Kɛɛwotiiti 15:8-41

⁸GALA nii é nu yiimaʋɛ ɠwɛɛ, naa ɓɔɠɔi ma zeele wooi woga ga é yeezeiɗa ti wu, tɔɔzei é Zɛnvu Ɲadegai vea tiya ga ade ɠɛʋele,

⁹é la zeeɠaaɠwɛɛzu ɠɛɛni ade yɔɠɔzu ada tiye, tɔɔzei é ti-yiimaʋɛti ɲadegɛ ga ta-ɠidaaleʋei maaʋele.

¹⁰Lee vaa zu mu wo GALA suɠɔɠɔsu, ga wo unbawului naa la kaladopoiti kpoɓoɠa, nii ada ade-mɛmɛwolani ade la ziɛni seɠe vai wu?

¹¹Kɛlɛ adɔun, Maliɠii Yesu zaalai ɠa ade ɠidaaleʋeai la ga ade ɠizogɛ ga ti ɠɛʋele.»

¹²Bɛbɛi pɛ ge maaɠɛni kpɔ, ti woilo Ɓalanaɓase ta Pɔle woo ma, ti ɗa naa zuɠula, ʋelei GALA ge ɠɛni laavɔɔ vaiti ta maaɓɛlɛ vaiti kɛɛzu la ga ti maaʋele zii ɠiligiti saama.

¹³Ti ɓegai ma ga ɓɔɛ, Zake kpɔɛi zeɠeni, é ɠɛ ma: «Kɛ̀ɛleaiti, à woilo dɛɛ gòo ma!

¹⁴Simɔn naa zuɠulaa ade ma, ʋelei tɔɔzeizu mɔunpa GALA ge yiimazeɠeni la zii ɠiligiti saama ga zii ɠila, nii a ɠɛ ga nɔnɔ.

¹⁵Naama vai ɓalaa zoloogɛ GALA goo wo nuiti daawooi ma, tɔɔzei sɛʋɛʋɛ ga:

¹⁶‹Naa ʋoluma nà ɠale ma ʋolu, Davide ná-pɛlɛi nii goloai, nà gaalɔ ʋolu, ʋɛti náti koloɠologai, gè mináti kpɛtɛ ʋolu. Nà to ʋolu,

¹⁷naa ɠa a kɛ, nuɓusɛi mɔtaiti ti Maliɠii ɠaiziɛ, ta zii ɠiligi niiti kpein ti ɠɛai ga nɔ̀nɔ. Naa ɠa Maliɠii bogai,

¹⁸nii é ná-faazeikpasuiti kulaai kɛlɛma kaite wɔlɔwɔlɔ.› »

¹⁹Zake ɠɛni mɔnɔ ti ma: «Naa ɠa é ba, nà kaazu ga fizɔgɛ ga ade mina faaɓa kpɛtɛ zii ɠiligiti tuɠɔ, niiti ti ɠidaaleʋezu GALA ma,

²⁰kɛlɛ ade sɛʋɛi leʋe ti ma ga ti ɓɔɠɔ maaɲɛ ga kɔɔɠɔ ganigiti ta-ɠɔzɔba vaiti, koloɠologi, ta ti mina sua mi nii ma ɲama la ʋuuni, naa ʋɛɛ ɲamai ʋa.

²¹Tɔɔzei kaite wɔlɔwɔlɔ ziɛgiti su, nuiti ta taa ɠilagilagiti su ti ɗa Moize ná-tɔgi ɠala, ta toɠa ɠalasu dooɠo foloiti pɛ GALA dɛbi ʋɛlɛiti bu.»

²²Naama ziɛgi zu, keelaiti ta totuɠɔiti, naa ʋɛɛ Egilisii zu nuiti pɛ ba ti zolooni ma, ga ti nui tanigaa ɠula ɓɔɠɔ zaama, ti ti ʋilɛ Pɔle ta Ɓalanaɓaseni polu, ti li Antiyɔse. Ti yeeloni Zude ʋa, nii é lolisu ga Ɓalasaɓase, ta Silase, ti felegɔ ti ɠɛni ga nuiti, niiti unfema wola ɠɛni ti ʋɛ kidaaleʋe nuiti saama.

²³Ti sɛʋɛi veeni ti ya, nii su wooi ɠɛni ga nii: «Wo-ɠɛɛlointi, ti ga keelaiti ta totuɠɔiti ta wo luʋɔsu, wɔiti wo la ga Zuifua, wo Antiyɔse taazuʋɛ, naa ʋɛɛ Siili ta Silisi ɠoʋiiti ba.

