Kʋkɑlʋɣʋ 22:5-39

⁵Ɩlɛnɑ wulɑʋ tili ɩ yǝlɑɑ kɛ Peyɔɔ pǝyɑlʋ Pɑlɑɑm wei ɩ kɑ wɛ Petɔɔ kɛ Ɩfǝlɑtɩ pɔɣɔ tɔɔ tɔ ɩ kiŋ sɩ, pɑ́ heeli-ɩ sɩ: Yǝlɑɑ nɑpǝlɩ pɑ lɩɩnɑ Icipiti nɑ pɑ́ kɔɔ nɑ pɑ́ wɑɑsɩ mɑ tɛtʋ tɔɔ.

⁶Hɑɩ, kɔɔ nɑ ń tǝŋsɩ-wɛɣɛ mpusi. Pɑ kǝlɑ-m toŋ. Ntɑnyɩ n kɑ́ pǝsɩ nɑ ń tɔɣɔnɩ-wɛɣɛ mɑ tɛtʋ tɑɑ. Mpi tɔ, mɑ nyǝmɑ sɩ, ye n tǝŋsɑ yʋlʋ kɛ mpusi, yɑɑ n koolɑ-ɩ kʋpɑntʋ, pǝ lɑkɩ kɛ́.

⁷Ḿpʋ́ɣʋ́ Mowɑpʋ nɑ Mɑtiyɑŋ kʋpɑɣɑlɑɑ kpɛnnɑ mpi pɑɑ fɛlɩ pee nɑlʋ Pɑlɑɑm tɔ. Nɑ pɑ́ polo ɩ tɛ nɑ pɑ́ heeli-ɩ Pɑlɑkɩ kʋsǝlǝmʋtʋ.

⁸Ntɛnɑ Pɑlɑɑm sɩ: Ɩ́ sʋʋ mɑ tɛ, nɑ kʋ femɑ, ɩlɛ mɑ tɛlǝsɩ-mɛɣɛ nti Tɑcɑɑ heelɑ-m tɔ.

⁹Ɩlɛnɑ Tɑcɑɑ pɔɔsɩ-ɩ sɩ: Mʋʋlɑɑ mpɑ pɑ wɛnnɑ nyɑ́ tɛ?

¹⁰Ntɛnɑ Pɑlɑɑm cɔ-ɩ sɩ: Mowɑpʋ wulɑʋ Pɑlɑkɩ tilinɑ yǝlɑɑ sɩ pɑ́ heeli-m sɩ

¹¹nɑpǝlɩ pɑ lɩɩnɑ Icipiti nɑ pɑ́ wɑtɩ-m. Ɩlɛ kɔɔ nɑ ń tǝŋsɩ-wɛɣɛ mpusi, nɑ mɑ pǝsɩ-wɛ nɑ mɑ́ tɔɣɔnɩ-wɛ.

¹²Mpʋɣʋlɛ Ɩsɔ tɔmɑ Pɑlɑɑm sɩ: Tɑɑ tǝŋ-wɛ sɩ n tǝŋsǝɣɩ Ɩsɛɣɛlɩ nyǝ́mɑ kɛ mpusi yoo. Mpi tɔ, mɑ tɛmɑ-wɛɣɛ kʋpɑntʋ kooluɣu.

¹³Tɛʋ femɑ ɩlɛnɑ Pɑlɑɑm tɔ Pɑlɑkɩ tillɑɑ sɩ: Ɩ́ kpe mǝ tɛ. Tɑcɑɑ kisɑɑ sɩ mɑ́ tɑɑ tǝŋ-mɛ.

¹⁴Ɩlɛnɑ Mowɑpʋ kʋpɑɣɑlɑɑ mpɛ pɑ́ mǝlɩ nɑ pɑ́ heeli Pɑlɑkɩ sɩ: Pɑlɑɑm kisɑ-tʋɣʋ tǝŋʋɣʋ.

¹⁵Ḿpʋ́ɣʋ́ Pɑlɑkɩ kʋsɑ tillɑɑ kʋfɑmɑ nɑ pɑ tɑɑ kɛ́ ɩ wɑɑlɩ nyǝ́mɑ. Pɛlɛ pɑ kǝlɑ kɑncɑɑlɑɣɑ nyǝ́mɑ kɛ pɑɣɑlɛ nɑ sɔsɔɔntʋ.

¹⁶Nɑ pɑ́ polo pɑ heeli Pɑlɑɑm sɩ wulɑʋ tɔmɑ sɩ: Mɑ kpɑ nyɑ́ yule. Pɑɑ pǝ cɑɑlɑ-ŋ ɩsǝnɑ, polo nɑ nyɑnɑ-ɩ ɩ́ nɑ́.

