Kɛɛwotiiti 2:24-39

²⁴GALA ge buzeɠeʋɛ ʋolu, é kula saai ma zoolɛiti su, mazɔlɔɔ naa la ɠɛni zolooga ga saai ʋa makɛ ba ná-zobogi wu.

²⁵Davide niima wooi woni, é ʋilɛ Yesu ʋa, é ɠɛ ma: ‹Gàazu logɛ Ɠɔoɠɔ GALAGI ʋa yeenɔpɛ, mazɔlɔɔ toɠa kòbaʋɛ, nii a kɛ gè mina ɲiikpi eyɛsu pɛ.

²⁶Naa ɠa é ba, zìi ɠaanɛa, gòoiti daavegɛ ga koozunɛɛi, kpùsɛi ɓɔɠɔi ɠa looɠosu, makɛgai kitogi zu.

²⁷Mazɔlɔɔ è la ɠɛlɛa bà, gè ʋa yɛ gɔvɛalaazu, è la vaa bu nɛ̀i gè ga ɗa-wotii ɠɛ nui, gè ga wooɠɛɠila nu, gè ʋa luula kabayeɠei zu.

²⁸È zɛnvu ʋelei lɛa ga ze, ɗa nɔ̀un daave ga koozunɛɛi è ɠɛɛ vai zu kòba.›

²⁹Kɛ̀ɛlointi, zobogi veeʋɛ bɛ̀ ga gè ɠɛ wo ma: Ade-mɛmɛwola Davide zaaʋɛ, maaɠulu, ná-kabai ɓalaa ka ade zaama zaaɠaza.

³⁰Kɛlɛ é ɠɛni ga GALA goo wo nui, ta é ɠɛni kwɛɛni ga GALA ge minazeɠeni bɛ, é ɠona ga mavofodai ta ɠa zei ná-masa kpɔkpɔgi ɠa.

³¹Kilista wuzeɠe vai, é ɠula saai ya, naa ɠa Davide kaani ma yeeluɠɔ, naama wooi ɠa é boni ga: ‹GALA ge la ɠɛlɛa bà, gè ʋa yɛ gɔvɛalaazu, é la vaa bu, kpùsɛi ʋa luula kabayeɠei zu.›

³²GALA ge Yesu nii wuzeɠeʋɛ, é kula saai ya, gi pɛ gá ga naama zeeleiti.

³³Buzeɠeʋɛ, é zei GALA zeezazuʋɛ, é Zɛnvu Ɲadegai zɔlɔɔ kɛɛɠɛ ya, nii ma minazeɠegi woni, naa ɠa é feai, eɠɛʋelei wo mɛnisu da, ta wo kaazu la.

³⁴Mazɔlɔɔ Davide la lɛɛni geeɠɔlɔgi zu, kɛlɛ tɔ ɓɔɠɔi bogɛ ga: ‹Maliɠii GALA ge ɠɛni Màliɠii ma: Zei zèezazuʋɛ,

³⁵eyɛsu gè è zili nuiti kɛ ga ɗa-ɠɔɠɔloma anii.›

³⁶Izelayɛle ʋɛlɛyeɠei pɛ maanɛɛʋɛ ti kwɛɛ, ti la da, ga Yesu nii wo kpadɔni saa wului ma, naa ɠa GALA ge kɛai ga Maliɠii ta Kilista.»

³⁷Ti naama wooiti mɛnigai ma, é ti yiizoni ga gola, ti ɠɛni Piyɛlɛ ta keelai zɔiti ma: «Gi-ɠɛɛlointi, gá kɛ ɠale mu?»

³⁸Piyɛlɛ ti wooɠaaʋoteni, é ɠɛ ti ma: «À wo ziɛ ʋelei maavalibo, wo ɠilagilagi pɛ ge ɓatize Yesu Kilista laaseigi zu, nii a kɛ wo zuvaayɛ ga wa-ɠotoiti, wa Zɛnvu Ɲadegai zɔlɔɔ ga faanɛɛ.

³⁹Mazɔlɔɔ minazeɠegi ɠa ga wɔnɔ, wa wo-lointi, ta naati tɔnɔ niiti ti maaɠoozaai, naati pɛ de-Maliɠii da-ƓALAGI ʋaazu ti lolisu.»