Kölfel 72:2-15

²pwe epwe eäni kapwüng won noum kewe aramas fän pwüng, pwal won noum kewe mi riaföü fän pwüngüöch.

³Amwo ewe fanü epwe awora feiöch me kinamwe ngeni ekewe aramas, amwo epwe fis pwüng lon.

⁴Amwo ewe king epwe peni ekewe mi riaföü me lein ekewe aramas, amwo epwe alisi ekewe mi osupwang o akufu ekewe mi ariaföüür.

⁵Amwo ewe king epwe manau ükükün fansoun akkar me maram ra nonom läng, seni eu täppin aramas tori pwal eu täppin.

⁶Amwo epwe usun chök üt mi püngütiu won fetil mi pwüküfö, pwal usun chök üt mi achöchönü fanüfan.

⁷Amwo pwüng epwe fefeitä lon ränin manauan, nge feiöch me kinamwe epwe lapala, tori ewe maram esap chüen nom.

⁸Iwe, ewe king epwe nemenem seni eu matau tori pwal eu, pwal seni ewe chanpupu Oifrat tori lesopun fanüfan.

⁹Ekewe aramas mi nonom lon ewe fanüapö repwe pworotiu me mwan, nge chon oputan repwe chapetiu lepwül fän mesan.

¹⁰Ekewe kingen Tarsis pwal ekewe king seni ekewe fanü mi nom lematau repwe takises ngeni, nge ekewe kingen Shepa me Sepa repwe uwato ar lifang ngeni.

¹¹Ekewe king meinisin repwe chapetiu me mwan, nge chon ekewe mwü meinisin repwe angang ngeni.

¹²Pun a angasa ekewe chon osupwang, lupwen ra kökköri, pwal ekewe mi mwelele me chokewe esap wor ar chon alilis.

¹³Iwe, a tongei chokewe mi apwangapwang me wöüngau, a pwal amanaua ekewe mi osupwang.

¹⁴A angaseer seni ar riaföü me ewe angangen mwäneson mi fis ngeniir, pun manauer a aüchea me ren.

¹⁵Amwo ewe king epwe manauatam! Amwo aramas repwe uwato kolt ren seni Shepa. Amwo aramas repwe iotek fän itan fansoun meinisin, repwe tüngor an feiöch rän meinisin.