Kap 42:4-8

⁴Bɨsap tagɨsi kalɨpmɨ do nandaŋek butno obɨsi yokwi tosok. Kalɨp nak amɨn morapmɨ Piŋkop da yutnon mibɨltaŋ yomɨŋek paŋkɨgɨm. Nin kɨŋek kɨsɨk kɨsɨk do yaŋ tɨdagɨmaŋ. Aŋek ya yaŋ yagɨmaŋ. Uŋudon gak gawak gam do muwuk mamno kɨgɨt.

⁵Nido but yokwi nandɨsat? Nido butno jɨk tosok? Nak Piŋkop do nandaŋ gadaŋek uŋun da yokwikon baŋ kukwaŋ nepjak do jomjom abeŋ. Uŋun Piŋkopno, do aeno mani yaŋ aŋkɨsikeŋ.

⁶Butno madepsi jɨk tosok, do nak gak do nandɨsat. Nak Jodan Pakbi tet do ae Ɨleŋ Emon ae Ɨleŋ Misa uŋudon egek aeno nandaŋ gamɨsat.

⁷Tap da tagaŋ wɨŋek ɨleŋon mɨktɨm wɨtjisak ae pakbi tek maŋakwa wɨwɨk madep asak, uŋudeŋ gɨn jɨgɨ morapmɨ da wɨtjɨŋ namɨŋakwa yokwisi nandɨsat.

⁸Yawe da gɨldaron but dasi galak taŋ namɨsak. Kalbi ya yaŋ iyɨk do kap yosot. Piŋkop egɨp egɨp namɨsak uŋun bɨsit iyɨsat.