Kap 76:1-11

¹Asap dakon kap kɨnda. Kap on Piŋkop gawak ɨmɨm dakon kap. Gita tɨdaŋek yogogɨ. Juda mɨktɨmon amɨn da Piŋkop pakyaŋsi nandaŋ ɨmaŋ. Israel mɨktɨmon mani wukwisi tosok.

²Yutni uŋun Jerusalem tosok. Saion Kabapmon tosok.

³Uŋun kokupmon uwal dakon gobɨŋni gat, ae pasɨkni gat, ae emat agak sɨbani gat jokgalgɨt. Piŋkop da emat dakon yo morapni paŋupbal agɨt.

⁴Piŋkop, gak tɨlɨmgo uŋun madepsi, ae gak kɨla amɨn madep mibɨltogɨ. Gak wukwisi, man madepgo da kabap madep dakon man madep yapmaŋ mudosok.

⁵Gak uwal dakon emat amɨni tapmɨmɨ toŋ dakon yoni tagɨsi gwayeŋ paŋapgul. Uŋun emat amɨn uŋun kɨlɨ kɨmak mudawit, ae emat dakon yo kabɨni tɨmɨtni dakon tapmɨm mɨni.

⁶Jekop dakon Piŋkop, gak da tebai yoyɨgɨl, do os gat ae amɨn ɨlɨk pawɨlgaŋ tamo gat kɨsi wayɨŋɨ mɨni.

⁷Piŋkop, amɨn gak do si pasolgoŋ. Gak da butjap nandaŋ yobi bɨsapmon, namɨn da gak da dabɨlon tagɨ atjak? Amɨn kɨnda da arɨpmɨ dɨma.

⁸Gak kwen kokupmon da uwal da kobogɨ yokwisi tɨmɨtni do yagɨl, aŋaki mɨktɨmon mɨŋat amɨnyo da pasalek tayaŋgok egɨpgwit.

⁹Piŋkop gak pɨdaŋ agek amɨn yokwi dakon aŋpakni kokwin aŋek jɨgɨni toŋ amɨn pulugaŋ yopmaŋdal.

¹⁰Gak butjap nandaŋek kobogɨ yomɨsal, do amɨn dɨwarɨ mango awɨkwaŋ. Ae amɨn emaron dɨma yokwi toni uŋun da gak gawak gamdaŋ.

¹¹Yawe Piŋkopgo yaŋ teban tok aŋ ɨmɨŋek uŋun gen si guramɨkgi. Mɨŋat amɨn morap ji Yawe do pasalek but galak do yo paŋkɨ ɨmni.