Kʋkɑlʋɣʋ 2:2-10

²Pǝ wɛɛ sɩ pɑɑ Ɩsɛɣɛlɩ tʋ wei nɑ ɩ yoolɑɑ pɑ́ siki pɑ kpekǝle tuutɑ kiŋ, nɑ pɑ́ cɔɔnɑ Ɩsɔ cokǝle nɑ pǝ́ hɑtǝlǝnɑ-tɛɣɛ mɑɣɑnɑ.

³Yutɑ yoolɑɑ tintiɣile kɑ́ wɛɛnɑ ilim tǝlɩɩlɛ tɔɔ kɛ́ pɑ tuutɑ kite. Mpɑ pɑ mʋnɑ yoou pote tɔ, pɑ sɔsɔ ntɛ́ pɑ kpekǝle nyʋɣʋ tʋ Aminɑtɑpɩ pǝyɑlʋ Nɑsɔŋ. Nɑ ɩ yoolɑɑ kɛ iyisi nɩɩtoso nɑ nɑɑnʋwɑ nɑ liɣiti nɑ nɑsǝtoso (74600). Ɩsɑkɑɑ nyǝ́mɑ yoolɑɑ nyʋɣʋ tʋ ntɛ́ Suwɑɑ pǝyɑlʋ Netɑneyɛlɩ. Ɩ yoolɑɑ wɛ iyisi nɩɩlɛ nɑ nɑɑnʋwɑ nɑ liɣiti nɑ nɑsǝlɛ (54400). Sɑpulɔŋ nyǝ́mɑ yoolɑɑ tintiɣile nyʋɣʋ tʋ ntɛ́ Helɔŋ pǝyɑlʋ Ɩliyɑpɩ. Ɩ yoolɑɑ wɛ iyisi nɩɩlɛ nɑ nɑɑnʋwɑ nɑ nɑɑtosomopɔɣɔlɑɣɑ nɑ nɑsǝlɛ (57400).

⁹Yutɑ yoolɑɑ tintiɣile tǝnɑ kpɛntɑ iyisi nɩɩnʋwɑ nɑ nɩɩnɑɑsɑ nɑ nɑɑtoso nɑ nɑsǝlɛ (186400). Ɩsɛɣɛlɩ yoolɑɑ looŋɑ kɑncɑɑlɑɣɑ nyǝŋkɑ ntɛ́.

¹⁰Lupɛŋ nyǝ́mɑ yoolɑɑ tintiɣile kɑ́ wɛɛnɑ ilim mpǝtǝŋ tɔɔ kɛ́ pɑ tuutɑ kite. Mpɑ pɑ mʋnɑ yoou pote tɔ, pɑ sɔsɔ ntɛ́ pɑ kpekǝle nyʋɣʋ tʋ Setewu pǝyɑlʋ Ɩlisuu. Ɩ yoolɑɑ wɛ iyisi nɩɩlɛ nɑ nɑɑtoso nɑ nɑsǝlɛ nɑ nɩɩnʋwɑ (46500). Simiyɔŋ nyǝ́mɑ yoolɑɑ tintiɣile nyʋɣʋ tʋ ntɛ́ Sulisɑtɑɩ pǝyɑlʋ Selumǝyɛlɩ. Ɩ yoolɑɑ wɛ iyisi pɔɣɔlɑɣɑfɛɩ nɩɩtoso nɑ ŋmʋnʋɣʋ nɑ nɩɩnʋwɑ (59300). Kɑtɩ nyǝ́mɑ yoolɑɑ tintiɣile nyʋɣʋ tʋ ntɛ́ Teuwɛlɩ pǝyɑlʋ Ɩliyɑsɑfɩ. Ɩ yoolɑɑ wɛ iyisi nɩɩlɛ nɑ kɑkpɑsɩ nɑ nɑsǝtoso nɑ nɩɩlɛ nɑ nɑɑnʋwɑ (45650).