Kap 139:1-14

¹Dewit dakon kap kɨnda. Kap yoŋ amɨn dakon kɨla amɨn do mandabi. Yawe, gak butnokon yo ni da toŋ uŋun kokwin aŋek bamɨsi nandaŋ namɨsal.

²Gak nak da yɨk pɨdotyo asat uŋun nandaŋ mudosol. Dubagɨkon da nandak nandakno nandaŋ mudosol.

³Nak kosit agɨsat bo ae dɨpmɨn pokdoron niaŋ egɨsat uŋun gak da nandɨsal. Gak aŋpakno kɨsisi nandaŋ mudosol.

⁴Yawe, nak gen kɨnda yok do asat uŋun gak da kɨlɨ nandagɨl.

⁵Gak mibɨltok ae buŋonyo agaki kɨsitgo da nak abɨdosok.

⁶Nandak nandakgo da nandak nandakno yapmaŋek wukwisi asak. Uŋun nak da arɨpmɨ dɨma nandakeŋ.

⁷Nak dukwan kɨŋek Wupgo yɨpmaŋ dekgeŋ? Nak pasal dukwan kɨŋapbo gak kapmatjok dɨma egɨpdɨsal?

⁸Kwen Kokupmon wɨgɨkeŋ kaŋ, gak uŋudon egɨpdɨsal. Ae kɨmakbi tamogwan pɨgɨkeŋ kaŋ, uŋudon kɨsi egɨpdɨsal gɨn.

⁹Pɨdaŋ pɨrɨropmaŋ gɨldat wɨsak tetgɨn do dubagɨsi kɨkeŋ bo tap dɨwarɨsikon kɨkeŋ kaŋ,

¹⁰gak uŋudon egɨpdɨsal gɨn. Aŋek kɨsitgo da nak abɨdaŋek kosit nolɨkdɨsal. Tapmɨmgo madep, do nak aŋpulugokdɨsal.

¹¹Nak “Pɨlɨn tuk da nak aŋkɨsɨbɨsak, ae gɨldat dakon teŋteŋ nak aŋgwasisak uŋun da pɨlɨn tuk asak” yaŋ yokeŋ kaŋ

¹²pɨlɨn tuk da nak arɨpmɨ dɨma aŋkɨsɨbɨsak. Kalbi uŋun gɨldat kalba yombem akdɨsak. Pɨlɨn gat ae teŋteŋɨ gat kɨsi pɨndakbɨ arɨpsi amal.

¹³Gak da gɨptɨm dɨwat morapno kɨsi wasagɨl. Meŋ da butgwan nak uŋungwan wasaŋ mudagɨl.

¹⁴Nak da gak aŋkɨsisat, nido gak da pi ŋwakŋwarɨsi aŋek nak wasaŋ nepgul. Nak pakyaŋsi nandɨsat, gak da yo morap wasagɨl uŋun ŋwakŋwarɨsi.