¹⁷Pǝyele ye n tǝŋsɑ mpɛ ɩnǝɣɩ mpusi, mɑɑ kʋsɩ nyɑ́ nyʋɣʋ nɑ mɑ́ hɑ-ŋ pǝ tǝnɑ mpi n sɔɔlɑɑ tɔ.

¹⁸Ntɛnɑ Pɑlɑɑm cɔ tillɑɑ mpɛ sɩ: Pɑɑ ɩ kɑ́ hɑ-m ɩ liɣitee nɑ pǝ wʋlɑnɑɑ tǝnɑ, pǝ fɛɩ sɩ mɑ́ lɩɩ hǝm, nɑ mɑ́ pǝntǝnɑ mɑ Ɩsɔ Tɑcɑɑ.

¹⁹Ɩlɛ pɑɑ nɑ mpʋ, ɩ́ sʋʋ cǝnɛɣɛ ɑhoo ɑnɛ nɑ mɑ́ nɑ́ nti Ɩsɔ kɑ́ tɑsɑ-m heeluɣu tɔ.

²⁰Ḿpʋ́ɣʋ́ Tɑcɑɑ tɔmɑ Pɑlɑɑm kɛ ɑhoo tɑɑ sɩ: Ntɔŋ nyɑ́ wɑɑlɩ kɛ́ yǝlɑɑ mpɛ pɑ kɔmɑ? Tǝŋ-wɛ, ɩlɛ nti mɑɑ hʋlɩ-ŋ tɔ, tǝ tike kɛ n kɑ́ lɑ.

²¹Tɛʋ femɑ tɑnɑŋ, ɩlɛnɑ Pɑlɑɑm kpɛɛlɩ ɩ kpɑŋɑɣɑ nɑ ɩ́ tǝŋ Mowɑpʋ nyǝ́mɑ.

²²Tɛʋ femɑ tɑnɑŋ, ɩlɛnɑ Pɑlɑɑm kpɛɛlɩ ɩ kpɑŋɑɣɑ ɑlʋnyǝŋkɑ. Nɑ ɩ tǝmlɛ nyǝ́mɑ kɛ nɑɑlɛ, nɑ pɑ́ tǝŋ Mowɑpʋ nyǝ́mɑ. Amɑ Tɑcɑɑ mʋ pɑ́ɑ́nɑ́ nɑ ɩ tɛɛʋ mpɩ. Ɩlɛnɑ ɩsɔtɑɑ tillu tɑŋɩ-ɩ mpɑɑʋ tɑɑ.

²³Kpɑŋɑɣɑ nɑwɑ ɩsɔtɑɑ tillu kɛ mpɑɑʋ hɛkʋ tɑɑ nɑ ɩ́ kpɛɛwɑ ɩ lɑɣɑtɛ nɑ ɩ́ tɔkɑ ɩ niŋ tɑɑ, ɩlɛnɑ kɑ́ hɛlɩ. Nɑ Pɑlɑɑm mɑ-kɛ nɑ ɩ́ mǝlǝnɑ mpɑɑʋ tɑɑ.

²⁴Ḿpʋ́ɣʋ́ ɩsɔtɑɑ tillu tuusɑ lɔlɔ, nɑ ɩ́ sǝŋ mpɑɑʋ tɑɑ kɛ́ lɛsɛŋ tɑwɑ koloosi hɛkʋ.

²⁵Kpɑŋɑɣɑ nɑ-ɩ ɩlɛnɑ kɑ́ tiili kɑ tɩ nɑ koluŋɑ nɑ pǝ́ kʋ́ Pɑlɑɑm nɔɔhǝlɛ. Ɩlɛnɑ ɩ́ sʋʋ-kɛɣɛ mɑpʋ.

²⁶Ḿpʋ́ɣʋ́ ɩsɔtɑɑ tillu tɑsɑ pote nɑ ɩ́ sǝŋ timpi koloosi kpɩɩlɑ teu nɑ pǝ́ fɛɩ hɛlʋɣʋ nɑ ntɔɣɔŋ yɑɑ mpǝtǝŋ tɔ.

²⁷Kpɑŋɑɣɑ nɑ-ɩ, ɩlɛnɑ kɑ́ hǝntɩ. Tǝnɑɣɑ pɑ́ɑ́nɑ́ kpɑ Pɑlɑɑm nɑ ɩ́ hɔɔkɩ-kɛɣɛ kpɑ́tʋ́ɣʋ́.

