Kɛɛwotiiti 4:9-17

⁹Tɛi wo gi ɠaazaɠasu za faa ʋagɔi ma, nii kɛai seeɓɛ nu ɠila bɛ, wo ɠɛ gi dɛɛ, ʋelei baloai la,

¹⁰wo pɛ à kwɛɛ, Izelayɛle nuiti pɛ ti kwɛɛ ɓalaa, ga Nazalɛte nui Yesu Kilista, nii wo kpadɔni saa wului ma, GALA ge buzeɠe, é kula saai ya, naama ʋele ɠa zunui nii ɠɛdɛgai da, é loni wo ɠakala.

¹¹Tɔ ɠa é ga: ‹Kɔtui nii pɛlɛ lo nuiti wo ɠɛlɛai ba, tama tɔ ɠa kɛai ga kɔtu ɓiingi.›

¹²Yesu ɠila nɔ ɠa kizogi ɠa zoo zɔlɔɔsu saɓui zu, mazɔlɔɔ GALA ge la nu ɠili nɔpɛ daasei feeni eteai zu nuiti saama, nii da zoo ɠizosu ga tɔun maaʋele.»

¹³Ti laavɔɔni gola siɛgi zu ti Piyɛlɛ ta Zan ɠaani la, ti ɗa ɓɔɛ ga ladalai, mazɔlɔɔ ti ɠɛni kwɛɛni ɓalaa ga naati ta ga kalatala nuiti. Ti kwɛɛni ga naati ta ga Yesu ziɛɲɔɠɔ ʋɔlɔmaiti.

¹⁴Kɛlɛ tɛi ti ɠɛni zunui ɠɛdɛgai ɠaazuloni ti ɠoba, ti la ɠɛni zooni ti ʋa faa nɔpɛ bo ga gooɠaaʋote.

¹⁵Ti ɠɛni ti ma naazu, ti ɠula tukpɔɠaaleʋe ʋɛlɛi wu, ti tɔɔzei ga ti ɗa ɓɔɠɔ ɠaazaɠa kpɔgi zu,

¹⁶ti ɗa ɠɛ ma: «Leeni ɠa ada kɛ ga zunui niiti? Tɔɔzei Zeeluzalɛme nuiti pɛ ti kwɛɛni ga ti laavɔɔ vaa wolai nii ɠulaʋɛ kɛlɛma, nii ade la zooga ade ʋa maaɠaali.

¹⁷Kɛlɛ kɛni ade pele leʋe tuɠɔ ga su mina ɓaaɠo nuɓusɛiti saama, ade tɔ sei ti ma, ade ti maalua ga ti mina mɔ ɓɔɛ daaseigi naa zu nu nɔpɛ gaazu.»