Kap 44:1-14

¹Kap on do “Maskil” yaŋ yoŋ. Uŋun Kora amɨn kabɨ dakon. Kap on kap yoŋ dakon kɨla amɨn do mandabi. Piŋkop, babɨknin da kalɨp egɨpgwit bɨsapmon pi tapmɨmɨ toŋ agɨl uŋun dakon geni niyɨwit. Nin mɨrak yopmaŋek gen uŋun kɨlɨ nandagɨmaŋ.

²Gaga da tapmɨmon da amɨn ŋwakŋwarɨ mɨktɨmnikon egɨpgwit uŋun yolbɨ kɨwit. Aŋek uŋun mɨktɨm babɨknin do yomɨŋaki uŋudon tebai egɨpgwit. Gak da Amɨn Ŋwakŋwarɨ Kabɨ paŋupbal agɨl, mani babɨknin paŋpulugaŋaki tagɨsi egek madepsi ɨreŋ tawit.

³Babɨknin emat agak sɨbakon da mɨktɨm uŋun dɨma abɨdawit. Iyɨ dakon tapmɨmon da emaron dɨma teban tawit. Gak da but dasi galak taŋ yomgul do uŋun gat egek teŋteŋɨ yomgul. Gak da tapmɨmon gɨn emaron teban tawit.

⁴Gak Kɨla Amɨn Madepno ae Piŋkopno. Gak da yaŋaki Jekop dakon amɨn kabɨ da emaron teban toŋ.

⁵Gak da tapmɨmon gɨn uwalnin yolno kwaŋ. Gak da manon da uwalnin bamaŋ mɨsɨŋɨkgamaŋ.

⁶Obip da aŋpulugaŋban emaron teban tokeŋ yaŋ dɨma nandɨsat. Ae emat agak sɨbano da nak aŋpulugaŋban dɨma teban tokeŋ.

⁷Gak dagɨn paŋpulugaŋaki uwal da nin dɨma pabɨŋ nipgwit. Uŋun da nin do dɨma galak taŋ nimaŋ, mani gak da uŋun gat emat wamaŋek paŋmayak agɨl.

⁸Piŋkop, nin gɨldat kɨnda kaloŋ gak do man madep gamamaŋ. Bɨsap dagok dagogɨ mɨni mango aŋkɨsineŋ.

⁹Mani gak manji kɨlɨ nimgul, aŋek pabɨŋ nipmaŋek emat amɨnin gat kɨsi saŋbeŋek emaron dɨma kwaŋ.

¹⁰Yaŋ aŋaki uwal da paŋsopba pasal kɨŋapno yo kabɨnin kɨlɨ tɨmɨkgwit.

¹¹Gak da yum nindaŋaki nin sipsip si dapba kɨmorɨ yombem da ekwamaŋ. Aŋek gak da mɨktɨmninon baŋ nolbɨ dukwan dukwan kɨŋ Amɨn Ŋwakŋwarɨ Kabɨ da binapmon ekwamaŋ.

¹²Gak da yum pɨndagaki mɨŋat amɨn kabɨgo Amɨn Ŋwakŋwarɨ Kabɨ dakon oman monjɨ dagawit. Yumaŋ naŋek tomni pɨŋbisi gamgwit, moneŋni madepsi dɨma tɨmɨkgɨl.

¹³Gak da ninon yaŋ aŋaki, amɨn nin da kapmatjok ekwaŋ uŋun da yaŋsul aŋ nimaŋ. Mɨktɨm morap nin paŋgwasɨŋek taŋ aŋaŋ kwaŋ uŋun da yaŋsul madepsi aŋ nimɨŋek gen mayagɨsi yaŋ nimaŋ.

¹⁴Gak da amɨn kabɨ morap mɨktɨmɨ mɨktɨmɨ ekwaŋ uŋun paŋtagap aŋaki nin dakon man do mayak mayak gen yoŋ. Ninon yo noman taŋ uŋun do jɨkgo madepsi yanjaŋ nimaŋ.