Kap 45:2-7

²Gak amɨn tagɨsi. Amɨn gak yombem mɨni. Gengo uŋun tagɨsi gɨn. Do toktogɨsi Piŋkop da gak do yo tagɨsi aŋ gamdɨsak.

³Gak kɨla amɨn madep tapmɨmɨ toŋ. Gak tɨlɨmgo morapmɨ, ae man madepgo uŋun wukwisi. Gak emat agak sɨba kwengokon aŋteban aŋek emat do tagap toki.

⁴Gak kɨla amɨn madep mibɨltogɨ man madepgo toŋ. Oskon yɨgek emaron kɨŋek teban toki. Yaŋ aŋaki amɨn da gen bamɨ arɨpmɨ dɨma abɨŋ yɨpni. Ae amɨn da kosit kɨlegɨ naŋ yolek agɨpni do emat asal yaŋ nandani. Pi tapmɨmɨ toŋ aŋaki gandaŋek tamtam yokdaŋ.

⁵Gobɨŋgo uŋun kɨsɨgɨsi do uwalgo wamɨ gamikon obɨsi sugaŋ yomɨsak. Amɨn Ŋwakŋwarɨ Kabɨ pabɨŋ yopmaŋaki gak da kandap mibɨlgogwan ekwaŋ.

⁶Piŋkop, gak kɨla amɨn madep toktok teban egɨsal. Mɨŋat amɨngo kosit kɨlegɨkon da kɨla asal.

⁷Gak aŋpak kɨlegɨ do but dasi galak taŋek aŋpak yokwi do kuragɨsi nandɨsal. Yaŋ nandɨsal do Piŋkopgo da gak kɨsɨk kɨsɨk abi do bɨt nelak tagal gamgut. Notgo kɨnda yaŋ dɨma tagal ɨmgut.