Kap 35:1-14

¹Dewit dakon kap kɨnda. Yawe, kosit sopmaŋ namaŋ amɨn dakon kositni sopmaŋ yobi. Ae amɨn nak gat emat amaŋ amɨn, gak uŋun gat emat ani.

²Emat dakon yɨk ɨmalyo gat ae pasɨk gat tɨmɨgek abɨŋ nak aŋpulugoki.

³Dɨkdɨk gat ae gwawiya gat tɨmɨgek nak aŋ sopmaŋgaŋ amɨnon emat abi. “Nak yokwikon baŋ tɨmɨt tɨmɨt amɨngo!” yaŋ nayɨki.

⁴Uŋun amɨn da nɨkba kɨmokgeŋ do nolgaŋ. Pabɨŋ yopmaŋaki mayaktok pani. Uŋun da nak aŋupbal ak do gen yaŋ paŋteban aŋ. Yopbɨ tobɨl kɨŋakwa paŋɨŋtok abi dosi nandɨsat.

⁵Yawe, mɨrɨm da wit dakon gɨpmɨ wɨrɨrɨk paŋgwaŋ, uŋun da tɨlak aŋelogo da amɨn yokwi uŋun wɨrɨrɨtjak dosi nandɨsat.

⁶Aŋelogo da yolban kɨŋakwa kositni aban pɨlɨn tuk ae sagalegɨyo ani dosi nandɨsat.

⁷Nak da yokwi kɨnda dɨma aŋ yomgum, mani nak abɨdok do pat yɨpgwit, ae nak da mokeŋ do gapma kɨnda wayɨkgwit.

⁸Yaŋ awit, do dɨma nandaŋakwa gak da yum pɨndagaki yokwi da tɨmɨtjak, ae pat yɨpgwiron iyɨ yokwalni, ae gapma uŋun wayɨkgwiron iyɨ uŋudon moni.

⁹Yawe da yaŋ aŋakwan but galak nandaŋ ɨmdɨsat. Nak aŋpulugokdɨsak do tagɨsi nandaŋ ɨmdɨsat.

¹⁰Butnokon da yaŋ iyɨkeŋ, “Yawe, gak yombem kɨnda mɨni. Gak da tapmɨmni mɨni amɨn uŋun tagɨsi paŋpulugaŋaki amɨn tapmɨmni toŋ da dɨma paŋupbal aŋ. Gak da bupmɨ amɨn wadak wadak aŋ uŋun paŋpulugaŋaki kabo noknok da yoni dɨma tɨmɨkgaŋ.”

¹¹Top amɨn da aŋpak yokwi dɨ dɨma agɨmon gen yaŋ namaŋ.

¹²Nak aŋpak tagɨ baŋ aŋ yomɨŋapbo, uŋun da kobogɨ do aŋpak yokwi baŋ aŋ namaŋ. Do but yokwi nandɨsat.

¹³Mani sot awit bɨsapmon bupmɨ madepsi nandaŋ yomɨŋek bupmɨ dakon ɨmal wamgum. Nak jap kelek egek gak da paŋpulugoki do bɨsit agɨm.

¹⁴Uŋun notno bo ae padɨgɨno yombem kɨnda do bupmɨ nandagɨm. Nak amɨn kɨnda da meŋi kɨmagakwan bupmɨ ae kunamyokon da agɨsak uŋun yombem. But yokwi nandaŋek kunam ae bupmɨyo aŋek egɨpgum.