Kap 7:3-17

³Yawe Piŋkopno, yokwi agɨm dakon gulusuŋno taŋ namɨsak, bo amɨn dɨwarɨ do yokwi aŋ yomgum,

⁴bo notno ɨsal dogɨn yokwi aŋ ɨmgum, bo uwalno dakon yo ɨsal dogɨn kabo tɨmɨkgɨm kaŋ,

⁵yum pɨndagaki uwalno da nak aŋsopmaŋek abɨdoni. Nak tagɨ bamaŋek obɨsi aŋupbal aŋek gɨptɨmno yɨpba kɨmbabaŋon ɨsal tosak.

⁶Yawe, pɨdoki! Uwalno da nagon emat tebaisi aŋ. Uŋun butjap nandaŋ yomɨŋek yo yokwisi aŋ yobi. Piŋkopno, aŋpak kɨlegɨ dogɨn galak tosol, do abɨŋek aŋpulugoki.

⁷Gak kwensi kɨla amɨn madep yɨtyɨt tamogokon yɨgek mɨŋat amɨn kabɨ morap gak da kapmatjok abɨŋ muwutni do yoyɨki.

⁸Yawe, mɨŋat amɨn morap dakon aŋpakni kokwin asal, do aŋpulugaŋaki gen pikon teban tokeŋ. Nido, aŋpak kɨlegɨ gat ae aŋpak tagɨsi gat baŋgɨn asat.

⁹Piŋkop gak wagɨl kɨlegɨsi. Amɨn morap dakon nandak nandak butyo pakyaŋsi pɨndak nandaŋyo asal. Amɨn yokwi aŋpak yokwi saŋbeŋek dɨma ani do kɨrɨŋɨk yobi. Mani amɨn kɨlegɨ paŋpulugaŋaki tebai atni.

¹⁰Piŋkop uŋun pasɨkno. Butni kɨlegɨsi amɨn yokwikon baŋ tɨmɨkdak.

¹¹Piŋkop uŋun gen kokwin kɨla amɨn kɨlegɨsi. Gɨldarɨ gɨldarɨ yokwi pakpak do japmɨ nandaŋek pabɨŋ yopmaŋdak.

¹²Yokwi aŋ amɨn but tobɨl dɨma ani kaŋ, Piŋkop da emat agak sɨbani geni toŋsi asak do ɨlɨtdɨsak, ae obipni paŋɨlɨtdɨsak.

¹³Amɨn uŋun dapban kɨmotni do dɨkdɨkni kɨlɨ paŋnoman agɨt. Dɨkdɨk mɨleŋ asɨpmɨ toŋ paŋnoman asak.

¹⁴Amɨn yokwi uŋun yokwi ak do nandaban teban toŋ. Yokwi mibɨlɨ mibɨlɨ ak do tagap tok asak, ae bɨsapmɨ bɨsapmɨ top yosok.

¹⁵Amɨn kɨnda abɨdok do gapma dubagɨ kɨnda wayɨkdak, mani iyɨ uŋun gapma wayɨkdakgwan mosok.

¹⁶Gulusuŋ iyɨ asak uŋun da iyɨnaŋ wɨtjɨŋ ɨmɨsak. Ae butjap ematyo amɨn dɨwarɨ do aŋ yom do nandak nandak asak, uŋun da tobɨlek iyɨ naŋ aŋupbal asak.

¹⁷Yawe uŋun amɨn kɨlegɨsi, do ya yaŋ iyɨsat. Piŋkop Wukwisi do mani aŋkɨsik do kap yokeŋ.