Kalan Kunum 13:25-42

²⁵Yangei, em aluwbamin be mewso banimse ding dim bakate, e bokolomele: ‘Yu ibolow fukuneko, bokolomeliw: ‘Ne yom ding fen alakabiliw kunum Mesaya nete te!’, nangeko, ibolow fukunkabiliw sako? Kate yu kililina! Nemteben toloke kunum be auk so kitil so kamok fian keloke kasike, ne ki keko, elo dokoleweko, em yan aum sok e ne nam sileli te.’, yangse kale.

²⁶Kame, Abalakam em muluwel dow so, Isalel num ibik biliw kawtiw yuso, alik alik yu Sunbin-Got em wiin daolewkabiliw nakunum kumel yutaka! Nulo dokoyemomin beem dulum elo Sunbin-Got em Weng Kal Ken Ati be talse kate,

²⁷Selusalem abiw mutuk fian kasel so, ikalem kak yetebiliw kunum iso, alik alik i Yesus elo kilele atemeko, dolon kelinba kesiliw kasike, i elo ibolow wa keleweko, geelewsiliw te. Geelewsiliw kasike, im Sabat fingendakamin ding dim fut tem bakameliw weng be fein dem gilase kale. Nimtew angom? Sua kel akate, Sunbin-Got em bontem dim bakamin kunum i bokolomeliw: ‘I Mesaya elo aliwi, e kuanoke te!’, angsiliw kasike.

²⁸Feinka! I elo mongom banim so akate geeleweko, kak kunum Failat elo bokolewomeliw: ‘Elo alew kano, e kuanoka!’, dangsiliw te.

²⁹Dangesomi, elo ais dim sil bikiko, aliwi, e kuanse te. Kuanei, mali kunum mak em fom be debeleko, kawin tem dawkusiliw kate,

³⁰Sunbin-Got e elo fomkamin dim elo dawkalfolse te.

³¹Keko beli, ding banban ding mak kelei, mali Yesus eso Galili aneng koleweko, Selusalem abiw mutuk fian kawtem elo uneko, eso makuw kakameliw kunum waneng i elo iti kiin so atemeko, Suda kawtiw ilo bakayem tem bakayem tem unakabiliw te.

³²Feinka! Nu yulo Sunbin-Got em num awalik kumel ilo ‘Kaneloki te!’, yangse Weng Kal Ken Ati be bakayem talbuluw te.

³³Weng Kal Ken Ati be kanekote: Sunbin-Got em nukalem awalik kumel ilo ‘Kaneloki te!’, yangse weng be num dim fein dem so keko, dem gilase te. Nimtew angom? E Yesus elo fomkamin dim elote dawkalfolse kasike. Kanese be, auk teben sim Sim Fut tem beem weng be ki kelewkabe te. Weng be bokolomele: ‘Ku nakalem min te. Kame akate, ne kom kalew kebi te.’, angakabe te.

³⁴Yu kililina! Sunbin-Got e Yesus elo fomkamin dim elote dawkalfolse kasike, Yesus e fomkamin ka kel kiloninba kese te. Kate kame, e diwkuw diwkuw finik so be te. Sunbin-Got e beem dulum elo bokolomele: ‘Nem emisik kamok Debit elo dulewsi fein so, sen banim so, bamki be yulo akati duyemoki te.’, angse kale.

³⁵Angeko, Mesaya em dulum elo iti bokolomele: ‘Sunbin-Got e akalem wiin so amkose kunum elo nam fomkamin dim kabalak kel kolewei, e kilone te.’, angse kale.

³⁶Yu kilele kililina! Emisik kamok Debit em finik so bise ding dim bakate, e Sunbin-Got em weng kiliko, gelewemale kunum ete kale. Kate, e kuanei, i elo akalem awalik kumel im fomkamin tem mewso ka kel dawkuliwi, em fom be fein kilonse kale.

³⁷Kilonse kate, Sunbin-Got e Yesus elo fomkamin dim elo dawkalfolei, e kawin tem ka kel kiloninba kese te.

³⁸Nakunum kumel yutaka! Num bakayembuluw Weng Kal Ken Ati kale kilele kililoliwka! Moses em kukuyemse weng be yom ibolow sili sili nam beem sen e kilele banim keyeminba kese kate, Yesus e yom sili sili kukuw beelo sak misim kuw atin kuw kulu koyemeko, yulo fein dokoyemoke te.

³⁹Kasike, nimin kunum waneng ite mak kunum Yesus beelo ‘Fein!’, dangiw tewe, e ilo Sunbin-Got em kiin dim e, kiol kuw sen so banim kunum waneng keyemkabe te.

⁴⁰Yu kilelbiko, boliwka! Mesik esik Sunbin-Got em bontem dim bakamin kunum im yangenaliw weng be yom dim telemoke kasike! I bokolomeliw:

⁴¹‘Sunbin-Got elo weng minin kuw kelewkabiliw kawtiw yutaka! Yu kilelbiko, boliwka! Yom kakameliw ding dim kabalak e, ne auk so kitil so eisneng mak kaneloki te. Kaneloki kate, mali kawtiw mak yulo bokoyemomeliw: ‘Sunbin-Got e kitil so auk so be kanelewse kai!’, yangiw tewe, yu kiliko, yan weng bokoyemomeliw: ‘Babo! Dasuw weng bakayembiliw te!’, yangeko, kaneloki auk so kitil so eisneng be atemeko, yol angokoliw kate, yu atin kuw banimokoliw te.’, angsiliw te.”, yangse kale.

⁴²Yangesomelei, im wensanbiliw am be kolewsiliw ding dim bakate, aso iso kut elo unsiliw kunum waneng alik alik bi aso biilo bokoyemomeliw: “Kame Sabat finengadakamin ding dim banim kembe kasike, sowem finengdakamin ding Sabat keloke ding dim kabalak e, kaso yu iti teleko, nulo weng makso bakayemboliwka!”, yangsiliw kale. Yangesomi, mali Suda kunum waneng banban so, Isalael kawtiw im ibik biliw keko, Sunbin-Got em wiin daolewsiliw kawtiw iso, alik alik bi makuw Fol so, Balnabas so, aso ilo yenggelew unsiliw kale. Yenggelew uniwi, aso i kunum waneng biim fukunin be kitil keyemeko, bokoyemomeliw: “Sunbin-Got e yulo ibolow folok keyemeko, ken kuw kukuw kukuyemse kasike kame, e yulo diwkuw ibolow folok kukuw keyemkabe te. Yu kitil kuw keko, elo gelewemoliwka!”, yanganaliw kale.