Kap 69:5-34

⁵Piŋkop, nak nandaŋ kokwini tagɨ dɨma amɨn kɨnda gak da nandaŋ namɨsal. Dɨwarɨno arɨpmɨ dɨma paŋkɨsɨbɨkeŋ.

⁶Amɨn Tagɨ Yawe Tapmɨm Ami, yum nandaŋaki yokwi dɨ abo gak da paŋpulugosak do nandaŋ gadat aŋek jomjom aŋ amɨn da mayaktok dɨ pabam. Israel amɨn nin dakon Piŋkopnin yum nandaŋaki yokwi dɨ abo gak wɨsɨŋ gandak do pi aŋ amɨn da mayaktok dɨ pabam.

⁷Nak gak goldat, do amɨn da manji gen yaŋ namaŋ. Yaŋ aŋakwa mayaktok pasat.

⁸Peno padɨk padɨkyo da dɨma nandaŋ namaŋ wup aŋ. Gwakno da nak kokup ŋwakŋwarɨkon amɨn kɨnda yombem nandaŋ namaŋ.

⁹Nak gak dakon yut do madepsi galak tosot, do yutgo da tagɨsi tosak do pi madepsi asat. Amɨn da gak do gen yokwi yaŋ gamaŋ uŋun yaŋba nagon obɨsak.

¹⁰Nak kunam tagek gak do nandaŋek jap kelkel aŋek gawak gamɨsat bɨsapmon, amɨn da nak do gen yokwi yaŋ namaŋ.

¹¹Nak but yokwi dakon ɨmal pasat bɨsapmon, amɨn da manji gen yaŋ namaŋ.

¹²Muwut muwut tamokon amɨn da nak do yaŋba yokwi tok aŋ. Ae pakbi teban naŋek but upbal aŋ amɨn da abɨŋ nep do kap yoŋ.

¹³Mani Yawe, nak gak do bɨsit asat. Piŋkop gaga nandɨsal bɨsapmon bɨsitno dakon bamɨ uŋudon nabi. Gak nak do but dasi galak taŋ namɨsal, do asi pulugaŋ nep do yagɨl uŋun do nandaŋek bɨsitno dakon kobogɨ nabi.

¹⁴Pulugaŋ nepmaŋaki neŋak kagagwan dɨma pɨgɨ pasɨlgeŋ. Nak do yaŋba yokwi tok aŋ namaŋ amɨn da kɨsiron baŋ pulugaŋ nepmaŋaki pakbi ɨlarɨgwan dɨma pasɨlgeŋ.

¹⁵Yum nandaŋaki pakbi da ɨgek nak dɨma wɨtjisak, ae pakbi ɨlarɨgwan dɨma pɨgɨ pasɨlgeŋ. Yum nandaŋaki bumjot gapma da nak dɨma galautjak.

¹⁶Yawe, gak bɨsapmɨ bɨsapmɨ but dasi galak taŋ namɨŋek yo tagɨsi aŋ namɨsal. Yaŋdo, bɨsitno dakon bamɨ nabi. Bupmɨgo uŋun madepsi, do abɨŋ aŋpulugoki.

¹⁷Nak gak dakon oman monjɨgo. Pasɨlɨkon dɨma egɨ nabi. Nak jɨgɨkon egɨsat, do bɨsitno tepmɨsi nandaŋek bamɨ nabi.

¹⁸Nak da kapmatjok abɨŋek yokwikon baŋ yumaŋ naŋ nepbi. Uwalno da kɨsiron naŋ pulugaŋ nepbi.

¹⁹Uwalno nak do gen yokwi yoŋ uŋun gak da nandaŋaki nayaŋ. Mano abɨŋ yɨpmaŋakwa mayaktok pasat uŋun nandɨsal.

²⁰Gen yokwi uŋun yaŋ namaŋ uŋun do but yokwisi nandɨsat. Aŋek tapmɨmno mɨnisi asak. Amɨn dɨ da nak dakon but bo aŋteban ani yaŋ nandagɨm, mani dɨma. Ae amɨn dɨ da nak aŋteban ak do gen tagɨ dɨ bo nayɨni yaŋ nandagɨm, mani dɨma.

²¹Jap do agɨm bɨsapmon marasin yokwi baŋ namgwit. Tekno kɨbɨdaŋban wain ɨsɨpmɨ baŋgɨn nokeŋ do namgwit.

²²Jap noknok madep ak do muwutni bɨsapmon uŋun kɨsɨk kɨsɨk bɨsap da tobɨlek kɨlap da yaŋ paron depban yokwalni, ae gapmagwan maŋek tasɨk toni dakon yo yaŋ asak dosi nandɨsat.

²³Dabɨlni abɨ pɨlɨn tuk ani, aŋek yo saŋbeŋek dɨma pɨndatni. Manji paŋupbal abɨ tebai dɨma atni dosi nandɨsat.

²⁴Butjap sigɨn nandaŋ yomɨŋek yo yokwisi aŋ yobi. Aŋek butjapgo da aban pasɨl mudoni.

²⁵Kokup ekwaŋ uŋun ɨsal tosak. Ae ɨmal yutnikon amɨn kɨnda dɨma egɨpjak dosi nandɨsat.

²⁶Amɨn dɨwarɨ yokwini dakon kobogɨ yomgul, amɨn yokwi da yokwi aŋ yom do pi sigɨn aŋ. Gak da amɨn dɨwarɨ dakon gɨptɨm paŋdagaŋek gɨptɨm tedep yomgul, amɨn yokwi da jɨgɨlak gen yaŋ yomɨŋek jɨgɨ yomaŋ.

²⁷Amɨn yokwi dakon yokwini do dɨma ɨŋtaŋ yobi. Uŋun amɨn dɨmasi paŋpulugoki.

²⁸Gak da egɨp egɨp papiakon mani wɨrɨrɨkgi. Ae amɨn kɨlegɨ dakon man gat kɨsi mani dɨma mandaki dosi nandɨsat.

²⁹Nak jɨgɨ tepmɨyo madepsi pasat. Piŋkop, gak da nak yokwikon naŋ abɨdaŋek nak aŋmɨlɨp abi.

³⁰Yaŋ aŋaki nak kap yaŋek Piŋkop dakon man awɨgɨkdɨsat. Aŋek ya yaŋ iyɨŋek man madepni do yaŋ teŋteŋok abeŋ.

³¹Aŋapbo Yawe da aŋpak uŋun abeŋ do but dasi galak taŋ kɨmotjak. Bulmakau baŋ paret abeŋ uŋun do madepsi dɨma galak tosok.

³²Nak Piŋkop aŋkɨsikeŋ bɨsapmon mɨŋat amɨnyo jɨgɨ paŋ da uŋun kaŋek kɨsɨk kɨsɨk akdaŋ. Ae mɨŋat amɨnyo Piŋkop wɨsɨŋ kok do pi aŋ amɨn uŋun Piŋkop da butni paŋteban akdɨsak.

³³Yawe da yo do wadak wadak aŋ amɨn dakon bɨsitni nandaŋ yomɨsak. Mɨŋat amɨni dam tebanon ekwaŋ uŋun do dɨma ɨŋtaŋ yomɨsak.

³⁴Kundu gat ae mɨktɨm, ae tap ɨdap gat ae tap kɨlap ae yo morap tap kagagwan ekwaŋ, ji kɨsi morap Piŋkop dakon man awɨgɨni.