋun da gen yaŋban nandɨsat. Uŋun da yaŋ yosok, “Nak yo jɨgɨ morap ji da kwapmon tawit uŋun kukwaŋ yopgum. Ae mɨktɨm sɨmɨl gok paŋpulugoko mibɨlɨkon yopba taŋakwa pi teban saŋbeŋek dɨma awit.

⁷Jɨgɨkon egek bɨsit nayɨŋba pulugaŋ depgum. Gɨkwem kɨrɨrɨŋ yosok uŋungwan da bɨsitji nandagɨm. Nak Meriba pakbikon nandaŋ gadatji pɨndat do aŋek ji paŋkewalgɨm.

⁸“Nak dakon amɨn kabɨno, nawa dayɨko nandabɨt. Israel amɨn, nak dakon gen nandaŋek guramɨtni do madepsi nandɨsat.

⁹Ji mɨktɨm ŋwakŋwarɨ dakon kokup kɨdatni dɨma yolni, ae dɨma gawak yomni.

¹⁰Nak kaloŋgɨn ji dakon Yawe ae Piŋkopji egɨsat. Nak naga Isip mɨktɨmon baŋ ji tɨmɨk paŋopgum. Gen kagasi aŋtaŋ kɨŋakwa upmokgeŋ.

¹¹“Mani babɨkji da nak dakon gen nandak do dɨma galak tawit. Asisi, Israel amɨn nak dakon gen guramɨt do dɨma galak tawit.

¹²Do yum pɨndagapbo kwen wɨgɨk aŋpakni yolek galak toknikon yo awit.

¹³“Nak mɨŋat amɨno da geno guramɨk kɨmotni dosi nandɨsat. Ae Israel amɨn nak dakon galaktok yol kɨmotni do nandɨsat.

¹⁴Yaŋ ani kaŋ, nak da uwalni tepmɨsi pabɨŋ yopdɨsat. Aŋek uwal gat emat wamaŋek pabɨŋ yopbeŋ.