Kap 74:5-13

⁵Amɨn da koron kɨndap pasaŋ uŋudeŋ, gak dakon yut pasɨwit.

⁶Kɨndap kwɨk tɨlak tagɨsi baŋ paŋtɨlɨm abi, uŋun uwal da pareŋka ae ama madep baŋ tɨdaŋ tuwɨlgwit.

⁷Kɨndap baŋ yutgo sowit. Uŋun aŋpak yokwisi aŋek yut uŋun gaga egɨp do manjɨgɨl, uŋun aŋupbal aba telagɨ dɨma tagɨt.

⁸Nin wagɨlsi pabɨŋ nip do nandak nandak awit, do mɨktɨmninon Piŋkop gawak ɨmɨm yut morap toŋ uŋun soŋ mudawit.

⁹Gak da wasok tapmɨmɨ toŋ kɨnda abɨ dɨma komaŋ. Ae abɨsok kombɨ amɨnin mɨni. Ni bɨsapmon jɨgɨ uŋun pasɨljak uŋun ninon da kɨnda dɨma nandɨsak.

¹⁰Piŋkop, bɨsap niaŋ da uwal da yaŋsul yokwisi aŋ gamni? Toktogɨsi gak dakon man do yaŋba yokwi tok aŋegɨpni?

¹¹Gak nido nin dɨma paŋpulugok do nandɨsal? Tapmɨm madepgokon da uwalnin dapbɨ tasɨk toni.

¹²Mani Piŋkop, kalɨpsigwan gak kɨla amɨn madepnin egɨpgul, ae abɨsok kɨsi kɨla amɨn madepnin egɨ nimɨsal. Bɨsap morapmɨ gak da nin paŋpulugaŋbɨ emaron dɨma tasɨk tagɨmaŋ.

¹³Gak dasi tapmɨm madepgokon da tap pudagɨl, aŋek uŋun tap pakbi kagagwan nugɨm madep mani Liwaiatan uŋun dakon busuŋɨ paŋsulɨkgɨl. Aŋek gɨptɨm tɨmni mɨktɨm kɨbɨrɨ nɨmani toŋ tɨmon joŋ kɨlap do yobɨ nawit.