Kʋkɑlʋɣʋ 21:3-35

³Ɩlɛnɑ Tɑcɑɑ mʋ pɑ kʋsǝlǝmʋtʋ, nɑ pɑ́ kpiisi pɑ ɑcɑlɛɛ ɑnɩ ɑ tǝnɑ. Ɩlɛnɑ pɑ́ hɑ hɔɣɔlʋɣʋ ŋkʋɣʋ hǝtɛ sɩ Hoomɑ. Ncɑɑlɛ kɛ pɑ yɑɑ mpʋ nɑ pɑ tɛ tɑɑ.

⁴Ḿpʋ́ɣʋ́ Ɩsɛɣɛlɩ nyǝ́mɑ kʋlɑ Hoo pʋɣʋ, nɑ pɑ́ kpɑɣɑnɑ sǝsǝncɑɑsɩ teŋku hɔɣɔlʋɣʋ mpɑɑʋ sɩ pɑ cɔlǝɣɩ Ɩtɔm tɛtʋ. Amɑ pɑ kpisɑ kɑntǝlʋɣʋ kɛ mpɑɑʋ tɑɑ.

⁵Ɩlɛnɑ pɑ́ niki Ɩsɔ nɑ Moisi kɛ kʋntǝnɑʋ sɩ pepe tɔɔ kɛ́ pɛlɛ pɑ lǝsɑ-wɛɣɛ Icipiti tɑɑ sɩ, pɑ́ sɩ wʋlɑɣɑ tɛtʋ tɑɑ? Tɔɣɔnɑɣɑ yɑɑ lʋm fɛɩ, pǝyele wɑhɑlɑ kʋtɔɣɔʋ Mɑnnɑ nɑ́ lɩɩ-wɛɣɛ sɔŋ.

⁶Ḿpʋ́ɣʋ́ Tɑcɑɑ tʋwɑ Ɩsɛɣɛlɩ nyǝ́mɑ kɛ tʋmɑɑ ɑsɑɣɑɑ, nɑ pǝ́ nyɑsɑ pɑ pɑɣɑlɛ nɑ pɑ́ sɩ.

⁷Tǝnɑɣɑlɛ yǝlɑɑ lɛlɑɑ polɑɑ nɑ pɑ́ tɔ Moisi sɩ: Tǝ pǝntǝnɑ nyɑnɑ Tɑcɑɑ kɛ timpi tǝ kʋntǝnɑ-mɛ tɔ. Mpʋ tɔ, wiinɑ-ɩ nɑ ɩ́ hɑtǝlǝnɑ-tʋɣʋ tʋmɑɑ mpɛ. Ɩlɛnɑ Moisi nɑɑ sʋʋ-wɛɣɛ sǝlǝmǝnɑʋ.

⁸Ntɛnɑ Tɑcɑɑ sɩ: Ɩ́ lu tʋm lɛɛsʋɣʋ kɛ nyǝɣǝlʋɣʋ kʋsɛɛmʋɣʋ, nɑ ɩ́ siki kpɑ́tʋ́ɣʋ́ kʋtɑɣɑlʋɣʋ nyʋɣʋ tɑɑ. Ye pǝ nyɑsɑ wei nɑ ɩ́ kʋsɩ ɩsɛ nɑ ɩ́ nyǝnɩ-kʋ, pɩɩ wɑɑ-ɩ.

⁹Ḿpʋ́ɣʋ́ Moisi lɑpɑ ɩsɩɩ Tɑcɑɑ yɔɣɔtʋɣʋ tɔ. Nɑ pǝ́ nyɑsɑ wei nɑ ɩ́ nyǝnɑ-kʋ pǝ wɑɑ-ɩ.

¹⁰Ḿpʋ́ɣʋ́ Ɩsɛɣɛlɩ nyǝ́mɑ tʋ mpɑɑʋ hɑlǝnɑ Opoti.

¹¹Pɑ kʋlɑ tǝnɑ, ɩlɛnɑ pɑ́ polo Yɛ-Apɑlim kɛ Mowɑpʋ ilim tǝlɩɩlɛ tɔɔ wʋlɑɣɑ tɛtʋ tɑɑ.

¹²Pɑ lɩɩ tǝnɑɣɑ nɑ pɑ́ polo Selɛtɩ lɔɔʋ nɔɣɔ.

