Text copied!
CopyCompare
PIŊKOP GEN - Kap - Kap 37

Kap 37:10-40

Help us?
Click on verse(s) to share them!
10Bɨsap dubak dɨma amɨn yokwi wagɨl tasɨk taŋ mudokdaŋ. Uŋun wusɨŋ pɨndat do pi abi, mani dɨma pɨndatdɨsal.
11Mani mɨŋat amɨnyo aŋpakni yaworɨ, uŋun Piŋkop da mɨktɨm morap kɨsi yomdɨsak. Uŋun yɨyɨt wagɨl tagɨsi aŋek kɨsɨk kɨsɨk egɨpdaŋ.
12Amɨn yokwi amɨn kɨlegɨ paŋupbal ak do nandak nandak asak. Aŋek nandaban yokwi tok aŋ yomɨŋek mam naŋ yomɨsak.
13Mani Amɨn Tagɨ da nandɨsak, bɨsap kɨnda noman tokdɨsak, uŋun bɨsapmon amɨn yokwi pasɨl mudokdaŋ, do Yawe da jɨkgo yanjaŋ yomɨsak.
14Amɨn yokwi uŋun yoni mɨni amɨn gat ae wadak wadak aŋ amɨn yam do emat agak sɨbani yɨknikon baŋ ɨlɨkgaŋ, ae obip paŋɨlɨkgaŋ. Uŋun aŋpak kɨlegɨ yolgaŋ amɨn dapba kɨmot do aŋ.
15Mani emat agak sɨba da iyɨ baŋ wamɨkon sugokdaŋ. Aŋakwa obipni si jokgal kɨkdaŋ.
16Amɨn kɨlegɨ dakon yoni kaloŋɨsok uŋun da amɨn yokwi dakon yoni morapmɨ yapmaŋ mudosok.
17Nido, Yawe da amɨn yokwi dakon tapmɨm pabɨŋ yopmaŋek amɨn kɨlegɨ kɨlani tagɨsi akdɨsak.
18Yawe da gulusuŋni mɨni amɨn uŋun kɨlani tagɨsi asak. Ae yo tagɨsi yomɨsak uŋun toktogɨsi tɨmɨk wugɨkdaŋ.
19Bɨsap yokwikon jɨgɨ dɨma pakdaŋ. Ae amɨn dɨwarɨ jap do ani bɨsapmon amɨn kɨlegɨ japni morapmɨ taŋ yomdaŋ.
20Mani amɨn yokwi tasɨk taŋ mudokdaŋ. Jareŋ gat joŋ gat da pasɨlgaŋ, uŋun da tɨlak Yawe dakon uwalni pasɨldaŋ. Asisi, mukwa da bɨsap pɨsɨpmɨsok taŋek pasɨlgaŋ, uŋun da tɨlak pasɨldaŋ.
21Amɨn yokwi yo do goman aŋek sop do dɨma nandɨsak. Mani amɨn kɨlegɨ amɨn dɨwarɨ do yo morapmɨ yomɨsak.
22Mɨŋat amɨnyo Yawe da gɨsamɨkdak, uŋun mɨktɨmni tɨmɨgek tagɨsi egɨpdaŋ. Mani mɨŋat amɨnyo jobɨt tɨmɨtni do yagɨt uŋun wagɨl tasɨk taŋ mudokdaŋ.
23Yawe da amɨn kɨnda do but dasi galak taŋ ɨmɨsak kaŋ, uŋun amɨn aŋteban aŋakwan kosit kɨlegɨsi agɨsak.
24Uŋun amɨn mosak kaŋ, wagɨlsi dɨma yokwi tosak. Yawe da kɨsitnikon abɨdaŋek aŋpulugaŋban aeni pɨdaŋ akdak.
