Kap 50:6-21

⁶Kwen Kokup da iyɨ yaŋ teŋteŋaŋek yaŋ yosok, “Piŋkop uŋun aŋpakni kɨlegɨsi. Uŋun iyɨ gen kokwin agak ami.”

⁷Piŋkop da yaŋ yosok, “Mɨŋat amɨn kabɨno mɨrak pani. Nak gen kɨnda dayɨkdɨsat. Israel amɨn nak da gen pikon depdɨsat. Nak Piŋkop egɨsat. Nak ji dakon Piŋkop.

⁸Ji da bɨt kɨlapyo parekgaŋ ae bɨt kɨlapyo bɨsapmɨ bɨsapmɨ nagon paŋabɨŋ soŋba soŋ mudoŋ nak uŋun do gen tebai dɨma dayɨsat.

⁹Nak bulmakau wɨli bo meme ji da nagalon baŋ tɨmɨt do dɨma nandɨsat.

¹⁰Joŋ kɨlap morap koron ekwaŋ gat ae bulmakau ɨleŋ tausenon ekwaŋ gat uŋun kɨsi nak dakon gɨn.

¹¹Kabapmon mɨnam morap ekwaŋ uŋun kɨsi nandaŋ yomɨŋ mudosot. Ae joŋ kaga yo monɨŋ morap ekwaŋ uŋun kɨsi nak dakon.

¹²Nak jap do abeŋ kaŋ, but pɨso dɨma dayɨkdɨsat. Mɨktɨm madep gat ae yo morap uŋungwan toŋ uŋun kɨsi nak dakon gɨn.

¹³Nak bulmakau dakon sabamni gat ae meme dakon yawi gat uŋun nosot yaŋ nandaŋ, ma? Uŋun dɨmasi.

¹⁴Ji nak do ya yaŋ nayɨni kaŋ, uŋun da mukwa sogok tagɨsi asak. But galak do yo morap Piŋkop Wɨkwisi nak do nam do yaŋ teban tok awit uŋun namni.

¹⁵Ji yaŋ aŋek jɨgɨ altaŋ damni bɨsapmon nak do yaŋ tɨdaŋba paŋpulugokdɨsat. Yaŋ aŋapbo man madep namni.”

¹⁶Mani Piŋkop da amɨn yokwi do yaŋ yosok, “Ji nido gen tebano ɨsaldogɨn gen kagakon da yoŋ? Ae nak dakon saŋbek saŋbekno dakon gen nido yoŋ?

¹⁷Ji nak da egɨp egɨpji paŋmɨlɨp abeŋ do kuragɨsi nandaŋ, aŋek bɨsapmɨ bɨsapmɨ nak dakon gen pabɨŋ yopmaŋgaŋ.

¹⁸Ji kabo noknok pɨndagek not aŋyomaŋ. Aŋek yumabi amɨn gat kɨsi akwaŋ.

¹⁹Ji gen yokwi gat ae top gen gat yoŋ.

²⁰Aŋek notji gen yaŋ yomaŋ. Dɨsi dakon meŋji dakon monjini yaŋba yokwi tok aŋ yomaŋ.

²¹Ji yaŋ aŋakwa nak gen kɨnda dɨma yagɨm. Do nak dɨsi yombem yaŋ nandaŋ namaŋ, mani dɨmasi. Abɨsok nak tebai dayɨŋek nomansi gen pikon depdɨsat.