Kɛɛwotiiti 8:11-17

¹¹Ti wola ɓatani ba, mazɔlɔɔ é lɛbini gola ti laavɔɔzu ga ná-molikula faiti.

¹²Kɛlɛ siɛgi zu ti ɠidaaleʋeni la Filipe laawooi ma, nii é ɠɛni GALA ná-masadai ta Yesu Kilista laaseigi ma Woo Niinɛ Ʋagɔi laazeelizu ti ma, zinaa ta anzaa, ti ɓatizeni.

¹³Simɔn ɓɔɠɔi ɓalaa ɠidaaleʋeni. Kpegai ma ga ɓatize, é la mɔ ɠɛni zeɠezu Filipe ʋolu. Daa ɠɛni vɔɔzu ga maaɓɛlɛ vaiti ta laavɔɔ vai, niiti Filipe ɠɛni ti ɠɛɛzu.

¹⁴Keelaiti ti ɠɛni Zeeluzalɛme, ti mɛnigai ma ga Samali nuiti ti yeezeiɗa GALA daawooi wu, ti Piyɛlɛ ta Zan leʋeni ti ma.

¹⁵Naati ti zeeliai ma ná, ti GALA falini ti ʋɛ, nii a kɛ ti Zɛnvu Ɲadegai zɔlɔɔ.

¹⁶Mazɔlɔɔ Zɛnvu Ɲadegai la ɠɛni dɛ yeini ti tanɔpɛ ma, ti ɓatizeni nɔ Maliɠii Yesu laaseigi zu.

¹⁷Piyɛlɛ ta Zan ti yeelaani ti ma, ti Zɛnvu Ɲadegai zɔlɔɔ.