Kɛɛwotiiti 17:12-32

¹²Ma mɔinmɔin ge ɠidaaleʋeni ti zaama, naa ʋoluma Gɛlɛkiiti saama, tosuba anzanuiti ta zunui ma mɔinmɔin ti ɠidaaleʋeni.

¹³Kɛlɛ Tɛsalɔnike Zuifuiti ti kwɛɛgai ma ga Pɔle ɠa GALA daawooi laazeelizu Ɓeelee, ti ʋaani ná ga ti bɛbɛi ɠaazulɛ, ti ʋuutugi ʋili ti zaama.

¹⁴Kidaaleʋe nuiti ti Pɔle leʋeni ga kpoloɗɛi laa ʋelei, kɛlɛ Silase ta Timɔtee ti yɛni taazuʋɛ.

¹⁵Zɔiti ti liini Pɔle maazaasu, ti liini la fɔ Atɛne. Ti ɠalesuʋɛ ma, Pɔle valini ti ma ga Silase ta Timɔtee ti li pɔ bɛ fala.

¹⁶Siɛgi zu Pɔle ɠɛni siɛɲɔɠɔiti kpɔunsu da Atɛne, zii ɠɛni ɓɔlɔzu, tɔɔzei é kaani ga taai naa wola laavegɛ ga kɔɔɠɔ ganigiti.

¹⁷É ɠɛni ɓɔɛzu Zuifuiti pɔ, GALA dɛbi ʋɛlɛi wu, ta zii ɠiligiti pɔ, niiti ti ʋilɛgai Zuifuiti ta-ƓALA pelei ma, naa ʋoluma folo-o-folo é ɠɛni ɓɔɛzu nuiti pɛ pɔ, niiti ti ɠɛni ʋaazu ete zaamaʋɛ.

¹⁸Faaɠwɛ nui tanigaa, niiti ti ga Epikuliɛinti ta Sitɔisiɛinti, ti tɔɔzeini ga ɓɔɛa pɔ. Tanigaa ti ɗa ɠɛ ma: «Lee ma ɓɔɛzuɠula ɲaka ɠa zunui nii bosu?» Zɔiti ti ɗa ɠɛ ma: «Ɗa ka ga toɠa gala kiligaa ta-vaa laazeelizu.» Tɔɔzei ti ɠɛni Pɔle woomɛnisu, é ɗa Yesu ná-Woo Niinɛ Ʋagɔi laazeeli, ta buzeɠe vai, é ɠula saai ya.

¹⁹Ti li ʋele ɠana la Aleyɔpaze nuiti kakala, ti ɠɛ ma: «Gá zoo nɛi gi faa ɠwɛɛ ɓaa, é ʋilɛ kala niinɛi naa ʋa, nii è bosu ga giye?

²⁰Tɔɔzei gá fai tanigaa mɛnisu è-la, niiti kaipa gi la dɛ ta mɛnini. Tɔ ɠa é ba, gá pɔ gi naati poluɠwɛɛ.»

²¹Tama Atɛne nuiti pɛ ta wɛɛinti ti ɠɛni ti zaama, ti ɠɛni ta-yeeɠɛɠalai pɛ kɛɛzu nɔ ga ti ɗa faa niinɛiti bo ɓɔɠɔ ma, ta ti ɗa mɛni.

²²Pɔle wuzeɠeni naazu Aleyɔpaze nuiti saama, é ɠɛ ma: «Atɛne nuiti, gè pɛtɛ ga wo pɛ wa ga gala pele ziɛ nu wolaiti, kɛʋelei pɛ ma.

²³Tɔɔzei zɛ̀gɛ leʋesu taazuʋɛ, gè ɗa wa-ɠɔɔɠɔ ganigiti ka, eyɛsu gè ná ta ɠaa ʋɛ sɛʋɛai ná ga: ‹Galagi nii nu la kwɛɛ, naa nɔnɔi ɠa.› Nii wo dɛbizu, wo la kwɛɛ, naa ɠa gè ná-fai laazeelizu wo ma.

²⁴GALAGI nii é eteai ta su aniiti pɛ kpɛtɛa, tɛigi é ga geeɠɔlɔgi ta zooi ti-Maliɠii, seizu la gala pɛlɛi naa wu, nii nuiti ti togai ga yeei.

²⁵Kpɛdɛ la ba ɓalaa ga nuiti ti ani ve bɛ, eɠɛ a ʋala ani ta ma zii nɔpɛ ma, tɔɔzei toɠa é zɛnvui ta zɛnvu viilɛi veezu nuɓusɛiti pɛ zea, naa ʋɛɛ ani mɔtaiti pɛ ba.

²⁶É etea nuɓusɛi pɛ kpɛtɛʋɛ ga nu ɠila kpegi mavofodai nɔ, nii a kɛ ti zei zooi ɠa ná pɛ. É yeeɠɛɠalaiti teʋeni ba, é nuiti ti zei yooiti kwɛgiti da,

²⁷nii a kɛ ni toɠa zoo ɠɛɛzu nuiti ti yɛ ɠɛɛzu tiɠili tiɠili ti GALA gaiziɛ ti ka. Tama tɔun maa la ɠoozani de tanɔpɛ ba.

²⁸Tɔɔzei: ‹Tɔun maaʋele zu, zɛnvui ɠa de ya, de ɗa ɲiikpi, ta da vulua.› Eɠɛʋelei wa-vaa ɠwɛɛ nui tanigaa ti bogai la ga: ‹Ada ga mavofodaiti.›

²⁹Naa ɠa é ba, tɛi ade ga GALA mavofodaiti, ade mina ɠisiɛ ga GALA kulaʋɛ ga kɔɔɠɔ ganigiti niiti ɲɛɛliɠi ɠɛ nuiti, ti ti ɓɛtɛai ga zanugi, ɓaa walii, ɓaa kɔtui, ga ti ɠoozu ɠeleɠelegiti.

³⁰GALA ge nuɓusɛiti ta-ɠimalala yeeɠɛɠalai naati zɛga ná, kɛlɛ niizu toɠa nuiti pɛ devezu adaʋɛ pɛ ga ti ti ziɛ ʋelei maavalibo.

³¹Tɔɔzei é yeeɠɛɠala leʋea ba, siɛgi zu é ʋaazu nuɓusɛi pɛ tukpɔɠaaleʋezu la ga telebodai, zunu ɠila kpegi maaʋele, nii é yiimazeɠeai la, é naama ʋoogi ɠula kɛlɛma ɛsɛ pɛ bɛ ga é naa wuzeɠe, é kula saai ya.»

³²Ti naama wooi mɛnigai ma ga gɔvɛiti buzeɠe vai saai ya, tanigaa ti ɠɛni ɲɛɛɠulasui ɠɛɛzu la, taɠiligaa ti ɗa ɠɛ ma: «Gá è woomɛni yee ɠili, é lo naama vaiti ba.»