4Esap wor ar metek, inisir a pöchökül o öümanau.
5Ir resap weires usun pwal ekoch aramas, resap riaföü usun pwal ekoch.
6Iei mine ra mwärini lamalamtekia fän üer usun chök epa mwärämwär, angangen mwäneson a pwölürela usun echö üf.
7Seni lon leluker mi pöchökül a towu ekiek mi ngau, rawangau esap wor aükükün a chök nom lon ar ekiek.
8Ra takirin ämängaua aramas o eäni kapasingau, ra eniwa aramas fän ar lamalamtekia pwe repwe ariaföüür.
9Ra eäni kapasingau usun Kot lon läng o eäni fos sikesik ngeni chon fanüfan.
10Iei mine nöür kewe aramas ra kul ngeniir o müttir lükü ar kewe kapas meinisin.
11Iwe, ra apasa, “Kot esap sile. Ewe mi Unusen Tekia esap wor an silelap.”
12Iei usun lapalapen ekewe aramasangau.
13Ellet a solap pwe üa tümwünü lelukei pwe epwe limöch, a solap ai üsap tipis.
14Iteiten rän üa küna riaföü, nge iteiten lesosor ka apwüngüei.
15Iwe, are üa pwal apasätä usun mine ir ra apasa, wewen nge üpwe afangamäi noum kewe aramas.
16Üa sotuni le ekieki usun ai üpwe weweiti ei, nge a kon weires ngeniei,
17tori üa tolong lon imwom imwenfel. Ikenan a fateitiei usun sopolan ekewe aramasangau.
18Ellet, ka anomuur won leni mi mitimit. Ka föri mine repwe turutiu ren lon feiengau.
19Ra rosola lon eu chök otun, ra moropöküla ren niuokus.
20Ra usun chök eu tan mi morokaila, lupwen eman a pwök. Ai Samol, lupwen ka ütä, ra morokaila.
21Lupwen üa chou, lupwen lelukei a kinas,
22üsap weweiti och, üa umwes o usun chök eman man me mwom.
23Nge ngang üa chök nonom reöm fansoun meinisin, pun en ka amwöchü pöüifichi.
24Ka emweniei fän om öüröür, nge mürin kopwe etiwaei lon ling.
25Üsap eäni och me läng nge en chök. Üsap pwal pwapwaiti och mettoch me won fanüfan lükün en.
26Inisi me lelukei ra tongeni apwangapwangala, nge Kot ai pöchökül pwal wisei tori feilfeilachök.
27Nge chokewe mi likitukela repwe feiengau. Ka arosala chokewe resap allükülük ngonuk.
28Nge me rei, a mürina pwe üpwe kan ngeni Kot. Üa filätä Kot ewe Samol mi Lapalap pwe epwe ai lenien op, pwe üpwe apworausa an kewe föför meinisin.
Kölfel 73
Kölfel 73:4-28