Kap 55:2-15

²Bɨsitno pakyaŋsi tagɨsi nandaŋek gen kobogɨ nayɨki. Jɨgɨ uŋun da nak aŋupbal akdɨsak.

³Uwal da nak aŋupbal ak do gen tebai yɨpmaŋ. Amɨn yokwi uŋun da nak abɨŋ nepmaŋgaŋ, do butnokon da yokwisi nandɨsat. Uŋun da jɨgɨ morapmɨ namɨŋek butjap madepsi nandaŋek uwal madepsi aŋ namaŋ.

⁴Nak madepsi pasoldot, aŋek kɨmot do nandɨsat. Aŋek uŋun da aban butno madepsi jɨk tosok.

⁵Asi, nak madepsi pasoldot, aŋek gɨptɨmno madepsi nɨmnɨmɨkdak. Pasol pasol da obɨsi abɨŋ nepmaŋdak.

⁶Do yaŋ yosot, “Bupmɨsi, nak kɨnarɨm da yaŋ pɨtno toŋ ak do nandɨsat. Aŋek pɨrɨropmaŋ kɨŋ yɨk yawot tamo kɨnda wusɨŋ kaŋ uŋudon yɨkgeŋ.

⁷Nak pɨrɨropmaŋ dubagɨsi kɨndakon kɨŋ mɨktɨm amɨn dɨma ekwaŋon egɨpbeŋ.

⁸Tepmɨsi kɨŋek yoŋgamno kɨnda aŋalon aŋek mɨrɨm ae sɨkakyo madepsi da dubagɨkon tagɨ egɨpbeŋ.”

⁹Nak pɨndakgo kokup papgwan pɨdok aŋek emat aŋ, do Amɨn Tagɨ, gak da geni paŋɨŋtok abi.

¹⁰Uŋun gɨldarɨ ae kalbi kokup pap dakon tɨp dam da kwenon akwaŋ. Kokup pap dakon mɨŋat amɨnyo gulusuŋ morapmɨ gat ae yokwi morapmɨ aŋ.

¹¹Kokup pap dukwan dukwan amɨn da amɨn dɨwarɨ gat ae yo morap gat paŋupbal aŋ. Kosit ɨleŋon notni pabɨŋ yopmaŋek yoni gwayek do paŋkewalgaŋ.

¹²Uwal kɨnda da nabɨpjak kaŋ, uŋun jɨgɨ tagɨ pakeŋ. Uwal da nɨt do asak kaŋ tagɨ pasɨlgeŋ.

¹³Mani dɨma. Gak kaloŋgɨn. Gak notnosi, egɨp egɨpnit kaloŋɨ. Aŋpak yokwi uŋun gak da gaga asal.

¹⁴Nit kalɨp but kaloŋon da Piŋkop da yutnon amɨn dɨwarɨ gat kɨsi kɨgɨmaŋ.

¹⁵Aŋpak yokwi da butnikon tugawit, do uwalno but pɨsoni mɨni tepmɨsi kɨmotni do nandɨsat. Kalugɨ sigɨn egek kɨmakbi kokupmon kɨnisi.