Kap 68:1-13

¹Dewit dakon kap kɨnda. Kap on Piŋkop gawak ɨmɨm kap. Kap yoŋ amɨn dakon kɨla amɨn do mandabi. Piŋkop da tepmɨsi abɨŋek uwalni yoljak. Piŋkop do uwal aŋ amɨn pasalek kɨŋ mudoni dosi nandɨsat.

²Mɨrɨm da mukwa pɨsoŋba kɨŋ pasɨlgaŋ, yaŋ gɨn Piŋkop da uwal yoldɨsak. Kɨndap tedep da kendol pɨndakban pakbi dagoŋ, yaŋ gɨn amɨn yokwi Piŋkop da ɨŋamon tasɨk tokdaŋ.

³Mani amɨn kɨlegɨ kɨsɨk kɨsɨk akdaŋ. Aŋek Piŋkop da dabɨlon butni tagɨsi aŋek kɨsɨk kɨsɨk madepsi akdaŋ.

⁴Piŋkop aŋkɨsineŋ. Man madepni do nandaŋek aŋkɨsiŋek kap yoneŋsi. Uŋun gɨkwemon yɨgek kɨsak. Mani uŋun Yawe. Nin iyɨ da dabɨlon kɨsɨk kɨsɨk aneŋ.

⁵Piŋkop iyɨ da telagɨ kokupmon egek mɨŋat monjɨyo datni kɨmakgwit uŋun kɨlani asak, ae sakwabatyo kɨsi kɨlani asak.

⁶Ae mɨŋat amɨnyo dage dage aŋek ekwaŋ uŋun dɨwatni paŋalon aŋyoban tagɨsi yɨkgaŋ. Ae dam tebanon ekwaŋ amɨn pulugaŋban kokupmon tagɨsi ekwaŋ. Mani kwen wugɨk aŋ amɨn mɨktɨm kɨbɨrɨ tɨm yokwisikon paŋkɨ egɨpdaŋ.

⁷Piŋkop, kalɨp gak mɨŋat amɨnyogo mibɨltaŋ yomɨŋek mɨktɨm amɨn da arɨpmɨ dɨma egɨpmɨ tɨmon tɨmɨk pawɨlgɨl.

⁸Uŋun bɨsapmon Sinai dakon Piŋkop abɨŋakwan mɨktɨm wudɨp agɨt. Asi, Israel dakon Piŋkop abɨŋakwan sɨkak madepsi magɨt.

⁹Piŋkop, gak da sɨkak madepsi yɨpbɨ mɨktɨmgokon magɨt. Aŋaki mɨktɨm yokwi da mɨktɨm tagɨsi ae dagagɨt.

¹⁰Uŋun mɨktɨmon mɨŋat amɨn kabɨgo da kokup wasawit. Gak yogo morapmɨsi uŋun baŋ wadak wadak amɨn paŋpulugaŋaki tagɨsi egɨpgwit.

¹¹Amɨn Tagɨ da mɨŋat amɨni do gen yomgut, aban mɨŋat morapmɨ da kɨŋ gen uŋun yaŋ teŋteŋawit.

¹²Gen uŋun yaŋ, Uwal dakon kɨla amɨn madep gat ae emat amɨn morapni gat kɨsi pasal kwaŋ. Aŋakwa mɨŋat kokupmon ekwaŋ da amɨn emaron yo tɨmɨkgaŋ uŋun kokwin aŋ.

¹³Mɨŋat uŋun sipsip kɨla aŋ, mani silwa gat gol gat baŋ gɨptɨmni tagɨsisi paŋtɨlɨm aŋek mɨnam dakon tɨlɨmɨ yombem dagoŋ.