Kʋkɑlʋɣʋ 1:4-47

⁴Pɑɑ kpekǝle nte tǝ lʋlʋŋ nyʋɣʋ tʋ ɩ́ sɔɔsɩ mǝ tɔɔ nɑ pɑ́ sǝnɑ-mɛ.

⁵Mpɛ ɩnɩ pɑ hǝlɑ ntɔ: Lupɛŋ kpekǝle tɑɑ nyǝŋ ntɛ́ Setewu pǝyɑlʋ Ilisuu.

⁶Simiyɔŋ nyǝntɛ tɑɑ kɛ́ Sulisɑtɑɩ pǝyɑlʋ Selumǝyɛlɩ.

⁷Yutɑ nyǝntɛ tɑɑ kɛ́ Aminɑtɑpɩ pǝyɑlʋ Nɑsɔŋ.

⁸Ɩsɑkɑɑ nyǝntɛ tɑɑ kɛ́ Suwɑɑ pǝyɑlʋ Netɑneyɛlɩ.

⁹Sɑpulɔŋ nyǝntɛ tɑɑ kɛ́ Helɔŋ pǝyɑlʋ Ɩliyɑpɩ.

¹⁰Yosɛɛfʋ pǝyɑlʋ Ɩfǝlɑyim nyǝntɛ tɑɑ kɛ́ Amihuti pǝyɑlʋ Ɩlisɑmɑ. Yosɛɛfʋ pǝyɑlʋ nɑɑlɛ nyǝŋ Mɑnɑsee nyǝntɛ tɑɑ kɛ́ Petɑsuu pǝyɑlʋ Kɑmliyɛlɩ.

¹¹Pɛncɑmɛɛ nyǝntɛ tɑɑ kɛ́ Kitoni pǝyɑlʋ Apitɑŋ.

¹²Tɑŋ nyǝntɛ tɑɑ kɛ́ Amisɑtɑɩ pǝyɑlʋ Ahiyesɛɛ.

¹³Asɛɛ nyǝntɛ tɑɑ kɛ́ Okǝlɑŋ pǝyɑlʋ Pɑkiyɛlɩ.

¹⁴Kɑtɩ nyǝntɛ tɑɑ kɛ́ Teuwɛlɩ pǝyɑlʋ Ɩliyɑsɑfɩ.

¹⁵Nɛfǝtɑli nyǝntɛ tɑɑ kɛ́ Ɩnɑŋ pǝyɑlʋ Ahilɑ.

¹⁶Ɩsɛɣɛlɩ lʋlʋŋ nyʋɣʋ nyǝ́mɑ mpɑ pɑ lǝsɑ mpʋ tɔɣɔlɛ yoolɑɑ nyʋɣʋ nyǝ́mɑ tɔtɔ.

¹⁷Ḿpʋ́ɣʋ́ Moisi nɑ Alɔŋ pɑ sɔɔsɑ ɑpɑlɑɑ nɑɑnʋwɑ nɑ nɑɑlɛ ɩnǝɣɩ pɑ tɔɔ sɩ pɑ́ sǝnɑ-wɛ.

¹⁸Pɑ́ koti yǝlɑɑ tǝnɑɣɑ ɩsɔtʋ nɑɑlɛ nyǝŋ kʋyɑkʋ kɑncɑɑlɑɣɑ nyǝŋkʋ. Pɑ́ tʋ́ ɑpɑlɑɑ mpɑ pɑ wɛnɑ pɩɩsɩ hiu nɑ wɑɑlɩ tɔ pɑ hǝlɑ kɛ tɑkǝlɑɣɑ tɑɑ, nɑ pǝ́ kɛɛsǝnɑ pɑ lʋlʋŋ nɑ pɑ tɛɛsɩ.

¹⁹Holɛpʋ wʋlɑɣɑ tɛtʋ tɑɑ kɛ́ Moisi kɑlɑ kʋkɑlʋɣʋ ŋkʋ, ɩsɩɩ Tɑcɑɑ kɑ kɛɛsʋɣʋ-ɩ tɔ.

