Kap 38:7-18

⁷Gɨptɨmno tedepmɨsi kɨndap da yaŋ soŋ namɨŋakwan sot madepsi asat.

⁸Yo kɨnda da tebaisi bamaŋ namɨsak uŋun da tɨlak nak obɨsi tasɨk taŋek yokwisi egɨsat. Butnokon da yokwisi nandaŋek tepmɨ madepsi nandɨsat do iyoŋ iyoŋ yosot.

⁹Amɨn Tagɨ, gak da nak dakon galaktok teban nandɨsal. Butno da kunam yokwisi takdak, uŋun gak da dabɨlon pasɨlɨ dɨma.

¹⁰Wamno gami pi tebaisi aŋakwan tapmɨmno mɨnisi asak. Dabɨlno pɨlɨn taŋakwan tagɨ dɨma sɨŋtosot.

¹¹Notnoni gat ae gen kaloŋno gat nak da kapmatjok ap do dɨma galak toŋ, nido wudano yokwisi. Gwakno kɨsi dubagɨkon ekwaŋ.

¹²Nɨkba kɨmokgeŋ do nandaŋ amɨn uŋun nak abɨdok do pat yɨpmaŋ. Amɨn nak aŋtasɨk ak do nandaŋ amɨn yo yokwi aŋ nam do gen yoŋ. Bɨsapmɨ bɨsapmɨ yokwi aŋ nam do gen yaŋ paŋteban aŋ.

¹³Mani amɨn mɨrakni mɨni yombem geni dɨma nandaŋ yomɨsat. Nak kadɨm yombem, do aŋtaŋ yok kɨnda dɨma asat.

¹⁴Nak amɨn kɨnda gen arɨpmɨ dɨma nandagɨ, ae kobogɨ arɨpmɨ dɨma yogogɨ yombem.

¹⁵Mani Yawe, nak gak do jomjom asat. Amɨn Tagɨ, gak Piŋkopno, do gaga geno dakon kobogɨ aŋtobɨlbi.

¹⁶Nak bɨsit yaŋ asat, “Yum pɨndagaki sagalek nɨkban uwal da but kwaktok dɨma nandani.”

¹⁷Nido, nak kɨlɨ uŋunjok mokdɨsat. Ae tepmɨ toktogɨsi pasat.

¹⁸Nak gulusuŋno gagon yaŋ teŋteŋosot, aŋek yokwi agɨm do bupmɨsi nandɨsat.