²⁸Mpʋɣʋlɛ Tɑcɑɑ kulɑ kpɑŋɑɣɑ nɔɣɔ nɑ kɑ́ tɔ́ Pɑlɑɑm sɩ: Pepeɣe mɑ lɑpɑ-ŋ nɑ ń mɑ-m hɑlɩ tɔm tooso tǝnɑ?

²⁹Ntɛnɑ Pɑlɑɑm cɔ sɩ: N nyǝnɑ-m yem kɛ́ te. Ye mɑɑ tɔkɑ lɑɣɑtɛ ɩsǝntɔ mɑɑ tɛmɑ-ŋ kʋɣʋ kɛ kpɑkpɑɑ.

³⁰Kɛlɛnɑ kpɑŋɑɣɑ sɩ: Anɩ mɑ kɛ́ nyɑ́ kpɑŋɑɣɑ kɛ́, nɑ ń cɑkɩ-m tɑm. Too tɔ, mɑ tɛmɑ-ŋ ḿpʋ́ɣʋ́ lɑpʋ nɑ? Pɑɑlɑm sɩ: Aɑɩ yoo.

³¹Ḿpʋ́ɣʋ́ Tɑcɑɑ kulɑ Pɑlɑɑm ɩsɛ nɑ ɩ́ nɑ́ ɩsɔtɑɑ tillu sǝŋɑ mpɑɑʋ hɛkʋ tɑɑ, nɑ ɩ lɑɣɑtɛ kɛ ɩ niŋ tɑɑ. Tǝnɑɣɑlɛ ɩ hotɑ ɩ lotu tɔɔ kɛ́ ɑtɛ.

³²Ntɛnɑ ɩsɔtɑɑ tillu pɔɔsɩ-ɩ sɩ: N mɑpɑ nyɑ́ kpɑŋɑɣɑ kɛ tɔm tooso suwe? Mɑ kɔmɑɣɑ sɩ mɑ kɑkɩ-ŋ mpɑɑʋ. Mpi tɔ, mɑ nyǝmɑ́ sɩ n puki tǝlete kɛ́.

³³Amɑ nyɑ́ kpɑŋɑɣɑ nɑ-m nɑ kɑ́ hɛlɩ-m tɔm tooso. Ye pǝ tɑɣɑ mpʋ mɑɑ kʋ-ŋ nɑ mɑ yele-kɛ nɑ kɑ weesuɣu.

³⁴Ḿpʋ́ɣʋ́ Pɑlɑɑm tɔmɑ ɩsɔtɑɑ tillu sɩ: Mɑ tɑɑ nyɩ sɩ n tɑŋɑ-m mpɑɑʋ tɑɑ sɩ mɑ́ tɑɑ polo. Mɑ tɔm sǝpɑ. Ye nyɑ́ lɑŋlɛ tɑ hɛɛnɑ mɑ pote ńtɛ́ mɑ mǝlǝɣɩ nɔɔnɔɔ.

³⁵Ɩlɛnɑ ɩsɔtɑɑ tillu sɩ: Tǝŋ-wɛ. Amɑ nti mɑ heeliɣi-ŋ tɔ, tǝ tike kɛ ń kɑ́ yɔɣɔtɩ. Ntɛnɑ Pɑlɑɑm tǝŋ tillɑɑ mpɛ.

³⁶Wɑɑtʋ wei Pɑlɑkɩ nɩɩwɑ Pɑlɑɑm kɔntɛ ɩlɛnɑ ɩ́ polo ɩ sǝŋʋɣʋ kɛ Mowɑpʋ ɩcɑtɛ nte tǝ wɛ tɛtʋ toŋɑ kɛ Alǝnɔŋ lɔɔʋ nɔɣɔ tɔ.

³⁷Nɑ Pɑlɑkɩ pɔɔsɩ-ɩ sɩ: Pepe tɔɔ kɛ́ n tɑ kɔɔ kpɑkpɑɑ kɛ wɑɑtʋ wei mɑ tilɑ tɔm kɑncɑɑlɑɣɑ nyǝm tɔ? Yɑɑ n hʋʋkɩ sɩ mɑ kpisiɣi nyɑ́ nyʋɣʋ kʋsʋɣʋ?

³⁸Ḿpʋ́ɣʋ́ Pɑlɑɑm cɔwɑ sɩ: Tɔʋ pǝnɛntɛ mɑ kɔmɑ yɑɑ. Amɑ mɑɑ lɑkɩ mɑ luɣu nyǝntʋ kɛ́. Nti Ɩsɔ kɑ́ tʋ-m tɔ tǝ tike kɛ mɑɑ yɔɣɔtɩ.

³⁹Ḿpʋ́ɣʋ́ pɑ nɑɑlɛ pɑ polɑ Kiliyɑtɩ-Husoti.