Kap 60:1-5

¹Dewit dakon kap kɨnda. On kap do “Miktam” yaŋ yoŋ. On kap da niyɨŋdet kɨnda asak. Dewit da Siria amɨn Mesopotemia mɨktɨmon nani gat emat wamgwit bɨsapmon mɨktɨm Soba gat Joap gat dakon amɨn da tobɨl abɨŋek Idom amɨn 12 tausen mɨktɨm kɨnda mani Galegɨ Tapmɨ Morapmɨ uŋudon dapgwit. Uŋun bɨsapmon Dewit da kap on mandagɨt. Kap yoŋ amɨn dakon kɨla amɨn da mɨŋat amɨnyo yoyɨŋban “Saŋbek saŋbek dakon jareŋ tagɨsi” uŋun tegon da yoni. Piŋkop, gak da manji nimgul. Ninon yaŋ abɨ emaron magɨmaŋ. Nin do butjap nandagɨl, mani abɨsok aego tobɨl abɨŋek nin paŋpulugoki.

²Gak da abɨ mɨktɨmnin wudɨp agɨt. Mɨktɨm pudaŋbɨ gapma madep kɨnda noman tagɨt. Abɨsok mɨktɨmnin obɨsi tasɨk tosok. Aego aŋmɨlɨp abi.

³Mɨŋat amɨn kabɨgo nin do jɨgɨ morapmɨ nimgul. Uŋun wain baŋ yaŋ nibɨ naŋ mudaŋek but upbal obɨsi agɨmaŋ.

⁴Mani gak da tɨlak kɨnda aŋenakgɨl. Do amɨn gak do pasolgoŋ uŋun tɨlagon kɨŋ altaŋek tagɨsi egakwa uwal da arɨpmɨ dɨma dapni.

⁵Gak da nin but dasi galak taŋ nimɨsal, do bɨsitnin nandaŋ nibi. Aŋek tapmɨm madepgokon da nin yokwikon baŋ tɨmɨgaki nin tagɨsi egɨpneŋ.