Kʋkɑlʋɣʋ 23:2-21

²Ɩlɛnɑ Pɑlɑkɩ lɑ mpʋ, nɑ pɑ nɑɑlɛ pɑ́ lɑɑ lɑtǝcɛ nɑ ɩwɑɑʋ kɛ pɑɑ lonte nte tǝ tɑɑ.

³Nɑ Pɑlɑɑm tɔ Pɑlɑkɩ sɩ: Sǝŋ tǝfɛɛnlɛ cǝnɛ nɑ mɑ́ hɑtǝlɩ. Ntɑnyɩ Tɑcɑɑ kɑ́ lɩɩ mɑ tɔɔ nɑ ɩ́ heeli-m nɑtǝlɩ nɑ mɑ tɛlǝsɩ-ŋ. Ɩlɛnɑ ɩ́ kpɑ tontoŋlɛ tɔɔ.

⁴Tǝnɑɣɑ Tɑcɑɑ lɩɩ ɩ tɔɔ, nɑ Pɑlɑɑm tɔ sɩ: Mɑ ŋmɑwɑ tǝfɛɛnlɛ kɛ tɔm nɑɑtosompɔɣɔlɑɣɑ, nɑ mɑ́ lɑɑ lɑtǝcɛ nɑ ɩwɑɑʋ kɛ pɑɑ tǝfɛɛnlɛ nte tǝ tɔɔ.

⁵Ɩlɛnɑ Tɑcɑɑ hʋlɩ Pɑlɑɑm kɛ tɔm nti ɩ kɑ yɔɣɔtɩ tɔ. Nɑ ɩ́ tɔmɩ-ɩ sɩ: Mǝlɩ Pɑlɑkɩ kiŋ.

⁶Ḿpʋ́ɣʋ́ ɩ mǝlɑ Pɑlɑkɩ nɑ ɩ wɑɑlɩ nyǝ́mɑ pɑ cɔlɔ nɑ pɑ́ sǝŋ tǝfɛɛnlɛ tǝnɑ.

⁷Kɑwǝyɑɣɑ ŋkɑ Pɑlɑɑm mɑpɑ tɔɣɔlɔ: Mowɑpʋ wulɑʋ Pɑlɑkɩ yɑɑnɑ-m ilim tǝlɩɩlɛ pɔɔŋ tɑɑ kɛ Silii, sɩ mɑ́ nyɑɑsɩ Ɩsɛɣɛlɩ nyǝ́mɑ. Nɑ mɑ́ tǝŋsɩ Yɑkɔpʋ lʋlʋɣʋ nyǝ́mɑ kɛ mpusi.

⁸Ɩlɛ ɩsǝnɑɣɑ mɑɑ tǝŋsɩ mpusi kɛ wei Tɑcɑɑ tɑ tǝŋsɩ mpusi tɔ? Yɑɑ ɩsǝnɑɣɑ mɑɑ nyɑɑsɩ yǝlɑɑ mpɑ ɩ tɑ nyɑɑsɩ tɔ?

⁹Pɔɔŋ tɔɔ kɛ́ mɑ wɛɛ, nɑ mɑ́ loosiɣi yǝlɑɑ mpɛ. Pulɑsɩ tɔɔ kɛ́ mɑ wɛɛ nɑ mɑ́ nyǝnǝɣɩ-wɛ. Pɑ fɑɣɑnɑ piitimnɑɑ lɛmpɑ kɛ, nɑ pɑ tǝcɑɣɑlɛ wɛnɑ tǝ mpɑɑ.

¹⁰Aweɣelɛ Ɩsɛɣɛlɩ sɑmɑɑ kɑllʋ? Yɑɑ ɩ cɛkǝnɑ ɩ lʋlʋɣʋ nyǝ́mɑ nyʋɣʋ? Mɑ sɔɔlɑ mɑ́ nɑ siɣisilɑɑ mpɛ tǝ́ kpɛntɩ sǝm kɛ́, nɑ pǝ́ lɑ-m ɩsɩɩ mpɛ.

