Kölfel 72:6-19

⁶Amwo epwe usun chök üt mi püngütiu won fetil mi pwüküfö, pwal usun chök üt mi achöchönü fanüfan.

⁷Amwo pwüng epwe fefeitä lon ränin manauan, nge feiöch me kinamwe epwe lapala, tori ewe maram esap chüen nom.

⁸Iwe, ewe king epwe nemenem seni eu matau tori pwal eu, pwal seni ewe chanpupu Oifrat tori lesopun fanüfan.

⁹Ekewe aramas mi nonom lon ewe fanüapö repwe pworotiu me mwan, nge chon oputan repwe chapetiu lepwül fän mesan.

¹⁰Ekewe kingen Tarsis pwal ekewe king seni ekewe fanü mi nom lematau repwe takises ngeni, nge ekewe kingen Shepa me Sepa repwe uwato ar lifang ngeni.

¹¹Ekewe king meinisin repwe chapetiu me mwan, nge chon ekewe mwü meinisin repwe angang ngeni.

¹²Pun a angasa ekewe chon osupwang, lupwen ra kökköri, pwal ekewe mi mwelele me chokewe esap wor ar chon alilis.

¹³Iwe, a tongei chokewe mi apwangapwang me wöüngau, a pwal amanaua ekewe mi osupwang.

¹⁴A angaseer seni ar riaföü me ewe angangen mwäneson mi fis ngeniir, pun manauer a aüchea me ren.

¹⁵Amwo ewe king epwe manauatam! Amwo aramas repwe uwato kolt ren seni Shepa. Amwo aramas repwe iotek fän itan fansoun meinisin, repwe tüngor an feiöch rän meinisin.

¹⁶Amwo epwe wor chomong wiich lon ewe fanü. Amwo epwe wor uän irä won ekewe chuk. Resin ewe fanü epwe usun chök resin Lepanon. Nge ekewe telinimw repwe ur ren aramas usun chök ewe lemäl a ur ren fetil.

¹⁷Amwo iten ewe king epwe nonom tori feilfeilachök, nge iteüöchün epwe nonom ükükün fansoun akkar a nonom. Chon ekewe mwü meinisin repwe angei ar feiöch me ren, nge ir repwe apasa pwe i a feiöch.

¹⁸Sipwe mwareiti ewe Samol mi Lapalap, ewe Koten Israel, i chök a föri mettoch mi amwarar.

¹⁹Sipwe mwareiti itan mi ling tori feilfeilachök. An ling epwe aurala unusen fanüfan. Amen, amen.