Kölfel 69:1-11

¹Ngeni ewe mi emweni chon köl: Ei köl usun ngingin ewe köl itan Kiop. Echö än Tafit köl. Ai Kot, kopwe amanauaei! Pun ekewe koluk ra feitä tori fän üei.

²Üa kokotiu lon pwakak mi alolol, esap wor ana ie üpwe ipwetiu ie. Üa nonom lon koluk mi alolol, nge ekewe no ra pwölüeila.

³Üa fokun malülü ren ai siö, chiorei a pinela, mesei ra toputopula ren ai witiwiti om kopwe alisiei.

⁴Chokewe mi oputaei, nge esap wor popun, ra chomong seni iteiten meten mökürei. Chokewe mi mochen nieila ra pöchökül, ra kapas chofana usi. Ra pöchökül ngeniei pwe üpwe aliwinala mettoch üsap soläni.

⁵Ai Kot, en ka silei ai kewe föför mi mwäl, nge ai kewe tipis üa föriir resap mon senuk.

⁶Ai Kot, en ewe Samol mi Unusen Manaman, kosap mwütätä pwe chokewe mi eänuk apilükülük repwe säw pokitei. En ewe Koten Israel, kosap mwütätä pwe chokewe mi fel ngonuk repwe itengau pokitei.

⁷Pun üa itengau fän itom, nge säw a pwölüeila.

⁸Üa usun chök eman wasöla ngeni pwii kewe, üa usun chök eman chon ekis ngeni nöün inei kewe.

⁹Pun ai ekipwichi imwom mi pin a küküri leüti usun ekkei, nge ekewe kapasen esit mi toruk ra pwal toriei.

¹⁰Iwe, lupwen üa atekisonaeitiu ren ai echikefel, aramas ra asitaei.

¹¹Lupwen üa üföüf üf seni tuk, ra chök takiriei.