Kap 37:12-25

¹²Amɨn yokwi amɨn kɨlegɨ paŋupbal ak do nandak nandak asak. Aŋek nandaban yokwi tok aŋ yomɨŋek mam naŋ yomɨsak.

¹³Mani Amɨn Tagɨ da nandɨsak, bɨsap kɨnda noman tokdɨsak, uŋun bɨsapmon amɨn yokwi pasɨl mudokdaŋ, do Yawe da jɨkgo yanjaŋ yomɨsak.

¹⁴Amɨn yokwi uŋun yoni mɨni amɨn gat ae wadak wadak aŋ amɨn yam do emat agak sɨbani yɨknikon baŋ ɨlɨkgaŋ, ae obip paŋɨlɨkgaŋ. Uŋun aŋpak kɨlegɨ yolgaŋ amɨn dapba kɨmot do aŋ.

¹⁵Mani emat agak sɨba da iyɨ baŋ wamɨkon sugokdaŋ. Aŋakwa obipni si jokgal kɨkdaŋ.

¹⁶Amɨn kɨlegɨ dakon yoni kaloŋɨsok uŋun da amɨn yokwi dakon yoni morapmɨ yapmaŋ mudosok.

¹⁷Nido, Yawe da amɨn yokwi dakon tapmɨm pabɨŋ yopmaŋek amɨn kɨlegɨ kɨlani tagɨsi akdɨsak.

¹⁸Yawe da gulusuŋni mɨni amɨn uŋun kɨlani tagɨsi asak. Ae yo tagɨsi yomɨsak uŋun toktogɨsi tɨmɨk wugɨkdaŋ.

¹⁹Bɨsap yokwikon jɨgɨ dɨma pakdaŋ. Ae amɨn dɨwarɨ jap do ani bɨsapmon amɨn kɨlegɨ japni morapmɨ taŋ yomdaŋ.

²⁰Mani amɨn yokwi tasɨk taŋ mudokdaŋ. Jareŋ gat joŋ gat da pasɨlgaŋ, uŋun da tɨlak Yawe dakon uwalni pasɨldaŋ. Asisi, mukwa da bɨsap pɨsɨpmɨsok taŋek pasɨlgaŋ, uŋun da tɨlak pasɨldaŋ.

²¹Amɨn yokwi yo do goman aŋek sop do dɨma nandɨsak. Mani amɨn kɨlegɨ amɨn dɨwarɨ do yo morapmɨ yomɨsak.

²²Mɨŋat amɨnyo Yawe da gɨsamɨkdak, uŋun mɨktɨmni tɨmɨgek tagɨsi egɨpdaŋ. Mani mɨŋat amɨnyo jobɨt tɨmɨtni do yagɨt uŋun wagɨl tasɨk taŋ mudokdaŋ.

²³Yawe da amɨn kɨnda do but dasi galak taŋ ɨmɨsak kaŋ, uŋun amɨn aŋteban aŋakwan kosit kɨlegɨsi agɨsak.

²⁴Uŋun amɨn mosak kaŋ, wagɨlsi dɨma yokwi tosak. Yawe da kɨsitnikon abɨdaŋek aŋpulugaŋban aeni pɨdaŋ akdak.

²⁵Kalɨp nak monjɨ bulagɨ, ae abɨsok nak amɨn pelaŋ kɨlɨ at. Mani Piŋkop da amɨn kɨlegɨ kɨnda manji dɨma ɨban kagɨm. Ae amɨn kɨlegɨ dakon monjɨ gwayoni jap do wadak wadak aŋek amɨn da paŋpulugoni do dɨma yaŋ tɨdaŋba pɨndakgɨm.