Kɛɛwotiiti 13:27-35

²⁷Tɔɔzei Zeeluzalɛme zei wo nuiti ta ta-ɠundiɠiiti ti la Yesu ná-fai ɠaaɠaani, naa ʋɛɛ GALA goo wo nuiti gooi ʋa, nii é ɠalasu dooɠo foloi pɛ. Ti peelalaai ma, ti GALA goo wo nuiti daawooi naati pilɛni su.

²⁸Anɛɛ ni ti la ɠɛni sɔ kaani ba, nii nu a nu ʋaa su, ti ɠɛni Pilate ma, é Yesu ʋa.

²⁹Ti ɓegai ma ga naama vaiti pɛ daazeeli, niiti ti zɛʋɛai ná-faa zu, ti kulani saa wului ma, ti da kabai zu.

³⁰Kɛlɛ GALA ge buzeɠeni, é kula saai ya.

³¹Folo mɔinmɔin daawu, é ɓɔɠɔ lɛɛni ga niiti ti yɛni ba, ti zeɠe Galilee, ti li Zeeluzalɛme, ti ɠɛai niina ga ná-zeeleiti nuɓusɛiti koba.

³²Giya ɓɔɠɔi ɓalaa, gá naama Woo Niinɛ Ʋagɔi laazeelizu wo ma, nii GALA ge ma minazeɠegi woni ade-mɛmɛwolani bɛ,

³³GALA ge naa laazeelia ade ʋɛ, adɛiti ade ga ti-lointi, ga Yesu wuzeɠe vai, é ɠula saai ya, eɠɛʋelei sɛʋɛai la GALA sɛʋɛi ma wuyei velesiɛi zu ga: ‹Ɗa ga dòun zunui, gè è zɔlɔɔgɛ za.›

³⁴GALA ge buzeɠe vai, é kula saai ya, é mina mɔ ɠale ma, é ʋa luula, naa ɠa é boni ga: ‹Nà faa ɲadegaiti kɛ wo ʋɛ, niiti ti maa la valiboga pɛ, nii gè minazeɠeni la Davide ʋɛ.›

³⁵Naa ɠa é kɛai é bogai la ná taɠili ga: ‹È la vaa bu ɗa-wotii ɠɛ nui, é ga wooɠɛɠila nui, é ʋa luula kabayeɠei zu.›