¹³Pɑ kʋlɑ tǝnɑɣɑ nɑ pɑ́ polo Alǝnɔŋ pɔɣɔ ŋkɑ kɑ nyʋɣʋ wɛ Amoni nyǝ́mɑ tɛ, nɑ kɑ́ fɑkɩ wʋlɑɣɑ tɛtʋ hɔɣɔlʋɣʋ, nɑ pǝ́cɔ́ kɑ́ tɑkɩ Mowɑpʋ nyǝ́mɑ nɑ Amolii nyǝ́mɑ pɑ toŋɑ tɔ.

¹⁴Pǝ tɔɔ kɛ́ pɑ yɔɣɔtɑ Tɑcɑɑ yoou tɑkǝlɑɣɑ tɑɑ sɩ: Fɑhɛpɩ kɛ Sufɑ tɛtʋ tɑɑ, nɑ Alǝnɔŋ lɔɔŋ

¹⁵nɑ lɔɔŋ wei ɩ wɛ Alǝnɔŋ hɔɣɔlʋɣʋ tɔɔ kɛ́ Mowɑpʋ toŋɑ tɔɔ tɔ.

¹⁶Pɑ lɩɩ tǝnɑɣɑ ɩlɛnɑ pɑ́ polo Lɔkɔ cɔlɔɣɔ timpi Tɑcɑɑ tɔmɑ Moisi sɩ: Kpeɣeli sɑmɑɑ, nɑ mɑ́ hɑ-wɛɣɛ lʋm tɔ.

¹⁷Wɑɑtʋ ɩnǝɣɩ Ɩsɛɣɛlɩ nyǝ́mɑ mɑpɑ kɑwǝyɑɣɑ sɩ: Lɔkɔ lʋm ɩ́ lɩɩnɑ kɑwilitɑsɩ.

¹⁸Awulɑɑ nɑ kɑsɑɣɑmpiyɑ hulinɑ-ɩ nɑ pɑ kɑwulɑɣɑ kpɑtǝŋ. Pɑ lɩɩ wʋlɑɣɑ tɛtʋ tɑɑ, ɩlɛnɑ pɑ́ tɑlɑ Mɑtɑnɑ.

¹⁹Pɑ lɩɩ tǝnɑ nɑ pɑ́ polo Nɑhɑliyɛlɩ, tǝnɑ wɑɑlɩ kɛ́ Pɑmɔtɩ.

²⁰Pɑ lɩɩ tǝnɑ, ɩlɛnɑ pɑ́ polo Mowɑpʋ tɛtʋ tɛtɛkǝlɛ kɛ Pisikɑ pʋɣʋ nyʋɣʋ tɑɑ nɑ wʋlɑɣɑ tɛtʋ tɔɔ.

²¹Ḿpʋ́ɣʋ́ Ɩsɛɣɛlɩ nyǝ́mɑ tilɑɑ nɑ pɑ́ heeli Amolii nyǝ́mɑ wulɑʋ Sihoŋ sɩ:

²²Yele nɑ tǝ fɑɣɑnɑ nyɑ́ tɛtʋ tɑɑ. Hɑpǝlɛ kɛ tɩɩ siɣisi, hɑlǝnɑ tǝ́ tɛsɩ nyɑ́ tɛtʋ. Tǝ kɑɑ hɛlɩ hɑlǝm yɑɑ lɛsɛŋnɑɑ tɑɑ, yɑɑ tǝ́ nyɔɔ lʋm.

²³Amɑ Sihoŋ tɑ tisi. Ḿpʋ́ɣʋ́ ɩ́ kuu ɩ yoolɑɑ tǝnɑ, nɑ ɩ́ kɑtɩ Ɩsɛɣɛlɩ nyǝ́mɑ kɛ Yɑhɑsɩ wʋlɑɣɑ tɛtʋ tɑɑ.

²⁴Ḿpʋ́ɣʋ́ Ɩsɛɣɛlɩ nyǝ́mɑ yoonɑ-ɩ. Nɑ pɑ́ lɛɛkɩ ɩ tɛtʋ tǝnɑɣɑ pǝ kpɑɣɑʋ Alǝnɔŋ nɑ pǝtɛɛ tɔɔ, nɑ Yɑpɔkɩ nɑ ɩsɔtɑɑ tɔɔ, kɛ́ Amoni nyǝ́mɑ toŋɑ koluŋɑ nɑ ilim tǝlɩɩlɛ tɔɔ.

