Kɛɛwotiiti 13:30-48

³⁰Kɛlɛ GALA ge buzeɠeni, é kula saai ya.

³¹Folo mɔinmɔin daawu, é ɓɔɠɔ lɛɛni ga niiti ti yɛni ba, ti zeɠe Galilee, ti li Zeeluzalɛme, ti ɠɛai niina ga ná-zeeleiti nuɓusɛiti koba.

³²Giya ɓɔɠɔi ɓalaa, gá naama Woo Niinɛ Ʋagɔi laazeelizu wo ma, nii GALA ge ma minazeɠegi woni ade-mɛmɛwolani bɛ,

³³GALA ge naa laazeelia ade ʋɛ, adɛiti ade ga ti-lointi, ga Yesu wuzeɠe vai, é ɠula saai ya, eɠɛʋelei sɛʋɛai la GALA sɛʋɛi ma wuyei velesiɛi zu ga: ‹Ɗa ga dòun zunui, gè è zɔlɔɔgɛ za.›

³⁴GALA ge buzeɠe vai, é kula saai ya, é mina mɔ ɠale ma, é ʋa luula, naa ɠa é boni ga: ‹Nà faa ɲadegaiti kɛ wo ʋɛ, niiti ti maa la valiboga pɛ, nii gè minazeɠeni la Davide ʋɛ.›

³⁵Naa ɠa é kɛai é bogai la ná taɠili ga: ‹È la vaa bu ɗa-wotii ɠɛ nui, é ga wooɠɛɠila nui, é ʋa luula kabayeɠei zu.›

³⁶Tama Davide ɓegai ma ga botii ɠɛ GALA bɛ ná-yeeɠɛɠalai zu, é zaani, é li mɛmɛwolani pɔ, é luula.

³⁷Kɛlɛ zɔi GALA ge buzeɠeai, é ɠula saai ya, naa la luulani.

³⁸Kɛ̀ɛlointi, à suɠwɛɛ mu ga Yesu maaʋele ɠa kotoi zuvaayɛ fai laazeelizu la wo ma.

³⁹Zɔi nɔpɛ é ɠidaaleʋezu ma, naama nui ná-kotoi zeɠea ba, nii Moize ná-tɔgi la ɠɛni zooga kɛɛzu wo ʋɛ.

⁴⁰À dama ga ɓɔɠɔ mu, naa ɠa a kɛ nii bogai GALA goo wo nuiti ta-zɛʋɛiti su, naa mina zeeli wo ma ga:

⁴¹‹Wɔi wo ga nuɓusɛiti ti laavegai ga maayo bala bɛi, à wɛlɛ, wo laa ɠa vɔ, wo-ma zuwu ɠaaleʋe. Mazɔlɔɔ nà ʋaazu fai ta ɠɛɛzu wa-yeeɠɛɠalai, naama vai ni nu a la bona wo ma, wo la ɠɛni la da.› »

⁴²Bɛbɛi ɠɛai ma ɠulazu, ti naati maanɛɛnɛni ga ti ɓɔɛ ʋolu, é ʋilɛ naama vaa ɠilagi nɔ ʋa, dooɠo foloi nii é ʋaazu.

⁴³Gaalɛbai ʋoluma, Zuifui ma mɔinmɔin ta zii ɠiligi niiti ti latigai, ti ʋilɛ Zuifuiti ta-ƓALA pelei ma, ti ʋilɛni Pɔle ta Ɓalanaɓase ʋolu. Naati ti ɠɛni ɓɔɛzu ti ʋɔ, ti ɗa ti iɲɔdɔ ga ti ɠili kpaan GALA ná-zaalai ʋa.

⁴⁴Poluma looɠo foloi, nu ɠa ɠɛ ma, taazuʋɛ nuɓusɛi pɛ ka nɔ é ɠaalɛɛni ba GALA daawooi mɛni fai zu.

⁴⁵Zuifuiti ti bɛbɛi ɠaai ma, ti laaveni ga toloi. Nii Pɔle ɠɛni bosu, ti ɗa naa maaɠaali ga woo ɲɔiti.

⁴⁶Pɔle ta Ɓalanaɓase ti ɓɔɛni ti ʋɔ ga ladalai, ti ɠɛ ti ma: «Wa ɠa mɔunpa GALA daawooi maa ɠɛa nɛɛni, é wo wo ma. Kɛlɛ tɛi wo ɠɛlɛzu ba, ta wo ɓɔɠɔ levezu ga wo la zolooni ɠɔoɠɔ zɛnvui ma, naa maaʋele ma, ɓɛ gi ɠaaʋote zii ɠiligiti ma.

⁴⁷Tɔɔzei naama levei ɠa Maliɠii feai gi ya, é ɠɛ ma: ‹Gè è loga, è ɠɛ ga ziiti ta-wozakalagi, è kizo fai ɠula kɛlɛma eyɛsu zou ɓela ga.› »

⁴⁸Zii ɠiligiti ti naama wooi mɛnigai ma, ti ɠoozunɛɛni gola, ti ɗa Maliɠii lɛbi daawooi vaa zu. Niiti kpein ɠɔoɠɔ zɛnvui ɠɛʋele ɓɛtɛni ti ma vaa ma, naati ti ɠidaaleʋeni.