Kölfel 69:4-36

⁴Chokewe mi oputaei, nge esap wor popun, ra chomong seni iteiten meten mökürei. Chokewe mi mochen nieila ra pöchökül, ra kapas chofana usi. Ra pöchökül ngeniei pwe üpwe aliwinala mettoch üsap soläni.

⁵Ai Kot, en ka silei ai kewe föför mi mwäl, nge ai kewe tipis üa föriir resap mon senuk.

⁶Ai Kot, en ewe Samol mi Unusen Manaman, kosap mwütätä pwe chokewe mi eänuk apilükülük repwe säw pokitei. En ewe Koten Israel, kosap mwütätä pwe chokewe mi fel ngonuk repwe itengau pokitei.

⁷Pun üa itengau fän itom, nge säw a pwölüeila.

⁸Üa usun chök eman wasöla ngeni pwii kewe, üa usun chök eman chon ekis ngeni nöün inei kewe.

⁹Pun ai ekipwichi imwom mi pin a küküri leüti usun ekkei, nge ekewe kapasen esit mi toruk ra pwal toriei.

¹⁰Iwe, lupwen üa atekisonaeitiu ren ai echikefel, aramas ra asitaei.

¹¹Lupwen üa üföüf üf seni tuk, ra chök takiriei.

¹²Ir mi mot lon asamalapen ewe telinimw ra kapasen ämängau usi, nge ekewe chon puch ra kölüei.

¹³Nge ngang üa chök iotek ngonuk, ai Samol mi Lapalap. Kopwe pälüeniei, ai Kot, lon fansoun mi fich me reöm. Kopwe pälüeniei lon om tong ellet, pun ka apwönüetä om we pwon pwe kopwe amanauaei.

¹⁴Kopwe amanauaei seni ai kokotiu lon ewe pwakak. Kopwe angasaei seni ekewe chon oputaei, pwal seni ekewe koluk mi alolol.

¹⁵Kosap mwütätä pwe ekewe no repwe pwölüeila, kosap pwal mwüt ngeniei pwe üpwe kokotiu lon ewe lenien alolol, ika mwocholong lon peias.

¹⁶Ai Samol mi Lapalap, kopwe pälüeniei lon om tong ellet mi mürina. Kopwe kul ngeniei lon om ümöümöch mi somwola.

¹⁷Kosap amona mesom seni noum chon angang. Kopwe müttir pälüeniei, pun ngang üa nom lon riaföü.

¹⁸Kopwe kaneto rei o amanauaei, kopwe angasaeila seni ekewe chon oputaei.

¹⁹En ka silei usun ai küna turunufas, usun ai säw me ai itengau, ka pwal silei ekewe chon oputaei meinisin.

²⁰Ekewe kapasen turunufas ra atatakisi lelukei pwe üa nom lon apilükingau. Üa kütta ika eman epwe tongeei, nge esap wor eman, üa pwal kütta ika eman epwe achipaei, nge esap wor eman.

²¹Ra uwalong poison lon enei mongö, nge lupwen üa kaka, ra aünüei finikar.

²²Amwo ar kewe kametip repwe wiliti eu likatup ngeniir, nge ar kewe chulapen mongö mi pin repwe wiliti eu sär mi awarato feiengau wor.

²³Amwo meser repwe toputop pwe resap tongeni küna mwer, kopwe pwal föri pwe sökürür epwe pwor fansoun meinisin.

²⁴Kopwe awarato om song wor, om lingeringer epwe toriir.

²⁵Amwo lenier epwe pönüla, amwo esap chüen wor eman epwe nonom lon imwer imw mangaku.

²⁶Pun ir ra ariaföüü ätewe en ka wichi, ra pwal alapala ar ariaföüü ätewe en ka akinasa.

²⁷Kopwe achuetä liwiningau won ar liwiningau, nge kosap mwüt ngeniir pwe repwe küna manau.

²⁸Kopwe amoela iter seni ewe puken manau, nge kosap makelong iter lein chon pwüng.

²⁹Nge ngang üa metek o nom lon apilükingau. Ai Kot, kopwe atekiaeitä o amanauaei.

³⁰Üpwe mwareiti Kot ren echö köl, üpwe ingeiti i ren ai kilisou.

³¹Ei epwe apwapwai ewe Samol mi Lapalap lap seni ai üpwe eäni asor eman kow ika eman ätemwänin kow fiti mächän me pachapachan.

³²Ekewe mi nom lon riaföü repwe küna ei o pwapwa. Ämi mi fel ngeni Kot oupwe apilüköch.

³³Pun ewe Samol mi Lapalap a aüseling ngeni ekewe chon osupwang, nge esap manlükala nöün aramas mi nom lon fötek.

³⁴Läng me fanüfan repwe mwareiti i, pwal ekewe matau me meinisin mine a manau lon.

³⁵Pun Kot epwe amanaua Sion o aüsefälietä ekewe telinimwen Juta. Mürin, nöün chon angang repwe nonom ikenan o fanüeni ewe fanü.

³⁶Mwirimwirin nöün kewe chon angang repwe fanüeni ewe fanü, nge chokewe mi echeni i repwe nonom won.