Kap 26:1-11

¹Dewit dakon kap kɨnda. Yawe, nak aŋpak kɨlegɨ gɨn aŋek gak dogɨn nandaŋ gadasat, do amɨn kɨlegɨ yaŋ nayɨki.

²Yawe, nak dakon but nandak nandakyo aŋkɨlɨgek koki.

³Nido nak do but dasi galak taŋ namɨsal uŋun bɨsapmɨ bɨsapmɨ nandɨsat. Aŋek bɨsapmɨ bɨsapmɨ gak dakon gen bamɨ yoldat.

⁴Nak top yoŋ amɨn gat dɨma yɨkgamaŋ. Ae jamba but amɨn gat dɨma akwamaŋ.

⁵Yokwi pakpak gat egɨp do dɨmasi nandɨsat. Ae uŋun gat yɨt do dɨmasi galak tosot.

⁶Yawe, nak dɨwarɨno mɨni yaŋ nandaki do kɨsitno pakbi naŋ sugosot. Nak gak dakon alta aŋgwasɨŋek

⁷gen papmon da gak aŋkɨsiŋek pi tagɨsisi asal uŋun do amɨn yoyɨsat.

⁸Yawe, gak dakon yut do but dasi galak tosot. Gak dakon tɨlɨmgo uŋudon tosok.

⁹Gak yokwi pakpak amɨn dapbɨ kɨmotni bɨsapmon dɨma nɨkbɨ kɨmokgeŋ. Amɨn dapdap amɨn dapmaŋek nakyo kɨsi dɨma nɨkgi.

¹⁰Uŋun amɨn yo yokwi ak do gen paŋkosit aŋ. Ae amɨn da notni yo yokwi aŋyomni do amɨn do tomni yomaŋ.

¹¹Mani nak aŋpak kɨlegɨ gɨn asat. Bupmɨ nandaŋ namɨŋek yokwikon baŋ pulugaŋ nepbi.