²⁰Ḿpʋ́ɣʋ́ pɑ kɑlɑ pɑɑ Ɩsɛɣɛlɩ kpekǝle nte tǝ lʋlʋɣʋ, nɑ tǝ tɛɛsɩ nyǝ́mɑ. Nɑ pɑ́ tʋ́ ɑpɑlɑɑ mpɑ pɑ tɑlɑ pɩɩsɩ hiu nɑ wɑɑlɩ, nɑ pɑ́ mʋnɑ yoou pote tɔ pɑ hǝlɑ kɛ tɑkǝlɑɣɑ tɑɑ. Yɑkɔpʋ pǝyɑlʋ sɔsɔ Lupɛŋ kpekǝle kɛ pɑ cɑɑlǝnɑɑ. Pɑ nyʋɣʋ ntɔ: Lupɛŋ kpekǝle nyǝ́mɑ wɛ iyisi nɩɩlɛ nɑ nɑɑtoso nɑ nɑsǝlɛ nɑ nɩɩnʋwɑ (46500). Simiyɔŋ nyǝ́mɑ nyǝntɛ kɛ iyisi pɔɣɔlɑɣɑfɛɩ nɩɩtoso nɑ ŋmʋnʋɣʋ nɑ nɩɩnʋwɑ (59300). Kɑtɩ nyǝ́mɑ nyǝntɛ kɛ iyisi nɩɩlɛ nɑ kɑkpɑsɩ nɑ nɑsǝtoso nɑ nɩɩlɛ nɑ nɑɑnʋwɑ (45650). Yutɑ nyǝ́mɑ nyǝntɛ kɛ iyisi nɩɩtoso nɑ nɑɑnʋwɑ nɑ liɣiti nɑ nɑsǝtoso (74600). Ɩsɑkɑɑ nyǝ́mɑ nyǝntɛ kɛ iyisi nɩɩlɛ nɑ nɑɑnʋwɑ nɑ liɣiti nɑ nɑsǝlɛ (54400). Sɑpulɔŋ nyǝ́mɑ nyǝntɛ kɛ iyisi nɩɩlɛ nɑ nɑɑnʋwɑ nɑ nɑɑtosompɔɣɔlɑɣɑ nɑ nɑsǝlɛ (57400). Yosɛɛfʋ pǝyɑlʋ Ɩfǝlɑyim nyǝ́mɑ nyǝntɛ kɛ iyisi nɩɩlɛ nɑ nɑsǝlɛ nɑ nɩɩnʋwɑ (40500). Yosɛɛfʋ pǝyɑlʋ lɛlʋ Mɑnɑsee nyǝ́mɑ nyǝntɛ kɛ iyisi hiu nɑ nɑɑnʋwɑ nɑ nɑɑlɛ nɑ ŋmʋnʋɣʋ (32200). Pɛncɑmɛɛ nyǝ́mɑ nyǝntɛ kɛ iyisi hiu nɑ nɑɑnʋwɑ nɑ kɑkpɑsɩ nɑ nɑsǝlɛ (35400). Tɑŋ nyǝ́mɑ nyǝntɛ kɛ iyisi nɩɩtoso nɑ nɑɑlɛ nɑ nɑsǝtoso nɑ nɩɩnʋwɑ (62700). Asɛɛ nyǝ́mɑ nyǝntɛ kɛ iyisi nɩɩlɛ nɑ kʋlʋm nɑ nɑsǝlɛ nɑ nɩɩnʋwɑ (41500). Nɛfǝtɑli nyǝ́mɑ nyǝntɛ kɛ iyisi nɩɩlɛ nɑ nɑɑnʋwɑ nɑ tooso nɑ nɑsǝlɛ (53400).

⁴⁴Moisi nɑ Alɔŋ, nɑ Ɩsɛɣɛlɩ kpekɑ nɑɑnʋwɑ nɑ nɑɑlɛ lʋlʋŋ nyʋɣʋ nyǝ́mɑ, pɑ kɑlɑ yǝlɑɑ nɑ pǝ́ lɩɩ ɩsǝnɑ tɔɣɔlɛ.

⁴⁵Ɩsɛɣɛlɩ ɑpɑlɑɑ mpɑ pɑ wɛnɑ pɩɩsɩ hiu nɑ wɑɑlɩ, nɑ pɑ́ mʋnɑ yoou pote tɔ,

⁴⁶pɑ kpɛntɑ iyisi nɑsǝtoso nɑ tooso nɑ nɑsǝlɛ nɑ nɩɩnʋwɑ nɑ nɩɩlɛ nɑ nɑɑnʋwɑ (603550).

⁴⁷Pɑ tɑɑ kpɛnnɑ Lefii kpekǝle nyǝ́mɑ nɑ pɑ́ kɑlɑ.