Kap 77:3-13

³Nak Piŋkop do nandak nandak aŋek iyoŋ iyoŋ yosot. Nandak nandak aŋegek butno jɨk tosok.

⁴Butno jɨgɨsi, do gen arɨpmɨ dɨma yokeŋ. Piŋkop gak da yum nandaŋaki dɨpmɨn dɨma pokdot.

⁵Nak kalɨp tagɨ egɨpgum uŋun do nandɨsat. Bɨlak uŋun kɨlɨ kɨŋ mudawit, uŋun do nandɨsat.

⁶Kalbi nak nandak nandak morapmɨ aŋek naga do yaŋ yosot,

⁷“Amɨn Tagɨ da toktogɨ manji namjak bo? Nak do saŋbeŋek dɨma galak tosak bo?

⁸Amɨn do but dasi galaktaŋ yomyom aŋpakni wagɨl pasɨlgɨt bo? Yaŋ teban tok morapni ɨsalɨ bo akdaŋ?

⁹Piŋkop da kɨlɨ ɨŋtaŋ nimgut da bupmɨ nandaŋ nim do dɨma bo nandɨsak? Butjapni da bupmɨni sopmaŋdak bo?”

¹⁰Nak yaŋ nandaŋek yagɨm, “Piŋkop Wukwisi, gak abɨsok nak dɨma aŋpulugosol, do nak uŋun do butno obɨsi jɨk tosok.”

¹¹Piŋkop, nak gak dakon pi madep do aeno nandakeŋ. Asi, wasok tapmɨmɨ toŋ kalɨp agɨl uŋun do nandakeŋ.

¹²Pi morap agɨl uŋun do nandakeŋ. Pi tapmɨmɨ toŋ agɨl uŋun kɨsi do nandakeŋ.

¹³Piŋkop, aŋpakgo telagɨ. Kokup kɨdat kɨnda gak gat arɨp dɨma. Gak da yapmaŋ mudosol.