Kap 71:15-24

¹⁵Aŋpakgo kɨlegɨsi uŋun do amɨn yoyɨkeŋ. Yo masɨ masɨmɨ morapmɨsi nagon agɨl uŋun arɨpmɨ dɨma manjɨŋ mudogɨ, do gɨldat kɨnda kaloŋ gak do nandaŋ egek pulugaŋ nepgul uŋun dakon geni amɨn yoyɨkeŋ.

¹⁶Amɨn Tagɨ Yawe, gak dakon tapmɨm do nandaŋek gak aŋkɨsikeŋ. “Yawe kaloŋ gɨn uŋun amɨn kɨlegɨsi” yaŋ yoyɨŋ teŋteŋokeŋ.

¹⁷Piŋkop, nak monɨŋɨsogon da gak da nayɨŋ dek aŋaŋ wɨgɨl. Gak da yo masɨ masɨmɨsi asal uŋun do amɨn yoyɨŋ teŋteŋosot.

¹⁸Abɨsok nak amɨn pelaŋ kɨlɨ at, ae kuluno madepsi kwaŋ, do Piŋkop nak dɨma nepmaŋ dekgi. Nak gat egaki gak dakon tapmɨm madepgo do mɨŋat amɨn kabɨyo altaŋ altaŋ ani uŋun yaŋ teŋteŋok aŋyomɨŋ yomɨŋ abeŋ.

¹⁹Piŋkop, aŋpakgo kɨlegɨ uŋun tugaŋ kundu da arɨpmon wɨgɨgɨt. Gak pi madepsi agɨl. Amɨn kɨnda gak yombem mɨni. Gak da yapmaŋ mudosol.

²⁰Gak da jɨgɨ mibɨlɨ mibɨlɨ yopbɨ nagon apgwit, mani nak nandɨsat, gak da nak aego aŋteban akdɨsal. Mɨktɨm kagagwan naŋ abɨ pɨdokeŋ.

²¹Gak da mano abɨ madepsi sigɨn pap tokdɨsak. Aŋek butno aego aŋteban akdɨsal.

²²Piŋkopno, gak dɨmasi nepmaŋ dekdal, do mango awɨgɨk do gita tɨdokeŋ. Israel amɨn dakon Piŋkop telagɨ, mango awɨgɨk do gita tɨdaŋek kap yokeŋ.

²³Nak kɨsɨk kɨsɨk aŋek yaŋ tɨdokeŋ. Gak do kap yaŋek mango awɨgɨkeŋ, nido yokwikon naŋ abɨdagɨl.

²⁴Amɨn da nak abɨŋ nep do awit, mani gak da pabɨŋ yopmaŋek obɨsi paŋmayak agɨl. Yaŋ agɨl do nak gɨldat kɨnda kaloŋ gak dakon aŋpak kɨlegɨ do mɨŋat amɨnyokon yaŋ teŋteŋok abeŋ.