Kʋkɑlʋɣʋ 16:20-34

²⁰Ɩlɛnɑ Ɩsɔ tɔ́ Moisi nɑ Alɔŋ sɩ:

²¹Ɩ́ hɑtǝlǝnɑ-wɛ, mɑ cɑɑ-wɛɣɛ kpiisuɣu kɛ tɔm kʋlʋm tɔɔ kɛ́.

²²Tǝnɑɣɑlɛ Moisi nɑ Alɔŋ pɑ hotɑ pɑ nɔɔsɩ tɔɔ kɛ́ kpɑkpɑɑ. Nɑ pɑ́ mɑ́ kɑpukɑ sɩ: Hɑɩ, yǝlɑɑ tǝnɑ ŋmɑlʋ Ɩsɔ. Kʋlʋm wɑkǝlɑɑ, ɩlɛnɑ ń mʋɣɩ sɑmɑɑ tǝnɑ nɑ pɑ́ɑ́nɑ́ nɑ?

²³Ntɛnɑ Tɑcɑɑ cɔ Moisi sɩ:

²⁴Heeli sɑmɑɑ nɑ pɑ́ hɑtǝlǝnɑ Kolee nɑ Tɑtɑŋ nɑ Apilɑm pɑ tǝcɑɣɑlɛ.

²⁵Ḿpʋ́ɣʋ́ Moisi polɑ Tɑtɑŋ nɑ Apilɑm pɑ cɔlɔ. Nɑ Ɩsɛɣɛlɩ nyʋɣʋ nyǝ́mɑ kɛ ɩ wɑɑlɩ.

²⁶Nɑ ɩ́ heeli sɑmɑɑ sɩ: Ɩ́ hɑtǝlǝnɑ ɑsɑɣɑɑ mpɛ pɑ cokɑ. Ye wei ɩ́ tokinɑ pɑ pʋlʋpʋ pɑ ɩsɑɣɑtʋ kɑ́ kʋ-ɩ.

²⁷Ntɛnɑ sɑmɑɑ hɑtǝlǝnɑ Kolee pɑ cokɑ. Wɑɑtʋ ɩnɩ Tɑtɑŋ nɑ Apilɑm pɑ ɑlɑɑ, nɑ pɑ lʋlʋɣʋ nyǝ́mɑ lɛlɑɑ pɑɑ tɛmɑ lɩɩʋ, nɑ pɑ́ sǝŋ pɑ nɔnɔɔsɩ.

²⁸Mpʋɣʋlɛ Moisi tɔmɑ sɩ: Ɩ́ kɑ́ cɛkǝnɑ teu sɩ mɑɑ lɑkɩ pʋlʋ nɑ mɑ mɑɣɑmɑɣɑ mɑ toŋ. Amɑ Tɑcɑɑ tilinɑ-m.

²⁹Ye yǝlɑɑ pɑnɛ pɑ sǝpɑ pɑ mɑɣɑmɑɣɑ pɑ sǝm, ɩlɛ pǝ tɑɣɑ Tɑcɑɑ tilinɑ-m.

³⁰Amɑ ye ɩ lɑpɑ piti tǝmlɛ nɑ tɛtʋ hɑɑ nɔɣɔ, nɑ tǝ́ li pɑ́ nɑ pɑ nyǝm tǝnɑ, nɑ pɑ́ tii ɑtɛtǝlɛ tɑɑ nɑ pɑ ɩsɛ, ɩlɛ pǝlɛɣɛlɛ ɩ́ kɑ́ tʋnɑ sɩ pɑ woŋɑ Ɩsɔ.

³¹Moisi nɔɣɔ tɑ tɩɩ tiitɑ ɑtɛɣɛ, nɑ tɛtʋ fɑɣɑ yem kɛ pɑ nɔɔhɛɛ tɛɛ.

³²Nɑ tǝ́ li pɑ́ nɑ pɑ ɑlɑɑ, nɑ pɑ piyɑ. Nɑ Kolee wɑɑlɩ nyǝ́mɑ nɑ pɑ nyǝm tǝnɑ.

³³Nɑ pɑ́ tii ɑtɛtǝlɛ tɑɑ. Ɩsɛɣɛlɩ nyǝ́mɑ tɑ tɑsɑ-wɛɣɛ nɑʋ.

³⁴Lɛlɑɑ mpɑ pɑ kpǝtǝnɑ-wɛ tɔ, pɑ nɩɩ pɑ kɑkiisɑsɩ ɩlɛnɑ pɑ se. Mpi tɔ, pɑ nyɑŋɑɣɑ sɩ tɛtʋ ɩ́ tɑɑ kɔɔ nɑ tǝ́ li mpɛ tɔtɔ.