Kʋkɑlʋɣʋ 18:18-31

¹⁸Ɩlɛnɑ ɑ nɑntʋ pǝsɩ mǝ nyǝntʋ. Teitei ɩsɩɩ pɑ lɑkʋɣʋ ciikuɣu kɔtɑɣɑ, nɑ pɑ́ hʋlǝɣɩ-m lɑŋlɛ nɑ yule ntɔɣɔŋ nyǝntɛ, nɑ hɔɣɔlǝŋ tǝnɑ ɩsɩɩ Ɩsɛɣɛlɩ nyǝ́mɑ lɑkɩ tɔ.

¹⁹Pǝ tǝnɑ mpi Ɩsɛɣɛlɩ nyǝ́mɑ hʋlǝɣɩ-m nɑ hɔɣɔlǝŋ tǝnɑ sɩ kʋcɔɔʋ nɑŋŋ nyǝŋkʋ tɔ. Kʋ pǝsɑ nyɑnɑ nyɑ́ pǝyɑlɑɑ nɑ nyɑ́ pɛɛlɑɑ mǝ nyǝŋkʋ kɛ́. Pǝ kɛ́ tɑm tɔɔ nyǝntʋ kɛ mǝ nɑ mǝ lʋlʋɣʋ nyǝ́mɑ kɛ́, tǝ fɛɩ lɑɣɑsʋɣʋ.

²⁰Ḿpʋ́ɣʋ́ Tɑcɑɑ tɑsɑ Alɔŋ kɛ heeluɣu tɔtɔ sɩ: N kɑɑ hiki tɛtʋ ɩsɩɩ Ɩsɛɣɛlɩ nyǝ́mɑ lɛlɑɑ. Amɑ mɑɣɑlɛ nyɑ́ tɑɑlɛ nɑ nyɑ́ wɛnɑʋ.

²¹Hɔɣɔlǝŋ nɑɑnʋwɑ tɑɑ kʋlʋmʋɣʋ ŋku Ɩsɛɣɛlɩ nyǝ́mɑ kɔŋnɑ Tɑcɑɑ tɔɣɔ mɑɑ cɛlɑ Lefii nyǝ́mɑ mpɑ pɑ lɑpɑ Ɩsɔ cokǝle tɑɑ kɛ́ tǝmlɛ tɔ.

²²Sɑmɑɑ kɑɑ kpǝtǝnɑ cokǝle. Pǝ́ tɑɑ kɔɔ nɑ pɑ́ pǝntɩ nɑ pɑ́ sɩ.

²³Lefii nyǝ́mɑ tike kɑ lɑkǝnɑ cokǝle tɑɑ tǝmlɛ. Ye pɑ pǝntɑɑ pǝ́ wɛɛ pɑ nyɔɔŋ tɑɑ. Pɑ kɑɑ wɛɛnɑ tɛtʋ ɩsɩɩ kpekɑ lɛnnɑ. Ɩ́ tɔkɩ kʋsǝsɩɩtʋ tǝnɛɣɛ tɑm tɔɔ.

²⁴Amɑ mɑɑ cɛlɑ-mɛɣɛ hɑtǝmʋtʋ hɔɣɔlǝŋ nɑɑnʋwɑ tɑɑ kʋlʋmʋɣʋ, ŋku Ɩsɛɣɛlɩ nyǝ́mɑ lɑpɑ-m kɔtɑɣɑ nɑ pɑ́ kpɑɑsɩ-m nɑ ɩsɔ tɔ. Pǝ tɔɔ kɛ́ mɑ heelɑ-mɛ sɩ, ɩ́ kɑɑ hiki tɛtʋ ɩsɩɩ kpekɑ lɛnnɑ.

²⁵Ḿpʋ́ɣʋ́ Tɑcɑɑ tɔmɑ Moisi sɩ:

²⁶Tɛlǝsɩ Lefii nyǝ́mɑ sɩ, ye Ɩsɛɣɛlɩ nyǝ́mɑ kɔnɑ-mɛɣɛ pɑ hɑtǝmʋtʋ hɔɣɔlǝŋ nɑɑnʋwɑ tɑɑ kʋlʋmʋɣʋ ŋku mɑ hɑ-wɛ tɔ, ɩlɛ mɩɩ lǝsɩ pǝ tɑɑ kɛ́ hɔɣɔlǝŋ nɑɑnʋwɑ tɑɑ kʋlʋmʋɣʋ tɔtɔ nɑ ɩ́ cɛlɛ-m.

²⁷Nɑ pǝ́ wɛɛ ɩsɩɩ mǝ tɛɛtʋnɑɑ lǝsʋɣʋ pɑ hɑtǝmʋtʋ nɑ pɑ lɛsɛŋnɑɑ tɔɔ tɔ.

²⁸Tǝnɑɣɑ mǝ hikiɣinɑ mǝ kʋhɑʋ nɑ ɩ́ kɔnɑ-m nɑ ɩ́ cɛlǝɣɩ Alɔŋ-wɛ.

²⁹Kʋcɔɔŋ wei ɩ tǝnɑ ɩ́ hikiɣi tɔ, ɩ tɑɑ kɛ́ ɩ́ kɑ́ lǝsɩ tǝpɑntɛ nɑ ɩ́ cɛlɛ-m.

³⁰Ye ɩ́ tɛmɑ lǝsʋɣʋ kɛ mɑ nyǝm, ɩlɛ ɩ́ sɩɩ mǝ tǝɣɩ kʋkɑɑsǝm. Ɩsɩɩ mǝ tɛɛtʋnɑɑ kɑɑsʋɣʋ pɑ tǝɣɩ hɑtǝmʋtʋ nɑ lɛsɛŋnɑɑ tɔ.

³¹Tǝmlɛ nte ɩ lɑkɩ cokǝle tɑɑ tɔ tǝ kʋfɛlʋɣʋ ntɛ́. Ɩlɛ pɑɑ timpiɣi mǝ nɔkɑɑ mǝnɑ mǝ tɛɛsɩ nyǝ́mɑ ɩ́ pǝsǝɣɩ nɑ ɩ́ tɔɣɔ pǝ tɔɣɔnɑɣɑ.