Kɔnti tife 13:4-28

⁴E xilie nan yi ki: Kelife Ruben bɔnsɔɛ ma, Sakuru xa di xɛmɛ Samuwa.

⁵Kelife Simeyɔn bɔnsɔɛ ma, Xori xa di xɛmɛ Safati.

⁶Kelife Yuda bɔnsɔɛ ma, Yefune xa di xɛmɛ Kalebi.

⁷Kelife Isakari bɔnsɔɛ ma, Yusufu xa di xɛmɛ Yigali.

⁸Kelife Efirami bɔnsɔɛ ma, Nunu xa di xɛmɛ Hoseya.

⁹Kelife Bunyamin bɔnsɔɛ ma, Rafu xa di xɛmɛ Paliti.

¹⁰Kelife Sabulon bɔnsɔɛ ma, Sodi xa di xɛmɛ Gadiyeli.

¹¹Kelife Yusufu xa di, Manasi bɔnsɔɛ ma, Susi xa di xɛmɛ Gadi.

¹²Kelife Dana bɔnsɔɛ ma, Gemali xa di xɛmɛ Amiyɛli.

¹³Kelife Aseri bɔnsɔɛ ma, Mikayeli xa di xɛmɛ Seturu.

¹⁴Kelife Nafatali bɔnsɔɛ ma, Fofisi xa di xɛmɛ Naxabi.

¹⁵Kelife Gadi bɔnsɔɛ ma, Maki xa di xɛmɛ Geyuweli.

¹⁶Xɛmɛe xilie nan na ki Munsa naxee xɛɛ Kanaan bɔxi rabɛnde. Munsa naxa Nunu xa di xɛmɛ Hoseya xili sa Yosuwe.

¹⁷Munsa to e xɛɛ Kanaan bɔxi rabɛnde, a naxa a fala e bɛ, «Wo xa mini Negewi gbengberenyi biri, han wo geyae yire li.

¹⁸Wo xa na bɔxi rabɛn, wo xa a kolon xa mɛnnikae sɛnbɛ gbo, xa e sɛnbɛ mu gbo, xa e wuya, xa e mu wuya.

¹⁹Wo xa a mato xa na bɔxi fan. Wo xa a kolon xa tɛtɛ na na taae rabilinyi ma.

²⁰Wo xa a mato xa na bɔxi fan sansi bɛ, xa wurie gbo naa. Wo kata wo xa fa na sansi bogi ndee ra.» Wɛni bilie bogi singe tɛmui nan nu a ra.

²¹E naxa sa na bɔxi rabɛn, kelife Sini gbengberenyi ma, han Rexobo, Xamata mabiri.

²²E naxa dangi Negewi gbengberenyi ra, e sa Xebiron li, Anaki xa die Aximan, Sɛsayi, nun Talamayi nu sabatixi dɛnnaxɛ. Xebiron taa nu tixi ɲɛ solofere beenu Sowan taa xa ti Misira.

²³E to Esekoli gulunba li, e naxa wɛni bili salonyi nde rasɛgɛ, a tɔnsɔɛ nu na naxan ma. Mixi firin naxa na xanin wuri kuye ra. E naxa xɔrɛ bogi nde fan tongo, a nun bogise nde naxan xili girenadi, naxan maniyɛ kɔɔbɛ ra.

²⁴E naxa na yire xili sa Esekoli, na nan na ki «Tɔnsɔɛ yire,» na wɛni bogi tɔnsɔɛ xa fe ra, e naxan baxi.

²⁵E to xi tongo naani raba naa na bɔxi rabɛnde, e naxa gbilen

²⁶Munsa, Haruna, nun Isirayila ɲama yire. E nu na Kadesi, Paran gbengberenyi ma. Mɛnni e naxa dɛntɛgɛ sa, e na bɔxi sansi bogie masen e bɛ.

²⁷E naxa a fala Munsa bɛ, «Muxu so nɛ bɔxi ma, i muxu xɛɛ dɛnnaxɛ. Bɔxi nan a ra, kumi nun xiɲɛ xɛlɛma dɛnnaxɛ. Na bogise ndee nan ya.

²⁸Kɔnɔ ɲama naxan sabatixi na bɔxi ma, e sɛnbɛ gbo. Tɛtɛ dɔxɔxi taa birin na. Taa xungbe nan e ra. Muxu Anaki bɔnsɔɛ yati toxi nɛ naa.