Kʋkɑlʋɣʋ 13:4-29

⁴Feŋlɑɑ mpɛ pɑ kpekɑ nɑ pɑ hǝlɑ ntɔ: Lupɛŋ kpekǝle tɑɑ nyǝŋ ntɛ́ Sɑkuu pǝyɑlʋ Sɑmuwɑ.

⁵Simiyɔŋ nyǝntɛ tɑɑ nyǝŋ ntɛ́ Holi pǝyɑlʋ Sɑfɑtɩ.

⁶Yutɑ nyǝntɛ tɑɑ nyǝŋ ntɛ́ Yefune pǝyɑlʋ Kɑlɛpʋ.

⁷Ɩsɑkɑɑ nyǝntɛ tɑɑ nyǝŋ ntɛ́ Yosɛɛfʋ pǝyɑlʋ Ɩkɑɑlɩ.

⁸Ɩfǝlɑyim nyǝntɛ tɑɑ nyǝŋ ntɛ́ Nuŋ pǝyɑlʋ Hosee.

⁹Pɛncɑmɛɛ nyǝntɛ tɑɑ nyǝŋ ntɛ́ Lɑfu pǝyɑlʋ Pɑlǝti.

¹⁰Sɑpulɔŋ nyǝntɛ tɑɑ nyǝŋ ntɛ́ Soti pǝyɑlʋ Kɑtǝyɛlɩ.

¹¹Yosɛɛfʋ pǝyɑlʋ Mɑnɑsee nyǝntɛ tɑɑ nyǝŋ ntɛ́ Susi pǝyɑlʋ Kɑtɩ.

¹²Tɑŋ nyǝntɛ tɑɑ nyǝŋ ntɛ́ Kemɑli pǝyɑlʋ Amiyɛlɩ.

¹³Asɛɛ nyǝntɛ tɑɑ nyǝŋ ntɛ́ Mikɑyɛɛlɩ pǝyɑlʋ Setuu.

¹⁴Nɛfǝtɑli nyǝntɛ tɑɑ nyǝŋ ntɛ́ Fofǝsi pǝyɑlʋ Nɑpi.

¹⁵Kɑtɩ nyǝntɛ tɑɑ nyǝŋ ntɛ́ Mɑki pǝyɑlʋ Kuwɛlɩ.

¹⁶Mpɑ Moisi tilɑ Kɑnɑɑŋ tɔ pɑ hǝlɑ ntɛ́. Nuŋ pǝyɑlʋ Hosee kɛ Moisi cuɣusɑ hǝtɛ sɩ Yosuwee.

¹⁷Ḿpʋ́ɣʋ́ Moisi kʋsɑ-wɛ nɑ ɩ́ heeli-wɛ sɩ: Ɩ́ kpɑɣɑ ilim ntɔɣɔŋ tɔɔ mpɑɑʋ, nɑ ɩ sʋʋ pulɑsɩ hɔɣɔlʋɣʋ tɑɑ.

¹⁸Nɑ ɩ feŋ tɛtʋ ntɩ nɑ tǝ yǝlɑɑ kɛ teu, nɑ ɩ́ nɑ pɑ pɑɣɑlɛ nɑ pɑ toŋ tǝnɑɣɑ.

¹⁹Nɑ ɩ́ nɑ sɩ pɑ wɛnɑ koloosi ɑcɑlɛɛ yɑɑ pɑ fɛɩnɑ. Nɑ tɛtʋ wɛ mʋsʋŋ yɑɑ tǝ sǝpɑ. Nɑ hɔtʋ wɛɛ yɑɑ tǝ fɛɩ.

²⁰Ɩ́ ponɑ ɑpɑlʋtʋ nɑ ɩ́ kɔnɑ pɑ tɛtʋ kʋlʋlʋm. Wɑɑtʋ ɩnǝɣɩ tɛtʋ ntɩ tǝ tɩɩŋ wei pɑ yɑɑ sɩ lɛsɛŋnɑɑ tɔ ɩ kɑncɑɑlɑɣɑ nyǝ́mɑ pɩɩkɩ.

