Kap 22:12-30

¹²Uwalno uŋun bulmakau wɨli da yaŋ aŋgwasaŋ. Uŋun tapmɨmni madepsi, Basan mɨktɨm dakon bulmakau wɨli yombem.

¹³Laion da joŋ kɨlap nok do yaŋ tɨdaŋek gen kagani aŋtaŋ kwaŋ, uŋudeŋ uwalno da nak aŋupbal ak do aŋ.

¹⁴Pakbi ɨsal dogɨn tagal kɨ mudoŋ, uŋun da tɨlak tapmɨmno mɨnisi aŋ. Kɨdatno dakon saŋbekni kɨsi kalkalaŋ mudoŋ. Bɨt nelak da pakbi dagoŋ uŋun da tɨlak butno wagɨlsi tapmɨmɨ mɨni pakbi ɨdap asak.

¹⁵Tapmɨmno mɨni aŋakwan melno tɨptaŋ gen kaganogwan tegosok. Gak da nepbɨ kɨmot da tamokon pokdot.

¹⁶Amɨn yokwi da nak pɨŋan da yaŋ aŋgwasaŋ. Aŋek kɨsit kandapyo nokon ɨnjɨŋba geni da gɨptɨmnogwan pɨgeŋ.

¹⁷Kɨdatno kɨsi noman taŋakwa tagɨ manjɨkeŋ. Uŋun da nak da yokwi tat uŋun kaŋek kɨsɨk kɨsɨk aŋ.

¹⁸Ɨmalno kokwinɨk tɨmɨgek paba pɨgɨkno namɨn da abɨdosak yaŋ do satu wasok aŋ.

¹⁹Yawe, nak nepmaŋek dubagɨkon dɨma egɨpbi. Paŋpulugokno, tepmɨ abɨŋ aŋpuluga.

²⁰Aŋpulugaŋbɨ emat agak sɨba baŋ dɨma nɨkba kɨmokgeŋ. Uŋun amɨn pɨŋan yombem da kɨsiron baŋ pulugaŋbɨ dɨma nɨkba kɨmokgeŋ.

²¹Laion da gen kaga ae joŋ bulmakau da jomon baŋ pulugaŋ nepbi.

²²Yaŋ aŋaki notno kabɨkon man madepgo yaŋ teŋteŋokeŋ. Ae mɨŋat amɨn kabɨyo da muwutnikon gak aŋkɨsikeŋ.

²³Yawe do pasal ɨmaŋ amɨn kabɨ, Yawe aŋkɨsini. Jekop dakon dɨwatni kabɨ, Yawe man madep ɨmni. Israel dakon dɨwatni kabɨ, Yawe gawak ɨmni.

²⁴Nido jɨgɨ madepsi paŋ amɨn manji dɨma yomɨsak. Tepmɨ jɨgɨyo paŋ amɨn uŋun do nandaban yo ɨsalɨ dɨma asak. Uŋun manji dɨma yomɨsak. Paŋpulugosak do yaŋ tɨdaŋba bɨsitni nandaŋ yomɨsak.

²⁵Amɨn madepsi Piŋkop gawak ɨm do muwutni bɨsapmon gak aŋkɨsikeŋ. Mɨŋat amɨnyo gak do pasolgoŋ uŋun da dabɨlon kalɨp gak do paret ak do yaŋ teban tagɨm uŋun akdɨsat.

²⁶Bupmɨ amɨn jap arɨpmɨsi naŋ tugokdaŋ. Ae Yawe wɨsɨŋ kokdo pi aŋ amɨn uŋun da mani aŋkɨsikdaŋ. Piŋkop da paŋpulugaŋban dagok dagogɨ mɨni butni tagɨsi taŋ aŋaŋ wɨgɨkdɨsak.

²⁷Amɨn mɨktɨmɨ mɨktɨmɨ ekwaŋ Yawe do nandaŋek tobɨl iyɨkon apdaŋ. Mɨktɨmɨ mɨktɨmɨ amɨn kabi kabi ekwaŋ uŋun da abɨŋek gawak ɨmdaŋ.

²⁸Nido Yawe kɨla amɨn madep egek mɨktɨmɨ mɨktɨmɨ amɨn morap kɨlani asak.

²⁹Mɨktɨmɨ mɨktɨmɨ kwen wɨgɨk amɨn morap da ŋwakbeŋ aŋ ɨmdaŋ. Mɨktɨm amɨn morap kɨmagek mɨktɨm dagokdaŋ uŋun kɨsi morap da abɨŋek Piŋkop gawak ɨmdaŋ.

³⁰Don altaŋ altaŋ ani amɨn da omani aŋɨmdaŋ. Amɨn da Amɨn Tagɨ do yaŋ teŋteŋok aŋakwa don altoni amɨn da nandaŋ aŋaŋ kɨkdaŋ.