25Kalɨp nak monjɨ bulagɨ, ae abɨsok nak amɨn pelaŋ kɨlɨ at. Mani Piŋkop da amɨn kɨlegɨ kɨnda manji dɨma ɨban kagɨm. Ae amɨn kɨlegɨ dakon monjɨ gwayoni jap do wadak wadak aŋek amɨn da paŋpulugoni do dɨma yaŋ tɨdaŋba pɨndakgɨm.
26Bɨsapmɨ bɨsapmɨ amɨn kɨlegɨ da amɨn dɨwarɨ do yo morapmɨ yomaŋ. Ae monjɨ gwayoni da meŋ datni kɨsɨk kɨsɨk yomaŋ.
27Gak aŋpak yokwi morap do manji yomɨŋek aŋpak tagɨ baŋgɨn abi. Yaŋ abi kaŋ, dagok dagogɨ mɨni mɨktɨmon tagɨsi egɨpdɨsal.
28Nido Yawe gen kokwin kɨlegɨsi aŋ amɨn do but dasi galak taŋ yomɨsak. Mɨŋat amɨn kabɨni geni guramɨkgaŋ uŋun manji dɨma yomdɨsak. Dagok dagogɨ mɨni Yawe da kosit kɨlegɨ akwaŋ amɨn kɨlani asak, mani amɨn yokwi dakon gwakni uŋun tasɨk tokdaŋ.
29Amɨn kɨlegɨ Piŋkop da mɨktɨm yomgut uŋun abɨdaŋek uŋudon toktogɨsi egɨ wugɨkdaŋ.
30Amɨn kɨlegɨ uŋun nandaŋ kokwin kɨlegɨsi aŋek gen yosok. Uŋun gen kokwin kɨlegɨ aŋek gen yosok.
31Piŋkop dakon nawa gen butnikon tosok, ae kositni kɨlegɨ uŋun dɨma yɨpmaŋ degek sagalek dɨma aŋakdak.
32Amɨn yokwi amɨn kɨlegɨ aŋakban kɨmotjak do yubɨŋ egɨsak.
33Mani Yawe da amɨn kɨlegɨ yɨpmaŋ dekban amɨn yokwi da arɨpmɨ dɨma aŋakban kɨmotjak. Ae amɨn yokwi da amɨn kɨlegɨ gen pikon yɨpjak kaŋ, Yawe da yum kaŋakwan gen pikon arɨpmɨ dɨma abɨŋ yɨpjak.
34Yawe da gak aŋpulugosak do jomjom aŋek aŋpakni yolgi. Yaŋ abi kaŋ, man madep gamɨŋakwan mɨktɨm uŋun gamgut uŋun abɨdokdɨsal. Aŋek kaŋaki amɨn yokwi paŋupbal akdɨsak.
35Nak amɨn yokwi tapmɨmni madepsi kɨnda kagɨm. Sida kɨndap da kɨndap dɨwarɨ yapmaŋ mudosok, uŋun da tɨlak mɨŋat amɨnyo yapmaŋ mudagɨt.
36Mani don uŋudon kɨŋek mɨni kagɨm. Nak uŋun amɨn wusɨk do pi agɨm, mani dɨma kagɨm.
37Amɨn kɨlegɨ, ae gulusuŋni mɨni, ae amɨn dɨwarɨ gat yaworɨsi ekwaŋ amɨn do nandaki. Uŋun amɨn dakon dɨwatni tagɨsi egɨpdaŋ.
38Mani Yawe da yokwi pakpak obɨsi paŋupbal akdɨsak. Uŋun dakon dɨwatni wagɨl tasɨk taŋ mudokdaŋ.
39Yawe da amɨn kɨlegɨ yokwikon baŋ tɨmɨkdak. Jɨgɨ altaŋ yomaŋ bɨsapmon dam tebani arɨpmɨ dɨma tuwɨlɨ egɨ yomɨsak.
40Paŋkutnosak do Yawekon kwaŋ, do amɨn yokwi da kɨsiron baŋ tɨmɨgakwan tagɨsi ekwaŋ.

Read Kap 37Kap 37
Compare Kap 37:10-40Kap 37:10-40