Kɛɛwotiiti 2:14-32

Click on verse(s) to share them!

¹⁴Piyɛlɛ wuzeɠeni é lo, keela puugɔ maazu ɠilagi (11) zɔiti saama, é wooɠulani, é ɠɛ ma: «À woilo ma-o! Zudee nuiti ta wɔigi wo ɲii wosu Zeeluzalɛme, wo niima vaiti gaaɠa, niiti ti ɠɛɛzu.

¹⁵Dɔ lɛi é ʋa ɠɛ niima nuiti ba, eɠɛʋelei wo ɠisiɛzu la, folo liegi kpaazuʋɛ nɔ ɠa dɛ ade su.

¹⁶Kɛlɛ nii GALA goo wo nui Zowɛle boni, naa ɠa é ɠɛɛzu ɠani. É ɠɛni ma:

¹⁷‹GALA ge ɠɛ ma: Folo ɠaaɓelagiti su, nà nà-Zɛnvui yeizu nuɓusɛi pɛ ma. Wo-loun zunuiti ta wo-loun anzanuiti ta GALA gooiti bo, wa-wuzeɠe niinɛgiti ta kulakɛlɛmaiti ka, wa-ɠɛwola ʋɔlɔiti ta segiti bo.

¹⁸Ungo, naama voloiti su, nà nà-Zɛnvui yei nà-botiɠɛ zunuiti ta nà-botiɠɛ anzanuiti ma, ti ɗa GALA gooi wo.

¹⁹Nà maaɓɛlɛ vaiti kɛ geeɠɔlɔgi zu, ta poogiti zooi ma, ɲamai ta abui ɠa ɠɛ ná, naa ʋɛɛ abu luului ma lonaɓiingi ʋa.

²⁰Foloi ɠa ʋote ga kpidii, alugi ɓɔi eɠɛ ɲamai, aisa Ɠɔoɠɔ GALAGI ná-foloi ʋa zeeli, folo wolai, nii maayikiai.

²¹Naazu zɔi nɔpɛ a wooɠula Maliɠii ma, GALA ka kizo.›

²²À woilo niima wooiti ma, wɔi wo ga Izelayɛle nuiti, wa ɓɔɠɔi wo kwɛɛni ga GALA ge yeezeini Yesu Nazalɛte nui wu wo ɠaazu, mazɔlɔɔ GALA ge ɠɛni laavɔɔ vaiti, maaɓɛlɛ vaiti ta laavɔɔ ʋoogiti kɛɛzu ga tɔun maaʋele wo zaama.

²³Zunui naa ɠwɛɛni wo ma, é zoloo GALA ná-devei ta ná-seikpasui ma, nii é kɛɛni ma yeeluɠɔ kaite, wo paaʋɛ siɛgi zu wo zɛga la tɔ koloɠolo nuiti zea, ti kpadɔ saa wului ma.

²⁴GALA ge buzeɠeʋɛ ʋolu, é kula saai ma zoolɛiti su, mazɔlɔɔ naa la ɠɛni zolooga ga saai ʋa makɛ ba ná-zobogi wu.

²⁵Davide niima wooi woni, é ʋilɛ Yesu ʋa, é ɠɛ ma: ‹Gàazu logɛ Ɠɔoɠɔ GALAGI ʋa yeenɔpɛ, mazɔlɔɔ toɠa kòbaʋɛ, nii a kɛ gè mina ɲiikpi eyɛsu pɛ.

²⁶Naa ɠa é ba, zìi ɠaanɛa, gòoiti daavegɛ ga koozunɛɛi, kpùsɛi ɓɔɠɔi ɠa looɠosu, makɛgai kitogi zu.

²⁷Mazɔlɔɔ è la ɠɛlɛa bà, gè ʋa yɛ gɔvɛalaazu, è la vaa bu nɛ̀i gè ga ɗa-wotii ɠɛ nui, gè ga wooɠɛɠila nu, gè ʋa luula kabayeɠei zu.

²⁸È zɛnvu ʋelei lɛa ga ze, ɗa nɔ̀un daave ga koozunɛɛi è ɠɛɛ vai zu kòba.›

²⁹Kɛ̀ɛlointi, zobogi veeʋɛ bɛ̀ ga gè ɠɛ wo ma: Ade-mɛmɛwola Davide zaaʋɛ, maaɠulu, ná-kabai ɓalaa ka ade zaama zaaɠaza.

³⁰Kɛlɛ é ɠɛni ga GALA goo wo nui, ta é ɠɛni kwɛɛni ga GALA ge minazeɠeni bɛ, é ɠona ga mavofodai ta ɠa zei ná-masa kpɔkpɔgi ɠa.

³¹Kilista wuzeɠe vai, é ɠula saai ya, naa ɠa Davide kaani ma yeeluɠɔ, naama wooi ɠa é boni ga: ‹GALA ge la ɠɛlɛa bà, gè ʋa yɛ gɔvɛalaazu, é la vaa bu, kpùsɛi ʋa luula kabayeɠei zu.›

³²GALA ge Yesu nii wuzeɠeʋɛ, é kula saai ya, gi pɛ gá ga naama zeeleiti.