Kölfel 68:1-8

¹Ngeni ewe mi emweni chon köl: Echö än Tafit köl. Kot epwe ütä o atoropasafeili chon oputan, chokewe mi oputa i repwe sü me mwan.

²Usun asepwäl a ässala ötüötün ekkei, iei usun epwe ässirela. Usun kiris a telila ren ekkei, iei usun ekewe aramasangau repwe rosola me fän mesen Kot.

³Nge ekewe chon pwüng repwe uren pwapwa, repwe mwänek me fän mesen Kot, repwe mweireir fän pwapwa.

⁴Oupwe köl ngeni Kot, oupwe kölün mwareiti itan. Oupwe chietä echö köl ngeni ewe mi wawa ekewe kuchu, itan ewe Samol mi Lapalap. Oupwe mwänek me fän mesan.

⁵Kot ewe mi nom lon imwan mi pin, i semen ekewe mi mäsen me chon tümwünün ekewe fefin mi mä pwülüer.

⁶Kot a ngeni ekewe mi akaleman ar famili, a emwenawu ekewe chon fötek pwe repwe ngasala fän pwapwa, nge ekewe chon ü ngeni Kot repwe nom lon eu fanü mi pwasapwas o pwichikar.

⁷Ai Kot, lupwen ka akom mwen noum aramas, lupwen ka pwerela lon ewe fanüapö,

⁸fanüfan a chechech, ekewe läng ra apüngätiu üt me fän mesen Kot. Ewe chuk Sinai a chechech me fän mesen Kot, ewe Koten Israel.