Kɛɛwotiiti 12:1-21

¹Naama ziɛgi zu, masagi Elɔde yeeʋɛɛni Egilisii zu nui tanigaa ma.

²É Zan kɛɛɠɛloin Zake ʋaani ga boɠa zɔkpɔi.

³Tɛi é kaani ga naa wola nɛɛni Zuifuiti bɛ, é Piyɛlɛ ɓalaa soni, fɛti ziɛgi zu, siɛgi zu ta ɗa ɓului mi la, nii lɛʋɛ la su.

⁴É naa zogai ma, é pili kasoi ɠa, é kalivaani salaʋusu naanigɔ zeizu naanigɔ ma, ga ti ɗa wɛlɛ ma. Ná-kisiɛi ɠɛni ga é naa ná-tukpɔi ɠaaleʋe, siɛgi zu Pake fɛtii leʋesu da.

⁵Piyɛlɛ makɛga ɠɛni de kasoi ɠa, Egilisi nuiti ti la ɠɛni looɠosu GALA falii ʋa bɛ.

⁶Yeei Elɔde deveni la ga geelaa ɠa laona nɔ feya, é naa ná-tukpɔi ɠaaleʋe kɛlɛzu, naama yee ɓidii, Piyɛlɛ ɠɛni laani, é ɗa ɲi salaʋusu felegɔ yɔɠɔzu, kaso makɛ nuiti ti loni kaso ʋɛlɛi laaʋɛ.

⁷Gaamanɔ, Maliɠii ná-geezuɠeelai gila ge ɠulani kɛlɛma, kaso ʋɛlɛi wu ɠalani kpoke, ʋɛ Piyɛlɛ ɠɛni ná. Geezuɠeelai yeelooni Piyɛlɛ ɓɛtɛagaʋɛ, é maaloɠa, é ɠɛ ma: «Wuzeɠe fala!» Yɔlɔɠɔiti ti vieni Piyɛlɛ yeeiti ba, ti loo.

⁸Geezuɠeelai ɠɛ ma: «Ɗa-zaamaɠiligi ɠili zaama, è ɗa-zaʋalagiti dɔ ɠɔɠɔa!» Piyɛlɛ naa ɠɛɛni. Geezuɠeelai ɠɛ ma: «Ɗa-zeɠe wolai loo ɠɔba, è ʋilɛ pòlu.»

⁹Piyɛlɛ ɠulani kaso ʋɛlɛi wu, é ʋilɛ polu, é la ɠɛni laani da ga nii geezuɠeelai kɛɛzu, ɠite vaa ʋe, é ɠɛni ɠisiɛzu ga kulakɛlɛma nɔ ɠa é kaazu.

¹⁰Siɛgi zu ti leʋeni la kaso makɛ nuiti seizu mɔungi ta felesiɛi ʋa, ti zeelini kɔlu ɓogi ma, nii daalaosu ga taazu ʋelei. Naa laalaoni ɓɔɠɔ ʋɛ ti luɠɔ, ti ɠulani ti ʋilɛ koi yɔɠɔzu ʋelei gila ma, ti ɗa li. Gaamago, geezuɠeelai ɲɛɛlɛni koba.

¹¹Piyɛlɛ naama vaiti gaaɠaani niina, é ɠɛ ma: «Gaamazu, gè kwɛɛ niina ga Maliɠii ná-geezuɠeelai leʋegɛ ga é kùla Elɔde yeezu, ta naa pɛ su, nii Zuifui nuɓusɛiti ki ge ɠɛa ba, é lo nɔ̀un ba.»

¹²É ɠidaai ma faiti bu, é sakpani Zan nii daasei pɛai ga Maleke naa dee Maali ná-pɛlɛi wu, ʋɛ nu mɔinmɔin ge ɠaalɛɛni ba ná, ti ɗa GALA fali.

¹³Siɛgi zu é siɠigi ma ɓogi laaloɠani la, botiɠɛ anzanui ta ɠɛni ná, daaseigi ga Lɔɔde, naa maaɓuɠani kpogi ʋa ga é woilo.

¹⁴É ɠwɛɛsu ɠaani Piyɛlɛ wooi ʋa, koozunɛ ʋelei ma, é la ɠite siɠigi laalaoni, é ɓizɛni, é li ɠɛɛzu ti ma, Piyɛlɛ ɠa é siɠidaʋɛ.

¹⁵Ti ɠɛni ma: «È litigɛ!» Kɛlɛ é ti ɠisuɠalani ga gaamai ʋe. Ti ɠɛni ma: «Ná-geezuɠeelai ʋe mu.»

¹⁶Naazu Piyɛlɛ ɠɛni ba nɔ, é ɗa pɛlɛi laaloɠa. Ti pɛlɛi laalaogai ma, ti laavɔɔni ga kaa vai.

¹⁷É yee ɠɛɛni ti ma ɓɛɓɛ ga ti maaɠɛ kpɔ, é zɛba é naa zuɠula ti ma, ʋelei Maliɠii kulaai la kasoi ɠa, naa ʋoluma, é ɠɛni ti ma: «À bo Zake ma ta kidaaleʋe nui zɔiti.» Naa ʋoluma, é liini ga ada ɠili pele.

¹⁸Poluma zobui, salaʋusuiti ti wola ɠɛni unga wuulee naama vai zu, nii é ɠɛni ga Piyɛlɛ.

¹⁹Elɔde numaa ʋilɛni ga ti Piyɛlɛ ɠaiziɛ, kɛlɛ ti la kaani. É kaso makɛ nuiti gaazaɠani, é devei ve ga ti naati paa. Naa ʋoluma, é zeɠeni Zudee yooi zu, é li zeizu Seezalee.

²⁰Kpɔɛi ɠɛni Elɔdeni zɔɠɔzu ta Tiil nuiti, naa ʋɛɛ Sidɔn nuiti ba. Naati seizu felegɔ ti zolooni faa ɠila ma, ti ʋoluzeigi ɠɛ ga Ɓelasetuse, masagi ɲii ʋɛlɛi wu lotuɠɔi. Naa ʋoluma ti liini ga ti ziilɛigi maavali masagi ma, tɔɔzei ti-ɠɔnɔgi pɛ ge ɠɛni zeɠezu masagi ná-zooi nɔ zu.

²¹Naama voloi zeeliai ma, Elɔde ɓɔɠɔ maaɠilini ga masa seɠei, é zei ná-masa kpɔkpɔgi ɠa, é ɗa masa kpɔɛ wolai wo ti ma.