¹¹Mpʋɣʋlɛ Pɑlɑkɩ pɔɔsɑ Pɑlɑɑm nɑ piti sɩ: Wetiɣilɛ n lɑpɑ-m mpʋ? Mɑ kɔnɑ-ŋ kɛ́ sɩ ń tǝŋsɩ mɑ kolontunɑɑ kɛ mpusi ɩlɛnɑ nyɑɑ mǝlɩ nɑ ń kooliɣi-wɛɣɛ kʋpɑntʋ nɑ?

¹²Ntɛnɑ Pɑlɑɑm cɔ sɩ: Tǝlɑsɩ kɛ́ sɩ mɑ yɔɣɔtɩ nti Tɑcɑɑ tʋ mɑ nɔɣɔ tɑɑ tɔ.

¹³Mpʋɣʋlɛ Pɑlɑkɩ tɔmɑ Pɑlɑɑm sɩ: Kɔɔ nɑ tǝ́ lɑɣɑsɩ timpi n kɑ́ nɑ́ Ɩsɛɣɛlɩ nyǝ́mɑ tǝnɑ tɔ. Pǝ tɑɣɑ pʋlʋ, pǝcɔ tike kɛ n nɑɑkɩ. Tǝnɑɣɑ n kɑ́ tǝŋsɩ-m-wɛɣɛ mpusi.

¹⁴Ɩlɛnɑ ɩ́ ponɑ Pɑlɑɑm kɛ Pisikɑ pʋɣʋ luɣu tǝfeŋle, nɑ ɩ́ ŋmɑ tǝfɛɛnlɛnɑɑ tɔtɔɣɔ nɑɑtosompɔɣɔlɑɣɑ. Nɑ ɩ́ lɑɑ lɑtǝcɛ nɑ ɩwɑɑʋ kɛ pɑɑ tǝfɛɛnlɛ nte tǝ tɔɔ.

¹⁵Nɑ ɩ́ tɔ́ Pɑlɑkɩ sɩ: Sǝŋ tǝnɑ nɑ mɑ́ polo nɑ mɑ́ nɑ Ɩsɔ tǝ́ suli.

¹⁶Ɩlɛnɑ Tɑcɑɑ tʋ Pɑlɑɑm nɔɣɔ tɑɑ kɛ́ tɔm sɩ ɩ́ mǝlɩ nɑ ɩ́ heeli Pɑlɑkɩ.

¹⁷Pɑlɑɑm mǝlɑ wulɑʋ nɑ ɩ wɑɑlɩ nyǝ́mɑ pɑ kiŋ, ɩlɛnɑ ɩ́lɛ́ ɩ pɔɔsɩ-ɩ sɩ: Wentiɣilɛ Tɑcɑɑ heelɑ-ŋ?

¹⁸Ḿpʋ́ɣʋ́ Pɑlɑɑm kpɑɣɑ kɑwǝyɑɣɑ sɩ: Sipɔɔ pǝyɑlʋ Pɑlɑkɩ kʋlɩ nɑ n ke ŋkpɑŋŋ.

¹⁹Ɩsɔ tɑ́ kɛ́ yʋlʋ sɩ ɩ looliɣi, yɑɑ ɩ́ lɑɣɑsɩ ɩ kʋsǝsɩɩtʋ. Nti ɩ sɩɩwɑ tɔɣɔ ɩ lɑkɩ tǝtetete.

²⁰Tɑcɑɑ koolinɑ yǝlɑɑ mpɛɣɛ kʋpɑntʋ, nɑ mɑ́ɑ́ tɛɛsǝɣɩ,

²¹mɑɑ pǝsǝɣɩ nɑ mɑ́ lɑɣɑsɩ pʋlʋ. Ɩ wɛ pɑ wɑɑlɩ kɛ́ ɩ tɑ nɑ pɑ ɩsɑɣɑtʋ, yɑɑ pɑ tɑsǝkǝlɛ. Ɩ kɛ́ pɑ wulɑʋ kɛ́ nɑ pɑ́ wilitiɣi-ɩ nɑ lɑŋhʋlʋmlɛ.