²¹Ḿpʋ́ɣʋ́ ɑpɑlɑɑ mpɛ pɑ tɛɛwɑ nɑ pɑ́ feŋ tɛtʋ kɛ pǝ kpɑɣɑʋ Siŋ wʋlɑɣɑ tɛtʋ, hɑlǝnɑ Lehopɩ, kɛ Lepo-Hɑmɑtɩ.

²²Ɩlɛnɑ pɑ́ sʋʋ tɛtʋ ntɩ tǝ tɑɑ, nɑ ilim mpǝtǝŋ tɔɔ. Nɑ pɑ́ tɑlɑ Hepǝlɔŋ kɛ Anɑkɩ lʋlʋɣʋ nyǝ́mɑ tookonɑɑ tɛ. Pɑ hǝlɑ ntɛ́, Ahimɑŋ nɑ Sesɑɩ nɑ Tɑlǝmɑyi. Pɑɑ ŋmɑwɑ Hepǝlɔŋ ɩcɑtɛ kɛ́, nɑ pɩɩsɩ nɑɑtosompɔɣɔlɑɣɑ siki, ɩlɛnɑ pɑ́ ŋmɑ́ Sowɑŋ nyǝntɛ kɛ Icipiti tɛtʋ tɑɑ.

²³Pɑ tɑlɑ lɛsɛŋ tɛtɛkǝlɛ tɑɑ, ɩlɛnɑ pɑ́ sɛtɩ pǝ tuku, nɑ piliŋɑ, nɑ pɑ́ hɔɣɔlɩ yǝlɑɑ nɑɑlɛ. Nɑ pɑ́ kooli tɩɩŋ wei pɑ yɑɑ sɩ fiki nɑ kǝlenɑɑtɩ tɔ ɩ pee tɔtɔ.

²⁴Ḿpʋ́ɣʋ́ pɑ hɑ tǝnɑ ɩnǝɣɩ hǝtɛ sɩ, lɛsɛŋ tɛtɛkǝlɛ kɛ tuku ŋku Ɩsɛɣɛlɩ nyǝ́mɑ kɑ sɛtɑɑ tɔ kʋ tɔɔ.

²⁵Kʋyɛɛŋ sikɑ nɩɩlɛ, ɩlɛ feŋlɑɑ tɛmɑɣɑlɛ, nɑ pɑ́ mǝlɩ.

²⁶Moisi nɑ Alɔŋ nɑ Ɩsɛɣɛlɩ sɑmɑɑ kiŋ kɛ pɑ mǝlɑ Kɑtɛɛsɩ kɛ Pɑlɑŋ wʋlɑɣɑ tɛtʋ tɑɑ. Nɑ pɑ́ kɛɛsɩ-wɛɣɛ pǝ tǝnɑ mpi pɑ nɑwɑ tɔ pǝ tɔm. Nɑ pɑ́ hʋlɩ-wɛɣɛ tɛtʋ kʋlʋlʋm nɑ pɑ heeli-wɛ sɩ:

²⁷Kʋpɑntʋ nɑ tɔɣɔnɑɣɑ tǝnɑ tɔlɑ tǝ tɑɑ kɛ́ tǝhɔ. Hɑlǝnɑ pɑ́ hʋlɩ-wɛɣɛ tǝ kʋlʋlʋm.

²⁸Amɑ kʋlʋmtʋ kɛ́ sɩ tǝ yǝlɑɑ kɛ́ toŋtʋnɑɑ kɛ́. Nɑ pɑ ŋmɑwɑ koloosi ɑcɑlɛɛ sɔsɔɔnɑ. Hɑlɩ tǝ nɑwɑ tǝ tɑɑ kɛ́ tooko Anɑkɩ lʋlʋɣʋ nyǝ́mɑ.

²⁹Amɑleke nyǝ́mɑ nɑ́ cɑɣɑnɑ ntɛɣɛ ilim mpǝtǝŋ tɔɔ, nɑ Hiti nyǝ́mɑ nɑ Yepusi nyǝ́mɑ nɑ Amolii nyǝ́mɑ kɛ pulɑsɩ hɔɣɔlʋɣʋ. Nɑ Kɑnɑɑŋ nyǝ́mɑ kɛ Metitelɑnee teŋku nɑ Yɑɑtɑnɩ pɔɣɔ nɔɣɔ.