Text copied!
CopyCompare
GALA Sɛʋɛi - Kɛɛwotiiti - Kɛɛwotiiti 8

Kɛɛwotiiti 8:5-33

Help us?
Click on verse(s) to share them!
5Filipe yeini Samali laa wolai gila su, é Kilista ná-fai laazeeli ná.
6Bɛbɛi pɛ ge woiloni ga pagɔ Filipe wooi ma, siɛgi zu ti ɠɛni gooi mɛnisu da, ti ɗa laavɔɔ vaiti ka, niiti é ɠɛni ti ɠɛɛzu.
7Mazɔlɔɔ kɔzɔba yɛnvui ma mɔinmɔin ge ɠɛni ɠulazu inɛ su nuiti su, ti ɗa kpeei loo ga gola, naa ʋoluma mɛɠɛlɛ nuiti ta maalɛɠɛfɛ nui ma mɔinmɔin ge ɠɛni ʋalozu.
8Koozunɛ wolai ɠɛni taa wolai naa zu.
9Kaite zunui ta ɠɛni taai naa zu, daaseigi ga Simɔn, é ɠɛni molikula fai ɠɛɛzu, é Samali nuɓusɛiti pɛ daavɔɔni, é ɠɛni ɓɔɠɔ lɛɛzu ga toɠa ga nu wola.
10Ɛsɛ pɛ, é zo doungoiti ma, é li kpakologiti pɔ, ti ɠɛni woilosu goo ma ga pagɔ, ti ɗa ɠɛ ma: «Zunui nii ɠa é ga GALA ná-zɛbɛi, nii daaseigi ga ‹Zɛbɛ Wolai.› »
11Ti wola ɓatani ba, mazɔlɔɔ é lɛbini gola ti laavɔɔzu ga ná-molikula faiti.
12Kɛlɛ siɛgi zu ti ɠidaaleʋeni la Filipe laawooi ma, nii é ɠɛni GALA ná-masadai ta Yesu Kilista laaseigi ma Woo Niinɛ Ʋagɔi laazeelizu ti ma, zinaa ta anzaa, ti ɓatizeni.
13Simɔn ɓɔɠɔi ɓalaa ɠidaaleʋeni. Kpegai ma ga ɓatize, é la mɔ ɠɛni zeɠezu Filipe ʋolu. Daa ɠɛni vɔɔzu ga maaɓɛlɛ vaiti ta laavɔɔ vai, niiti Filipe ɠɛni ti ɠɛɛzu.
14Keelaiti ti ɠɛni Zeeluzalɛme, ti mɛnigai ma ga Samali nuiti ti yeezeiɗa GALA daawooi wu, ti Piyɛlɛ ta Zan leʋeni ti ma.
15Naati ti zeeliai ma ná, ti GALA falini ti ʋɛ, nii a kɛ ti Zɛnvu Ɲadegai zɔlɔɔ.
16Mazɔlɔɔ Zɛnvu Ɲadegai la ɠɛni dɛ yeini ti tanɔpɛ ma, ti ɓatizeni nɔ Maliɠii Yesu laaseigi zu.
17Piyɛlɛ ta Zan ti yeelaani ti ma, ti Zɛnvu Ɲadegai zɔlɔɔ.
18Simɔn kaai ma ga kidaaleʋe nuiti ta Zɛnvu Ɲadegai zɔlɔɔsu siɛgi zu keelaiti ti yeelaazu la ti ma, é walii leteni Piyɛlɛni ta Zan ma.
19É ɠɛni ti ma: «À ma zɛbɛi ve bɛ̀, ga zɔi nɔpɛ nà yeela ma, ma nu Zɛnvu Ɲadegai zɔlɔɔ.»
20Kɛlɛ Piyɛlɛ ɠɛni ma: «Ɗa walii yɛ è ʋa, wo li undaaʋiligi zu, tɔɔzei ɗa ɠisiɛzu ga GALA ná-vebɛanii ɠa zɔlɔɔsu ga walii.
21Ɗɔnɔ ta è-ʋɔɔda nɔpɛ ge la niima vai zu, mazɔlɔɔ è-yii la zɔleni GALA gaazu.
22Nimiza mu ga è ɠoozu ɠisiɛ ɲɔi, Maliɠii maanɛɛnɛ, nii a kɛ ni soloo faa ʋe, é è zuvaayɛ ga kisiɛi, nii é è-yiimaʋɛ.
23Mazɔlɔɔ ʋelei gè kaazu la, è laavegɛ ga faa wanai, ta ɗa ga faa ɲɔi ná-duɔi.»
24Simɔn ɠɛni ma: «Wa ɓɔɠɔi à Maliɠii maanɛɛnɛ bɛ̀, nii a kɛ nii kpein wo bogai, naa tanɔpɛ ge mina zeeli mà.»
25Piyɛlɛ ta Zan ti ɓegai ma ga zeele wooi wo, ta ti Maliɠii laawooi laazeeli, ti ɠaleni ma Zeeluzalɛme, ti ɗa li ga Woo Niinɛ Ʋagɔi laazeeli Samali nuiti ta-laa go mɔinmɔin su.
26Yeeta, Maliɠii ná-geezuɠeelai gila ge ɓɔɛni Filipe ʋɔ, é ɠɛ ma: «Wuzeɠe, è li ga lɛkpɛma ʋelei nu yeezazuʋɛ, pelei naa zu nii é zeɠezu Zeeluzalɛme, é yei Gaza ʋelei, nii é teʋebai zu.»
27Filipe liini gaamanɔ. Ná-pelei zu, é zunu zɛɛɠagai gila kaani, Etiyɔpi nu ɠɛni de. É ɠɛni ga kundiɠi wola, Etiyɔpi masa anzanui Kandase ná-naavoloi unda nui ɠɛni de. É ʋaani Zeeluzalɛme GALA dɛbizu.
28É ɠɛni ɠalesu ma, é zeini ná-soo wotoloi zu, é ɗa GALA goo wo nui Ezayi ná-sɛʋɛi ɠala.
29Zɛnvu Ɲadegai ɠɛni Filipe ma: «Maaɓuɠa soo wotoloi nuu ʋa.»
30Filipe ɓizɛni, é Etiyɔpi zunui woomɛni, é ɗa GALA goo wo nui Ezayi ná-sɛʋɛi ɠala. É ɠɛni naa ma: «Nii é kalasu, ɗa gaaɠaazu nɛi?»
31Zunui gooɠaaʋoteni, é ɠɛ ma: «Nà gaaɠa ɠale, ni nu la suɠulani mà?» É Filipe lolini ga naa lɛ, é zei koba wotoloi zu.
32Ʋɛ é ɠɛni ná ɠalasu, é zɛʋɛni ná ga: «É la ɠɛni woo ɲɛ gila kpalaa boni, eɠɛ baalagi ti liizu la paazuʋɛ, eɠɛ baala ziʋoi é loni maaleɠa leʋe nui ɠakala.
33Ná-ɓɔɠɔmaayeii zu, ti ná-tukpɔi ɠaaleʋeni ga telebotalai, ɓɛ ɠa a kɛɛɠalazuʋɛti dɛɛ? Mazɔlɔɔ zɛnvui ɠulani zea.»

Read Kɛɛwotiiti 8Kɛɛwotiiti 8
Compare Kɛɛwotiiti 8:5-33Kɛɛwotiiti 8:5-33