Kap 51:5-18

⁵Asisi, yokwi gat kɨsi altagɨm. Meŋ da butgwan wasaŋek yɨkgɨm bɨsapmon yokwi gat kɨsi yɨkgɨm.

⁶Asi, nin butninon da topmɨ mɨni egɨpneŋ do nandɨsal. Do gak da nandaŋ kokwingo tagɨsi butnokon nayɨŋ dekgi do nandɨsat.

⁷Yokwino wɨrɨrɨkbɨ kɨlegɨsi egɨpbeŋ do nandɨsat. Sugaŋ nepbɨ ais kwakwagɨsi uŋun da tɨlak kɨlegɨsi egɨpbeŋ.

⁸Butno aŋtagap abɨ aeno kɨsɨk kɨsɨgɨ toŋ egɨpbeŋ. Asi, wagɨlsi abɨŋ nepgul, mani aeno kɨsɨk kɨsɨk abeŋ do nandɨsat.

⁹Dɨwarɨno aego dɨma pɨndakgi. Yokwino kɨsi wɨrɨrɨk mudoki.

¹⁰Piŋkop, butno aŋkaluk abɨ kɨlegɨsi asak. Butno aŋkaluk abɨ gak naŋgɨn golbeŋ.

¹¹Nolbɨ gak da dubagɨkon dɨma egɨpbeŋ. Telagɨ Wupgo nagon egɨsak uŋun dɨmasi gwayeki.

¹²Kalɨp yokwikon naŋ aŋpulugaŋbɨ kɨsɨk kɨsɨk nandagɨm uŋun aego nabi. Aŋpulugaŋbɨ gak dakon gen guramɨkgeŋ.

¹³Aŋek yokwi pakpak amɨn aŋpakgo yoyɨŋ dekgo tobɨlek gagon opni.

¹⁴Piŋkop, Yokwikon Baŋ Tɨmɨt Tɨmɨt Amɨno, nak yokwi aŋapbo amɨn kɨnda kɨmakgɨt. Mani dɨwarɨno yɨpmaŋ nabi. Yaŋ aŋaki aŋpakgo kɨlegɨ do nandaŋek kɨsɨk kɨsɨk kap yokeŋ.

¹⁵Amɨn Tagɨ, gen dulumno aŋtagap abɨ mango aŋkɨsikeŋ.

¹⁶Gak bɨt kɨlapyo parek gabeŋ uŋun do dɨma galak tosol. Ae bɨt kɨlapyo gak do mukwa sok do dapmaŋ soko soŋ pasɨlni kaŋ, gak uŋunyo kɨsi do dɨma galak tosol.

¹⁷Piŋkop, nak naga do nandako pɨŋbisi asak uŋun da paret si galak tosol asak. Amɨn iyɨ do nandaba pɨŋakwa but tobɨl aŋ uŋun manji dɨma yomɨsal.

¹⁸Saion kokup pap amɨn do galak taŋek paŋpulugoki. Jerusalem kokup pap dakon dam madep aego abɨ atjak.