Kap 147:4-19

⁴Uŋun da gɨk manjɨŋek gɨk kaloŋ kaloŋ do man yomɨsak.

⁵Amɨn Tagɨnin uŋun wukwisi madep, ae tapmɨmni madepsi. Nandak nandakni uŋun tɨlakni mɨni.

⁶Yawe da amɨn iyɨ do nandaba paŋ uŋun paŋpulugosok. Mani yokwi pakpak amɨn pabɨŋ yopban mɨktɨmon maŋ pokgoŋ.

⁷Yawe ya yaŋ iyɨŋek kap yaŋ ɨmno. Gita tɨdaŋek Piŋkopnin aŋkɨsino.

⁸Uŋun da gɨkwem kwen yopban sɨkak maŋakwa ɨleŋon joŋ kwoŋ.

⁹Uŋun da joŋ kɨlap do jap yomɨsak, ae mɨnam pɨdɨkyo kɨsi yaŋ tɨdaŋba jap yomɨsak.

¹⁰Yawe uŋun os dakon tapmɨm gat ae amɨn dakon tapmɨm gat do nandaban yo madep dɨma asak.

¹¹Mani, amɨn iyɨ do pasal ɨmaŋ ae Yawe da nin do but dasi bɨsapmɨ bɨsapmɨ galak taŋ nimɨsak yaŋsi nandaŋ gadaŋ amɨn uŋun do galak taŋ yomɨsak.

¹²Jerusalem amɨn ji Yawe aŋkɨsini. Saion amɨn ji Piŋkopji aŋkɨsini.

¹³Uŋun da kokup papji dakon wigat paŋteban aŋek amɨn kabɨgo gɨsam yomɨsak.

¹⁴Uŋun da paŋpulugaŋban emarɨ mɨni tagɨsi ekwaŋ. Ae wit tagɨsi dakon baŋ paŋɨreŋ aban naŋek butji tugoŋ.

¹⁵Gen kɨnda yɨpmaŋdak uŋun tepmɨsi mɨktɨmon pɨsak.

¹⁶Uŋun da ais yopban sipsip dakon daŋgwi da yaŋ maŋ mɨktɨm yalɨsak. Aŋek gɨk sɨtnaŋ yopban abɨlak da yaŋ maŋ tayɨŋɨkwaŋ.

¹⁷Ais madep yopban tɨp da yaŋ mɨktɨmon moŋ. Aŋek uŋun da aba kokup mɨrɨmɨsi aŋakwan amɨn kɨnda da mɨrɨm abɨŋ yɨpmɨ mɨni.

¹⁸Ae don gen yɨpban mɨrɨm aŋakwan ais pakbi dagaŋek pokgoŋ.

¹⁹Geni Jekop do ɨmgut. Nawa geni Israel amɨn do yomgut.