²⁵Nɑ pɑ́ lɛɛkɩ Hɛsǝpɔŋ ɩcɑtɛ, nɑ pǝ cɔlɔ nyǝnɑ sǝkpenɑ nɑ pɑ́ cɑɣɑ.

²⁶Hɛsǝpɔŋ tǝnɑɣɑ Amolii nyǝ́mɑ wulɑʋ Sihoŋ kɑ wɛɛ. Ɩ kɑ yoonɑ Mowɑpʋ wulɑʋ kʋpǝŋ kɛ́, nɑ ɩ́ lɛɛkɩ ɩ tɛtʋ tǝnɑ. Hɑlǝnɑ pǝ yoosinɑ Alǝnɔŋ.

²⁷Hɑlɩ yonyoolɑɑ tʋ-tɛ nɑ yontu sɩ: Ɩ́ kɔɔ Hɛsǝpɔŋ nɑ ɩ́ ŋmɑ́ Sihoŋ ɩcɑtɛ nɑ tǝ koluŋɑ.

²⁸Kɔkɔ yɑwɑ Hɛsǝpɔŋ. Kɑ tʋlɑ Sihoŋ ɩcɑtɛ tɑɑ. Kɑ nyɑɣɑ Aɑ kɛ Mowɑpʋ tɛtʋ tɑɑ. Kɑ kpɛnnɑ Alǝnɔŋ ɩsɔtɑɑ sɔsɑɑ.

²⁹Mowɑpʋ, nyɑ́ tɔm wɛ wɑɩyo. Tʋɣʋ Kemɔsɩ lɑɑlɑɑ mɛ, mǝ lepɑ. Mǝ pǝyɑlɑɑ sewɑ, nɑ Amolii wulɑʋ Sihoŋ nɑ́ɑ́ kpɑ mǝ ɑlɑɑ kɛ yomle.

³⁰Tǝ tɔwɑ Amolii nyǝ́mɑ kɛ nyǝmɑ́. Tǝ wɑkǝlɑ Hɛsǝpɔŋ tɛtʋ tǝnɑ, hɑlǝnɑ Tipɔŋ. Hɑlǝnɑ pǝ́ polo Nofɑ nɑ Mɛtǝpɑ tɔ, tǝ kpiisɑ pɑ tǝnɑɣɑ.

³¹Ḿpʋ́ɣʋ́ Ɩsɛɣɛlɩ nyǝ́mɑ tɔɣɔ Amolii nyǝ́mɑ tɛtʋ.

³²Nɑ Moisi kʋsɩ feŋlɑɑ nɑ pɑ́ cɔɔ Yɑsɛɛ ɩcɑtɛ. Yoolɑɑ lɛɛkɑ-tɛ nɑ tǝ ɑcɑlɛɛ sǝkpenɑ. Pɑ tɔɣɔnɑ Amolii nyǝ́mɑ.

³³Pǝ wɑɑlɩ kɛ́ pɑ lɑɣɑsɑ mpɑɑʋ nɑ pɑ́ mǝŋnɑ Pɑsɑŋ tɔɔ. Ḿpʋ́ɣʋ́ tǝnɑ wulɑʋ Oki nɑ́ lǝsɑ ɩ yoolɑɑ tǝnɑ nɑ pɑ́ polo Ɩsɛɣɛlɩ nyǝ́mɑ yoonɑʋ kɛ Ɩtǝlei.

³⁴Ḿpʋ́ɣʋ́ Tɑcɑɑ heelɑ Moisi sɩ: Tɑɑ nyɑnɑ-ɩ. Mɑɑ tʋ ɩ́ nɑ ɩ yoolɑɑ nɑ ɩ tɛtʋ tǝnɑɣɑ nyɑ́ niŋ tɑɑ, nɑ ń lɑnɑ-ɩ ɩsɩɩ n lɑpǝnɑ Amolii nyǝ́mɑ wulɑʋ Sihoŋ wei ɩ kɑ wɛ Hɛsǝpɔŋ tɔ.

³⁵Nɑ Ɩsɛɣɛlɩ nyǝ́mɑ kʋ Oki nɑ ɩ pǝyɑlɑɑ, nɑ ɩ yoolɑɑ tǝnɑ. Ɩ tɑ yele pɑɑ kʋlʋm nɑ ɩ weesuɣu. Ɩlɛnɑ pɑ́ lɛɛkɩ tɛtʋ.