²⁴Gi mɛnigɛ ga gi zaama, nui tanigaa ti ʋaaʋɛ wo ʋɔ bɛ, ti wo yiiɓɔlɔ, ti wo ɲiikpi ga ta-ɓɔɛzuɠulai. Gá lɛi gi ʋa naama levei ve ti ya.

²⁵Gi pɛ gi zoloogɛ ma ga gi yeelo nua ʋa, gi ti ʋɛɛ gi-nɛɛɲɔɠɔiti Ɓalanaɓase ta Pɔle ʋa, ti ʋa wo ʋɔ bɛ,

²⁶niiti ti ɠikula ti-yɛnvuiti su ade-Maliɠii Yesu Kilista laaseigi vaa zu.

²⁷Naa ɠa é kɛa, gi Zude ta Silase leʋega wo ma, ga ti ʋa ti niima ɠeela woo laazeeli wo ma ga laawoo.

²⁸Nɛɛʋɛ Zɛnvu Ɲadegai ʋɛ, ta gá ɓɔɠɔi gi ʋɛ, ga nu mina kasɔ nɔpɛ da wo unma, kɛni nii maalaasu la ná.

²⁹Naa ɠa é ga, kɛni wo mina ɗa ga suaiti mi, niiti ti ɠulaai ga zalaɠai kɔɔɠɔ ganigiti bɛ, ta ɲamai, naa ʋɛɛ sua ʋoomaiti ba, wo ɓɔɠɔ maaɲɛ ɓalaa ga koloɠologi. Wa naati kɛɛna, faa ʋagɔ ʋe wo ʋɛ. Ade ɠaana mɔnɔ!»

³⁰Ti yeeɓeni keelai naati ba, ti li. Ti liini Antiyɔse, ti kidaaleʋe nu ɓɔgi pɛ gaalɛ ba, ti sɛʋɛi ve ti ya.

³¹Sɛʋɛi ɠalagai ma, ti wola ɠoozunɛɛni, tɔɔzei iɲɔdɔɔ wooi ʋa é ɠɛni su.

³²Tɛi Zude ta Silase ti ɠɛni ga GALA goo wo nuiti, ti lɛbini ɓɔɛzu kidaaleʋe nuiti pɔ, ti ɗa naati tɛnɛ, ta ti ɗa ti iɲɔdɔ.

³³Ti ku ɠɛɛni ná fele, naa ʋoluma ɠɛɛɠɛlointi ti yeeɓeni ti ʋa ga ziilɛigi, ti ɠale ma naama nuiti pɔ, niiti ti valini ti ma.

³⁴Anɛɛ naa ʋe, é nɛɛni Silase ʋɛ ga é yɛ ná.

³⁵Pɔle ta Ɓalanaɓase ti yɛni Antiyɔse, naa ʋɛɛ nu mɔinmɔin ba, ti kalagi wo, ta ti ɗa Maliɠii ná-Woo Niinɛ Ʋagɔi laazeeli.

³⁶Ku ɠɛɛni fele, naa ʋoluma Pɔle ɠɛni Ɓalanaɓase ma: «De ɠale ma ʋogi zu, de li de kidaaleʋe nuiti ka, ʋɛ pɛ de leʋega ná, de Maliɠi laawooi laazeeli, de ka mini ɠɛɠala ɠa ti ná kidaaleʋei zu.»

³⁷Ɓalanaɓase ɠɛni pɔ, é Zan ʋilɛ ti ʋolu, nii daasei pɛai ga Maleke,

³⁸kɛlɛ Pɔle kaani ga é la vizɔni ga ti ʋa naa ʋilɛ ʋolu, nii é zeɠeni ti ʋolu siɛ mɔungi zu Panfili zɔli, é la ɠɛɛni ti ʋa ta-wotii zu.

³⁹Naama maaɠaalii ɓaani ti yɔɠɔzu, eyɛsu ti bali ma. Ɓalanaɓase Maleke zeɠeni, ti lɛ ɓatoi zu, ti li Sipele.

⁴⁰Pɔle ma ge yiimazeɠe ga Silase, kidaaleʋe nuiti ti ti ɠalivaani Maliɠii ná-zaalai ma, ti ɗa li.

⁴¹Ti leʋeni Siili yooi zu ta Silisi, ti ɗa Egilisiiti iɲɔdɔ.