Kʋkɑlʋɣʋ 10:7-27

⁷Ye pǝ kɛ́ sɩ yǝlɑɑ kotuɣu, pɑ kɑɑ hʋlǝnɑ kɑkiisɑsɩ.

⁸Alɔŋ pǝyɑlɑɑ kɔtǝlɑɑ tike kɑ hʋlǝɣǝnɑ ɑkɑntɛɛ ɑnɩ. Pǝ wɛɛ sɩ mǝ nɑ mǝ piyɑ piyɑ, ɩ́ kɑ́ tɔkɩ kʋsǝsɩɩtʋ tǝnɛɣɛ tɑm tɔɔ kɛ́.

⁹Ye ɩ polɑ mǝ kolontunɑɑ kɛ yoonɑʋ nɑ pɑ kʋlǝɣɩ mǝ tɔɔ, ɩlɛ ɩ́ hʋlɩ ɑkɑntɛɛ nɑ kɑkiisɑsɩ ɩlɛnɑ Tɑcɑɑ mǝ Ɩsɔ mɑ́, mɑ tɔɔsɩ mǝ tɔɔ nɑ mɑ́ wɑɑsɩ-mɛ.

¹⁰Mpʋ tɔtɔɣɔ ɩ́ kɑ hʋlǝɣɩ-yɛɣɛ mǝ ɑyɔɔlɑ kʋyɛɛŋ, nɑ mǝ ɑcimɑ nyǝŋ, nɑ mǝ ɩsɔtʋnɑɑ kɑncɑɑlɑɣɑ kʋyɛɛŋ, kɛ wɑɑtʋ wei ɩ lɑkɩ kɔtɑsɩ nsi kɔkɔ lusɑ sɩ tǝnɑ tɔ nɑ ciikuɣu nyǝnsɩ. Ɩlɛnɑ mɑ́ tɔɔsɩ mǝ tɔɔ. Mɑɣɑlɛ Tɑcɑɑ mǝ Ɩsɔ.

¹¹Ɩsɛɣɛlɩ nyǝ́mɑ Icipiti lɩɩʋ pǝnɑɣɑ nɑɑlɛ nyǝŋkɑ, ɩsɔtʋ nɑɑlɛ nyǝŋ kʋyɑkʋ hiu nyǝŋkʋ kɛ ɩsɔŋmʋntʋ kɛɛlɑ Ɩsɔ cokǝle tɔɔ.

¹²Ḿpʋ́ɣʋ́ Ɩsɛɣɛlɩ nyǝ́mɑ kʋlɑ Holɛpʋ wʋlɑɣɑ tɛtʋ tɑɑ. Ɩlɛnɑ ɩsɔŋmʋntʋ tii Pɑlɑŋ wʋlɑɣɑ tɛtʋ tɑɑ.

¹³Ɩsɛɣɛlɩ nyǝ́mɑ kʋlɑ tɔm kɑncɑɑlɑɣɑ nyǝm pǝnɛɣɛ, ɩsɩɩ Tɑcɑɑ kɛɛsʋɣʋ Moisi tɔ.

¹⁴Yutɑ yoolɑɑ tintiɣile nɑ pɑ tuutɑ kɛlɛ nɔɣɔ tɔɔ. Aminɑtɑpɩ pǝyɑlʋ Nɑsɔŋ kɛlɛ pɑ nyʋɣʋ tʋ.

¹⁵Ɩsɑkɑɑ nyǝ́mɑ nyʋɣʋ tʋ ntɛ́ Suwɑɑ pǝyɑlʋ Netɑneyɛlɩ.

¹⁶Sɑpulɔŋ nyǝ́mɑ nyǝŋ ntɛ́ Helɔŋ pǝyɑlʋ Ɩliyɑpɩ.

¹⁷Ḿpʋ́ɣʋ́ pɑ hɛtɑ cokǝle, nɑ Kɛɛsɔŋ nɑ Melɑli pɑ pǝyɑlɑɑ kpɑɣɑ-tɛ.

¹⁸Ɩlɛnɑ Lupɛŋ yoolɑɑ tintiɣile, nɑ pɑ tuutɑ pɑ́ tʋ́ pɑ wɑɑlɩ. Pɛlɛ pɑ nyʋɣʋ tʋ ntɛ́ Setewu pǝyɑlʋ Ɩlisuu.

¹⁹Simiyɔŋ nyǝ́mɑ nyʋɣʋ tʋ ntɛ́ Sulisɑtɑɩ pǝyɑlʋ Selumǝyɛlɩ.

²⁰Kɑtɩ nyǝ́mɑ nyǝŋ ntɛ́ Teuwɛlɩ pǝyɑlʋ Ɩliyɑsɑfɩ.

²¹Ɩlɛnɑ Lefii tʋ Kehɑtɩ lʋlʋɣʋ nyǝ́mɑ mpɑ pɑ sǝɣǝlɑ ɩsɔ sɛɛʋ wontu tɔ pɑ́ tǝŋ. Nɑ Lefii nyǝ́mɑ lɛlɑɑ nɑ́ɑ́ tɔŋɑ cokǝle sikuɣu nɑ pɑ́ tɑŋɑ-wɛ.

²²Ɩlɛnɑ Ɩfǝlɑyim yoolɑɑ tintiɣile nɑ pɑ tuutɑ pɑ́ tʋ́ pɑ wɑɑlɩ. Pɛlɛ pɑ nyʋɣʋ tʋ ntɛ́ Amihuti pǝyɑlʋ Ɩlisɑmɑ.

²³Mɑnɑsee nyǝ́mɑ nyǝŋ ntɛ́ Petɑsuu pǝyɑlʋ Kɑmliyɛlɩ.

²⁴Pɛncɑmɛɛ nyǝ́mɑ nyǝŋ ntɛ́ Kitoni pǝyɑlʋ Apitɑŋ.

²⁵Pǝ wɑɑlɩ kɛ́ Tɑŋ yoolɑɑ tintiɣile nte tǝ kɛ́ wɑɑlɩ tɑŋlɑɑ tɔ, tǝ́ nɑ tǝ tuutɑ tǝ tʋ́ mpɑɑʋ. Amisɑtɑɩ pǝyɑlʋ Ahiyesɛɛ kɛlɛ pɑ nyʋɣʋ tʋ.

²⁶Asɛɛ nyǝ́mɑ nyǝŋ ntɛ́ Okǝlɑŋ pǝyɑlʋ Pɑkiyɛlɩ.

²⁷Nefǝtɑli nyǝ́mɑ nyǝŋ ntɛ́ Ɩnɑŋ pǝyɑlʋ Ahilɑ.